రైలు ఇంజిన్‌, బోగీ మధ్య నలిగి షంట్ మ్యాన్ మృతి

మాటల్లో చెప్పలేని విషాదమిది. రైలు ఇంజిన్, కోచ్ మధ్యలో నలిగి కార్మికుడు దుర్మరణం పాలయ్యాడు. బిహార్‌‌లోని సమస్తిపూర్ జిల్లా బరౌనీ రైల్వే జంక్షన్‌లో ఈ విషాద ఘటన చోటు చేసుకుంది. షంట్ మ్యా్న్‌గా పనిచేస్తున్న అరుణ్ కుమార్ రౌత్ (35) రైలు ఇంజిన్, పార్సెల్ వ్యాన్ బోగీ మధ్య కప్లింగ్‌ను జత చేస్తుండగా.. లోకో పైలట్ ఒక్కసారిగా రైలు ఇంజిన్‌ను వెనక్కి పోనిచ్చాడు. దీంతో అరుణ్ కుమార్.. రైలు ఇంజిన్, బోగీ మధ్య చిక్కుకొని నలిగిపోయి అక్కడికక్కడే మృతి చెందాడు.

ప్లాట్‌ఫామ్‌పై ఉన్న ప్రయాణికులు పెద్దగా కేకలు వేశారు. లోకో పైలట్‌ జరిగిన ప్రమాదాన్ని గమనించి ఇంజిన్‌ను ముందుకు నడిపే ప్రయత్నం కూడా అలాగే వదిలేసి.. ఇంజిన్‌ దిగి అక్కడి నుంచి పారిపోయాడు. అరుణ్ కుమార్ విలవిల్లాడుతూ క్షణాల వ్యవధిలో ప్రాణాలు విడిచాడు. ఈ హృదయవిదారకర ఘటనకు సంబంధించిన దృశ్యాలను కొంత మంది ప్రయాణికులు తమ సెల్ ఫోన్లలో చిత్రీకరించారు. ఆ వీడియోలు సోషల్ మీడియాలో వైరల్ అవుతున్నాయి.

లోకో పైలట్ నిర్లక్ష్యంగా ఇంజిన్‌‌ను రివర్స్‌ నడపడం వల్లే ఈ విషాదం చోటు చేసుకుందని ప్రత్యక్ష సాక్షులు తెలిపారు. ఈ ఘటనపై విచారణకు ఆదేశించినట్లు రైల్వే అధికారులు తెలిపారు. రైలు ఇంజిన్ ముందుకు పోనిచ్చి.. అరుణ్ కుమార్ మృతదేహాన్ని బయటకి తీసుకొచ్చారు. అనంతరం రైల్వే పోలీసులు పోస్టుమార్టం నిమిత్తం ఆస్పత్రికి తరలించారు. శనివారం (నవంబర్ 9) ఉదయం లక్నో - బరౌనీ ఎక్స్‌ప్రెస్‌ రైలు బరౌనీ స్టేషన్‌లోని ప్లాట్‌ఫామ్‌ నం.5కు చేరుకున్న సమయంలో ఈ ఘటన జరిగింది.

పట్టాలు తప్పిన షాలిమార్ ఎక్స్‌ప్రెస్

రైల్వే ప్రమాదాలు ఆందోళన కలిగిస్తుండగా.. సికింద్రాబాద్ - షాలిమార్ ఎక్స్‌ప్రెస్ పట్టాలు తప్పింది. మూడు బోగీలు పట్టాలు తప్పాయి. అకస్మాత్తుగా బ్రేక్ వేయడంతో పలువురు ప్రయాణికులు గాయపడ్డారు. పశ్చిమ బెంగాల్‌లోని నల్పూర్‌లో శనివారం (నవంబర్ 9) ఉదయం 5.30 గంటల సమయంలో ఈ ఘటన చోటు చేసుకుంది. రైల్వే పోలీసులు, సిబ్బంది హుటాహుటిన సహాయక చర్యలు ప్రారంభించారు.

ఈ ఘటనలో గాయపడ్డ ప్రయాణికులను సమీపంలోని ఆస్పత్రికి తరలించారు. షాలిమార్ సూపర్ ఫాస్ట్ ఎక్స్‌ప్రెస్ రైలు సికింద్రాబాద్ నుంచి షాలిమార్ వెళ్తుండగా ఈ ప్రమాదం జరిగింది. ఎలాంటి ప్రాణ నష్టం జరగకపోవడంతో అధికారులు ఊపిరి పీల్చుకున్నారు. ఈ ప్రమాదం కారణంగా పలు రైళ్లు ఆలస్యంగా నడిచాయి. సిబ్బంది ట్రాక్‌ను క్లియర్ చేసి రైళ్ల రాకపోకలను పునరుద్ధరించారు.