ఏపీ రైతుల అకౌంట్‌లలో డబ్బులు జమ.. మంత్రి అచ్చెన్నాయుడు

ఆంధ్రప్రదేశ్‌‌లో రైతులకు వ్యవసాయశాఖ మంత్రి అచ్చెన్నాయుడు తీపికబురు చెప్పారు. వర్షాభావం కారణంగా పలు జిల్లాల్లో 1.06 లక్షల హెక్టార్లలో పంట నాశనమైందని.. ఇప్పటికే 54 కరువు మండలాలను ప్రకటించిన విషయాన్ని గుర్తు చేశారు. రాష్ట్రవ్యాప్తంగా 1.44 లక్షల మంది రైతులు పంట నష్టపోగా.. వారికి పరిహారంగా రూ.159.2 కోట్లను మంజూరు చేశామని చెప్పారు. త్వరలోనే రైతుల ఖాతాల్లో ఆ మొత్తాన్ని జమ చేస్తామని.. నష్టపోయిన వారికి రాయితీ 47వేల క్వింటాళ్ల విత్తనాలు పంపిణీ చేసినట్లు తెలిపారు.

ఖరీఫ్‌లో వర్షాభావం వల్ల పలు మండలాల్లో పంట జరిగిందని.. అక్టోబర్ 29న 54 మండలాలను కరవు మండలాలుగా ప్రకటించిన విషయాన్ని గుర్తు చేశారు. అన్నమయ్య, చిత్తూరు, సత్యసాయి, అనంతపురం, కర్నూలు జిల్లాల్లో కరవు ఉందన్నారు. బుడమేరు బాధిత రైతులకు 20 రోజుల్లోనే రూ.320 కోట్లు ఇచ్చామని.. శాటిలైట్ సిస్టంతో వర్షపాతం నమోదు చేస్తున్నామన్నారు. రూ.8 కోట్లతో ప్రతి మండలంలో రెయిన్ గేజ్‌లు ఏర్పాటు చేశామన్నారు మంత్రి.

మరోవైపు జీడిమామిడి మద్దతు ధర ప్రకటించడానికి తమ వంతగా కృషి చేస్తున్నామన్నారు మంత్రి అచ్చెన్నాయుడు. జీడిమామిడి మద్దతు ధర కోసం కేంద్రానికి లేఖ రాశానని.. జీడిమామిడి పండుకు చాలా విలువ ఉంది అన్నారు. బైప్రోడక్టుగా చాలా ఆదాయం వస్తుందని.. జీడిమామిడి బోర్డు ఆంధ్రప్రదేశ్‌లో ఏర్పాటు కావాలని.. ముఖ్యమంత్రి, కేంద్రమంత్రి దృష్టికి ఈవిషయాన్ని తీసుకెళ్లామన్నారు. శ్రీకాకుళంలో జీడిమామిడి బోర్డు పెడతామని చెప్పారు. గత ఐదేళ్ళలో కొబ్బరి చెట్ల కోసం ఒక్క పైసా కూడా ఖర్చు చేయలేదని.. తాము కొత్త చెట్లు అందజేస్తామని ప్రకటించారు. ఉద్ధానం ప్రాంతంలో ఒక కోకోనట్ పార్కు కావాలని అడిగారని.. ఆ అంశాన్ని పరిశీలిస్తామన్నారు. వ్యవసాయాన్ని లాభసాటిగా తయారు చేస్తామన్నారు మంత్రి అచ్చెన్నాయుడు.

ఆంధ్రప్రదేశ్ ప్రభుత్వం ఇటీవల వ్యవసాయ బడ్జెట్‌ను ప్రవేశపెట్టిన సంగతి తెలిసిందే. ఈ మేరకు అసెంబ్లీలో మంత్రి అచ్చెన్నాయుడు కీలక ప్రకటన చేశారు. రాష్ట్రంలో విపత్తుల సమయంలో పంట నష్టానికి ఇచ్చే పెట్టుబడి సాయాన్ని పెంచినట్లు తెలిపారు. గతంలో హెక్టారుకు రూ.17 వేలు పంట నష్టం కింద పెట్టుబడి సాయంగా అందించారన్నారు. ఇప్పుడు ఆ మొత్తాన్ని రూ.25 వేలకు పెంచామని.. ప్రత్యేక ప్యాకేజీ అమలు చేశామని తెలిపారు. మరోవైపు రాష్ట్రంలోని 21 జిల్లాల్లో పంట నష్టపోయిన 1.90 లక్షల మంది రైతులకు.. ఈ-పంట ద్వారా రూ.284.56 కోట్లు జమ చేసినట్లు ప్రకటించారు. 2024 జులైలో భారీ వర్షాలు, వరదల కారణంగా నాలుగు జిల్లాల్లో పంట నష్టం జరిగిందని.. 23,259 మంది రైతులకు రూ.25.75 కోట్ల పెట్టుబడి రాయితీని త్వరలో అందజేస్తామని ప్రకటించారు.