ఆంధ్రప్రదేశ్ నుంచి శబరిమలకు ప్రత్యేక రైలు.. ఈ రూట్‌లోనే, ఆగే స్టేషన్‌లు ఇవే!

ఆంధ్రప్రదేశ్‌లో శబరిమల వెళ్లే అయ్యప్ప భక్తులకు రైల్వేశాఖ తీపికబురు చెప్పింది. మచిలీపట్నం-కొల్లాం మధ్య ప్రత్యేక రైలు నడపనున్నట్లు అధికారులు ఒక ప్రకటనలో తెలియజేశారు. ఈ నెల 18, 25 తేదీల్లో ఈ ప్రత్యేక రైలు (07145).. మచిలీపట్నంలో మధ్యాహ్నం 3.15 గంటలకు బయలుదేరి మరుసటి రోజు రాత్రి 9.20 గంటలకు కొల్లాం చేరుకుంటుంది. ఈ రైలు (07146) తిరుగు ప్రయాణంలో ఈ నెల 20, 27 తేదీల్లో కొల్లాంలో అర్ధరాత్రి 2.30 గంటలకు బయలుదేరి.. ఈ నెల 21, 28 తేదీల్లో ఉదయం 7గంటలకు మచిలీపట్నం చేరుకుంటుంది.

ఈ ప్రత్యేక రైలు పెడన, గుడివాడ, విజయవాడ, న్యూ గుంటూరు, తెనాలి, బాపట్ల, చీరాల, ఒంగోలు, సింగరాయకొండ, కావలి, నెల్లూరు, గూడూరు, రేణిగుంట, కాట్పాడి, జోలార్‌పేట, సేలం, ఈరోడ్, తిరుప్పూర్, కొయంబత్తూర్, త్రిశూర్, ఎర్నాకుళం, కొట్టాయం, చెంగనూరు స్టేషన్లలో ఆగుతుందని అధికారులు తెలిపారు. రైలు ప్రయాణికులు ఈ విషయాన్ని గమనించి టికెట్లు బుక్ చేసుకోవాలని సూచిస్తున్నారు అధికారులు.

మరోవైపు ఈ నెల 22, 29 తేదీలలో ప్రత్యేక రైళ్లు (07143, 07144) మౌలాలి (హైదరాబాద్)లో ఉదయం 11.30 గంటలకు బయలుదేరి చర్లపల్లి, జనగామ్‌, మహబూబాబాద్‌, డోర్నకల్లు, ఖమ్మం, విజయవాడ, తెనాలి, గూడూరు, డోర్నకల్, ఖమ్మం, విజయవాడ, తెనాలి, చీరాల, ఒంగోలు, నెల్లూరు, రేణిగుంట, కాట్పాడి, జోలార్‌పేట, తిరుపూరు, కోయంబత్తూరు, త్రిసూర్‌, అలువ, ఎర్నాకులంటౌన్‌, ఎట్టుమనూర్‌, కొట్టాయం, చెంగనచ్చేరి, తిరువళ్ల, చెంగనూరుల మీదుగా కయన్‌కుళ్లంకు మరుసటి రోజు రాత్రి 7 గంటలకు వెళుతుంది. తిరుగు ప్రయాణంలో ఈనెల 24, డిసెంబరు ఒకటో తేదీ కొల్లంలో అర్ధరాత్రి 2.30 గంటలకు బయలుదేరి మరుసటి రోజు రాత్రికి మౌలాలీ చేరుకుంటుంది.

శబరిమల వెళ్లే భక్తులకు శుభవార్త.. దర్శన అనుభవాన్ని మరింత మెరుగుపరచడానికి.. కేరళలోని పథనంథిట్ట జిల్లా అధికారులు చర్యలు తీసుకుంటున్నారు. ఈ మేరకు ముత్తూట్‌ గ్రూప్‌తో కలిసి అత్యాధునిక డిజిటల్‌ అసిస్టెంట్‌ ‘స్వామి’ ఏఐ చాట్‌బాట్‌ను అందుబాటులోకి తీసుకొచ్చారు. శబరిమలకు వచ్చే భక్తుల సందేహాలకు సమాధానాలు, సమగ్ర సమాచారం అందించేందుకు, భద్రత అందించేందుకు ఈ చాట్‌బాట్‌ను తీసుకొచ్చారు. శబరిమల ఆలయం తెరిచే సమయం, ప్రసాదం, పూజ సమయాలు వంటి సమాచారాన్ని ఇంగ్లీష్, హిందీ, తెలుగు, తమిళం, కన్నడ, మలయాళం భాషల్లో ఈ చాట్‌బాట్‌ అందిస్తుంది. అలాగే దగ్గర్లో ఉన్న దేవాలయాలు, ఎయిర్‌పోర్టులు, రైల్వే స్టేషన్లు, బస్‌స్టాప్‌ల వివరాలు కూడా అందిస్తారు. ఈ చాట్‌బాట్ శబరిమలకు వచ్చే భక్తులకు ఎంతో సౌకర్యంగా ఉంటుందని చెబుతున్నారు అధికారులు. అంతేకాదు మండల-మకరవిళక్కు సీజనులో భాగంగా కేరళలోని శబరిమల ఆలయం తెరచుకుంది. శనివారం తెల్లవారుజాము నుంచి భక్తుల దర్శనాలకు అనుమతిస్తున్నారు. భక్తుల రద్దీని దృష్టిలో ఉంచుకొని ఈ సీజన్‌లో దర్శన సమయాలను పొడిగించినట్లు ట్రావెన్‌కోర్‌ దేవస్థానం బోర్డు తెలియజేసింది.