అలాంటప్పుడు అసెంబ్లీకి ఎందుకు వెళ్ళాలి
Andhra Pradesh Telugu | Suryaa Desk | Published : Wed, Nov 13, 2024, 04:22 PM
వైయ‌స్ఆర్‌సీపీ అధ్యక్షులు, మాజీ ముఖ్యమంత్రి వైయ‌స్‌ జగన్‌మోహన్‌రెడ్డి ఇవాళ మధ్యాహ్నాం మీడియా స‌మావేశంలో మాట్లాడ‌నున్నారు. కూటమి ప్రభుత్వం తాజాగా ప్రవేశపెట్టిన రాష్ట్ర బడ్జెట్‌పై ఆయన స్పందించనున్నారు. ఈ విషయాన్ని వైయ‌స్ఆర్‌సీపీ కేంద్ర కార్యాలయం ఒక ప్రకటనలో తెలిపింది. చంద్రబాబు నేతృత్వంలోని కూటమి ప్రభుత్వం రూ.2.94 లక్షల కోట్లతో వార్షిక బడ్జెట్‌ను ప్రవేశపెట్టింది. అయితే సూపర్‌ సిక్స్‌ హామీల ఎగవేత, సంక్షేమ లబ్ధిదారులను తగ్గించే లక్ష్యంతో బడ్జెట్‌ గణాంకాలు ఉన్నాయని.. వెరసి ఈ బడ్జెట్‌తో అన్ని వర్గాలను చంద్రబాబు మోసం చేశారని వైయ‌స్ఆర్‌సీపీ నేతలు మండిపడుతున్నారు. మరోవైపు.. వైయ‌స్ఆర్‌సీపీని ప్రధాన ప్రతిపక్షంగా గుర్తించకపోగా.. ప్రభుత్వాన్ని ప్రశ్నించడం, కనీసం ప్రజా సమస్యలను ప్రస్తావించేందుకు కూడా స్పీకర్‌ మైక్‌ ఇవ్వని పరిస్థితిలో ఉన్నారని, అలాంటప్పుడు అసెంబ్లీకి ఎందుకు వెళ్లాలని జగన్ అసంతృప్తి వ్యక్తం చేశారు. ఏపీ బడ్జెట్‌ సమావేశాలను బహిష్కరించినవైయ‌స్ఆర్‌సీపీ అధినేత, ఇక నుంచి మీడియా ద్వారానే చంద్రబాబు ప్రభుత్వాన్ని నిలదీస్తానని ప్రకటించారు. చెప్పినట్లుగా బడ్జెట్‌పై ఇవాళ ఆయన పలు ప్రశ్నలు సంధించే అవకాశం ఉంది.
|
|