అందాల పోటీల్లో భారత్‌కు మరో కిరీటం.. మిస్ టీన్ యూనివర్స్ 2024గా తృష్ణ రే
national | Suryaa Desk | Published : Tue, Nov 12, 2024, 10:14 PM
అంతర్జాతీయ అందాల పోటీల్లో మరోసారి భారతీయ అందం మెరిసింది. దక్షిణాఫ్రికాలోని కింబర్లీలో జరిగిన మిస్ టీన్ యూనివర్స్ 2024 పోటీల్లో భారతీయ విద్యార్ధిని కిరీటం సొంతం చేసింది. ఈ పోటీల్లో భారత్ అమ్మాయి విజేతగా నిలవడం ఇదే మొదటిసారి. నవంబరు 1 నుంచి 9 వరకు జరిగిన ఈ అందాల్లో పోటీల్లో ఒడిశాకు చెందిన తృష్ణ రే విజేతగా నిలిచారని నిర్వాహకులు అధికారిక ఇన్‌స్టాగ్రామ్‌లో పోస్ట్ చేశారు. ఒడిశా రాజధాని భువనేశ్వర్‌లోని కళింగ ఇన్‌స్టిట్యూట్ ఆఫ్ ఇన్ఫర్మేషన్ టెక్నాలజీ యూనివర్సిటీ (KIIT University)లో త్రిష ఫ్యాషన్ టెక్నాలజీ చదువుతున్నారు.
కింబర్లీలో నవంబరు 1 నుంచి 9 తేదీ వరకూ జరిగిన ఈ పోటీల్లో త్రిష రే సహా 10 మంది ఫైనల్‌కు అర్హత సాధించారు. పెరూ, నమీబియా, దక్షిణాఫ్రికా, బ్రెజిల్, కెన్యా, పోర్చుగల్, నెదర్లాండ్స్‌ సహా పది దేశాల యువతులను ఓడించి.. తృష్ణ రే విజేతగా నిలిచింది. ఈ పోటీల్లో పెరూ టీనేజర్ అన్నే థోర్సేన్, నమీబియాకు చెందిన ప్రీసియస్ ఆండ్రేల నుంచి త్రిషకు గట్టిపోటీ ఎదురయ్యింది. కానీ, చివరకు విజేతగా నిలవడంతో... వారు ఇద్దరూ మొదటి, రెండో రన్నరప్‌ స్థానాలకు పరిమితమయ్యారు.
ఒడిశా మీడియా ప్రకారం.. తృష్ణ రే తండ్రి ఇండియన్ ఆర్మీ అధికారి కల్నల్ దిలీప్ కుమార్ రే, తల్లి రాజశ్రీ రే. తమ విద్యార్ధిని అంతర్జాతీయస్థాయి అందాల్లో పోటీల్లో రాణించడంపై కైఐఐటీ యూనివర్సిటీ వ్యవస్థాపకులు డాక్టర్ అచ్చుత్ సమంతా హర్షం వ్యక్తం చేశారు. ఇక, సోషల్ మీడియాలోనూ ఆమెకు అభినందనలు వెల్లువెత్తుతున్నాయి. ‘ఇది నీ టైమ్’ అంటూ ఒకరు.. ‘భారత్ ప్రకాశించింది.. భారతదేశం గెలిచింది.. దేశానికి ఇంతటి గౌరవం తెచ్చినందుకు తృష్ణ రేకు ధన్యవాదాలు’ అని మరొకరు... ‘మన దగ్గర ఇప్పుడు బంగారు, గులాబీ కిరీటాలు ఉన్నాయి.. ఇది ఎంతో గొప్ప సంవత్సరం.. ఈ పోటీల్లో కీరిటాన్ని భారత్ మొదటిసారి గెలిచింది.. ’ అని ఇంకొకరు పోస్ట్ చేశారు
గతేడాది ఏప్రిల్ 13న జరిగిన మిస్ టీన్ యూనివర్సిటీ ఇండియా పోటీల్లో రే విజేతగా నిలిచి.. భారత్ తరఫున తాజా పోటీల్లో పాల్గొనేందుకు అర్హత సాధించారు. అయితే, ఈ విజయం ఆమెకు ప్రత్యేకమైందని ఎందుకంటే వీసా ఇబ్బందుల వల్ల కొలంబియా, డొమినిక్ రిపబ్లిక్‌లో జరిగిన పోటీల్లో పాల్గొనలేకపోయిందని కైఐఐటీ యూనివర్సిటీ అధికారిక వెబ్‌సైట్‌లో తెలిపింది. ఇది ఆమె పట్టుదలకు నిదర్శనమని, ఈ విజయం ఒడిశా, భారత్ రెండింటినీ ఎంతో గర్వించేలా చేసిందని కొనియాడింది.
|
|