యూట్యూబ్ చూసి, ఏకంగా ఎలా తయారు చేశారు?

మనకు ఏదైనా తెలియని విషయం ఉంటే.. వెంటనే సెల్‌ఫోన్ తీసి.. సెర్చ్ చేసి చూస్తాం. ఇక చాలా మంది యూట్యూబ్‌లో వీడియోలు చూసి రకరకాల కొత్త విషయాలను తెలుసుకుంటూ ఉంటారు. అయితే సోషల్ మీడియా వాడకం రెండు వైపులా పదును ఉన్న కత్తి లాంటిది అని తెలిసిందే. మంచి కోసం అయినా ఉపయోగించుకోవచ్చు.. చెడు కోసం ఉపయోగించుకోవచ్చు. దాన్ని ఎవరు ఎలా ఉపయోగిస్తున్నారు అనేదే ముఖ్యం. అయితే చాలా మంది చదువులు, కోర్సులు, విజ్ఞానం పెంచుకునేందుకు యూట్యూబ్‌ను ఉపయోగిస్తుంటే.. మరికొందరు మాత్రం చెడు పనులకు, అక్రమ మార్గాల కోసం వాడుతున్నారు. ఇలాగే కొంతమంది యూట్యూబ్‌లో వీడియోలు చూసి నకిలీ నోట్లు తయారు చేయడం నేర్చుకున్నారు. ఈ క్రమంలోనే ఏకంగా ఫేక్ నోట్ల రాకెట్‌ను నడుపుతున్నారు. చివరికి పోలీసులు పట్టుకోవడంతో వారి బండారం బయటపడింది.

ఉత్తర్‌ప్రదేశ్‌లోని సోన్‌భద్ర జిల్లాలో ఈ నకిలో నోట్ల తయారీ ముఠా గుట్టును పోలీసులు రట్టుచేశారు. యూట్యూబ్ చూసి నేరగాళ్లు కొత్త రకం మోసాలకు పాల్పడుతున్నట్లు పోలీసులు గుర్తించారు. యూట్యూబ్ చూసి ఏకంగా కొందరు వ్యక్తులు రూ.500 నోట్లను ముద్రించారు. ఈ నేపథ్యంలోనే ఇద్దరు వ్యక్తులతో పాటు రూ.30 వేల విలువైన ఫేక్ కరెన్సీని పట్టుకున్నారు. నిందితులు ఇద్దర్ని సతీష్ రాయ్, ప్రమోద్ మిశ్రాగా గుర్తించారు. వీరు నకిలీ నోట్లను తయారు చేసేందుకు రూ.10 స్టాంప్ పేపర్లను ఉపయోగిస్తున్నట్లు గుర్తించారు.

ఈ రూ.10 స్టాంప్ పేపర్‌పై నకిలీ రూ.500 నోట్లను కంప్యూటర్ ద్వారా ప్రింటింగ్‌ చేసినట్లు పోలీసుల విచారణలో వెల్లడైంది. ఇందుకోసం వారు మీర్జాపూర్ నుంచి స్టాంప్ పేపర్లను కొనుగోలు చేసినట్లు తెలిపారు. అయితే వారు తయారు చేసన నకిలీ నోట్లు అన్నింటికీ ఒకే సీరియల్ నెంబర్ ఉన్నట్లు పోలీసులు వెల్లడించారు. వీరు తయారు చేసిన రూ.10 వేల నకిలీ కరెన్సీని ఖర్చు చేస్తుండగా.. అరెస్ట్ చేసినట్లు పోలీసులు చెప్పారు.

వారిని అరెస్ట్ చేసి చేసిన సోదాల్లో రూ.500 కరెన్సీకి సంబంధించి 20 నకిలీ నోట్లను గుర్తించినట్లు పోలీసులు వెల్లడించారు. అయితే ఆ నోట్లను క్షుణ్ణంగా పరిశీలిస్తే తప్ప.. అవి నిజమైనవి కావని ఎవరూ గుర్తించలేరని ఏఎస్పీ కలు సింగ్ తెలిపారు. మినరల్ వాటర్ యాడ్స్ తయారు చేసే వ్యక్తులు.. యూట్యూబ్‌లో చూసి నకిలీ నోట్లను తయారు చేయడం నేర్చుకున్నట్లు పోలీసులు గుర్తించారు. ఇద్దరు నిందితులను అరెస్ట్ చేసిన పోలీసులు.. వారి నుంచి నకిలీ కరెన్సీ నోట్లతో పాటు ఆల్టో కారు, నోట్ల ప్రింటింగ్ మిషీన్లు, ల్యాప్‌టాప్, ప్రింటర్, 27 స్టాంప్ పేపర్లను స్వాధీనం చేసుకున్నారు.