సైబర్ నేరాలతో తస్మాత్ జాగ్రత్త
Andhra Pradesh Telugu | Suryaa Desk | Published : Sat, Nov 16, 2024, 06:08 PM
టెక్నాలజీని ఆసరాగా చేసుకుని సైబర్ కేటుగాళ్లు మరింత రెచ్చిపోతున్నారు. వివిధ మార్గాల్లో అమాయక ప్రజలను బురిడి కొట్టించి కోట్ల రూపాయలు కొల్లగొడుతున్నారు. సైబర్ నేరాల కట్టడికి పోలీసు అధికారులు తీవ్రంగా కృషి చేస్తుండటంతో సైబర్ నేరగాళ్లు మాత్రం కొత్త కొత్త పంథాలు వెతుక్కుంటున్నారు. ఇందులో భాగంగానే మరో కొత్త ప్రయత్నం మొదలుపెట్టారు.ఇటీవల కాలంలో డిజిటల్‌ ఆహ్వాన పత్రికలు, వీడియోలు, వేడుక జరిగే ప్రాంతాన్ని సూచించే గూగుల్‌ మ్యాప్స్‌ లింక్‌‌ను వాట్సాప్, ఫేస్‌బుక్, ఇన్‌స్టాగ్రామ్‌ ద్వారా డాక్యుమెంట్లు, వీడియోలు, లింకులు పంపుతున్నారు. దీనినే అదునుగా తీసుకున్న సైబర్ నేరగాళ్లు మన ఫోన్లకు కూడా లింకులు పంపుతున్నారు.. అయితే వాటిని ఎవరు పంపారన్న ఆసక్తితో మనం క్లిక్‌ చేస్తాం.దీంతో మన ప్రమేయం లేకుండానే ఫోన్‌లోకి ఏపీకే ఫైల్‌ రూపంలో ఉండే యాప్‌ డౌన్‌లోడ్‌ అవుతాయి.
వీటి ద్వారా మన గ్యాలరీ, యాప్‌లలోని డేటా సహా అన్ని రకాల అనుమతులను ఈ మాల్‌వేర్‌ దానంతట అదే హ్యాక్ చేస్తుంది. ఆహ్వాన పత్రిక, వీడియో అని భావించి డౌన్‌లోడ్‌ చేస్తే హ్యాకింగ్‌కు సంబంధించిన యాప్స్ ఇన్‌స్టాల్‌ అయి ఫోన్‌ సైబర్ కేటుగాళ్ల చేతుల్లోకి వెళ్తుంది. ఆ తర్వాత మన అకౌంట్లలోని డబ్బులు సైబర్ నేరస్తులు ఖాళీ చేస్తారు. ఫోన్‌లోని వ్యక్తిగత ఫొటోలు, సేకరించి బెదిరింపులకు పాల్పడటం వంటివి కూడా చేస్తుంటారు.
|
|