అసెంబ్లీ, మండలిలో చీఫ్ విప్, విప్‌లు వీరే. జనసేనకు ఎన్నంటే.. లక్కీ ఛాన్స్ ఆయనకే!

శాసనసభ, శాసనమండలిలో చీఫ్‌ విప్‌, విప్‌లను ఆంధ్రప్రదేశ్ ప్రభుత్వం నియమించింది. సీఎం చంద్రబాబు ఈ విషయంలో గత కొన్నిరోజులుగా కసరత్తు చేస్తున్నారు. చివరకు మంగళవారం ఖరారు చేయగా.. అధికారులు ప్రకటించారు. ఏపీ శాసనసభ చీఫ్ విప్‌గా వినుకొండ టీడీపీ ఎమ్మెల్యే జీవీ ఆంజనేయులుకు అవకాశం ఇచ్చారు. అలాగే 15 మందిని అసెంబ్లీలో విప్‌లుగా నియమించారు. ఇందులో జనసేన పార్టీకి చెందిన ముగ్గురు ఎమ్మెల్యేలు, ఒక బీజేపీ ఎమ్మెల్యేకు అవకాశం దక్కింది. ఇక మండలి విషయానికి వస్తే శాసననమండలి చీఫ్ విప్‌గా టీడీపీ ఎమ్మెల్సీ పంచుమర్తి అనురాధను నియమించారు. అలాగే మండలిలో ముగ్గురు విప్‌లను నియమించారు.

ఆంధ్రప్రదేశ్ అసెంబ్లీలో విప్‌లుగా.. బీజేపీకి చెందిన జమ్మలమడుగు ఎమ్మెల్య ఆదినారాయణ రెడ్డికి అవకాశం ఇచ్చారు. అలాగే జనసేన నుంచి కోడూరు ఎమ్మెల్యే అరవ శ్రీధర్, తాడేపల్లి గూడెం ఎమ్మెల్యే బొలిశెట్టి శ్రీనివాస్, నరసాపురం ఎమ్మెల్యే బొమ్మిడి నాయకర్‌ను విప్‌లుగా నియమించారు. తెలుగుదేశం పార్టీ నుంచి ఇచ్ఛాపురం ఎమ్మెల్యే బెందాళం అశోక్, విజయవాడ సెంట్రల్ ఎమ్మెల్యే బొండా ఉమా, తుని ఎమ్మెల్యే యనమల దివ్య, ముమ్మిడివరం శాసనసభ్యుడు దాట్ల సుబ్బరాజు, గంగాధర నెల్లూరు ఎమ్మెల్యే థామస్, కురుపాం ఎమ్మెల్యే జగదీశ్వరి, రాయదుర్గం శాసనసభ్యులు కాలవ శ్రీనివాసులు, కడప ఎమ్మెల్యే రెడ్డెప్పగారి మాధవి, విశాఖపట్నం పశ్చిమ ఎమ్మెల్యే పీజీవీఆర్ నాయుడు, నందిగామ ఎమ్మెల్యే తంగిరాల సౌమ్య, గన్నవరం శాసనసభ్యుడు యార్లగడ్డ వెంకట్రావులను అసెంబ్లీలో విప్‌లుగా నియమించారు.

మరోవైపు శాసనమండలిలలోనూ విప్‌ల నియామకం జరిగింది. శాసనమండలి చీఫ్ విప్‌గా పంచుమర్తి అనురాధను నియమించారు. అలాగే విప్‌లుగా టీడీపీ ఎమ్మెల్సీలు కంచర్ల శ్రీకాంత్, వేపాడ చిరంజీవి రావు, జనసేన ఎమ్మెల్సీ హరిప్రసాద్‌లను నియమించారు. మరోవైపు కీలకమైన ఏపీ శాసనసభ డిప్యూటీ స్పీకర్‌ పదవిని మాత్రం భర్తీ చేయలేదు. డిప్యూటీ స్పీకర్‌గా రాయదుర్గం ఎమ్మెల్యే కాలువ శ్రీనివాసులను నియమిస్తారనే ప్రచారం జరిగింది. అయితే తాజాగా ఆయనను విప్‌గా నియమించడంతో.. ఈ పదవిని మరెవరికైనా కేటాయిస్తారా అనేది చూడాల్సి ఉంది. ఈ నేపథ్యంలో ఉండి ఎమ్మెల్యే రఘురామకృష్ణరాజు పేరు తెరపైకి వచ్చింది.