నెహ్రూ కారు తెచ్చిన తంటా.. విడాకుల కోసం సుప్రీంకోర్టుకెక్కిన జంట

భార్యాభర్తల మధ్య గొడవలు సహజం. ఈ గొడవలు మితిమీరిపోతే ఇక విడిపోవడమే శరణ్యం అని.. విడాకుల కోసం కోర్టులను ఆశ్రయిస్తూ ఉంటారు. అయితే దంపతుల మధ్య గొడవలకు రకరకాల కారణాలు ఉంటాయి. డబ్బు, నగలు, ఆస్తులు.. ఇలా రకరకాల విషయాలు విడాకులకు దారితీస్తూ ఉంటాయి. ఈ క్రమంలోనే తాజాగా సుప్రీంకోర్టుకు ఎక్కిన ఓ జంటకు సంబంధించిన విషయం ఇప్పుడు హాట్ టాపిక్‌గా మారింది. ఎందుకంటే వారిద్దరి మధ్య గొడవకు ప్రధాన కారణం దేశ తొలి ప్రధాని జవహర్‌లాల్‌ నెహ్రూకు సంబంధించిన రోల్స్ రాయిస్ కారు. ఆ కారును, ఖరీదైన ఫ్లాట్‌ను కట్నం కింద తీసుకురావాలని భర్త, అత్తింటివారు తనను వేధింపులకు గురి చేస్తున్నారని.. ఓ మహిళ సుప్రీంకోర్టును ఆశ్రయించింది.

మధ్యప్రదేశ్‌ గ్వాలియర్‌కు చెందిన ఓ మహిళ.. తన తండ్రికి వారసత్వంగా వచ్చిన పురాతన రోల్స్ రాయిస్ కారును, ముంబైలో ఉన్న కోట్ల విలువైన ఫ్లాటును కట్నం కింద తీసుకురావాలని తన భర్త, మామ వేధిస్తున్నారని ఆరోపిస్తూ ఓ మహిళ మధ్యప్రదేశ్‌ హైకోర్టు పరిధిలోని గ్వాలియర్‌ బెంచ్ ముందు పిటిషన్ దాఖలు చేసింది. అయితే అక్కడ ఆమెకు అక్కడ అనుకూలమైన తీర్పు రాలేదు. దీంతో సుప్రీంకోర్టును ఆశ్రయించింది. ఈ పిటిషన్‌పై విచారణ జరిపిన జస్టిస్‌ సూర్యకాంత్, జస్టిస్‌ ఉజ్జల్‌ భుయాన్‌ ధర్మాసనం.. భార్యాభర్తల మధ్య చెలరేగిన ఈ వివాదాన్ని మధ్యవర్తి ద్వారా సామరస్యంగా పరిష్కరించుకోవాలని సూచించింది. ఇందుకోసం సీనియర్‌ లాయర్, కేరళ హైకోర్టు మాజీ జడ్జి ఆర్‌.బసంత్‌ను మధ్యవర్తిగా నియమించింది. దీనిపై తదుపరి విచారణను డిసెంబరు 18వ తేదీకి సుప్రీంకోర్టు వాయిదా వేసింది.

ఇక గ్వాలియర్‌కు చెందిన ఆ మహిళ.. తాను బరోడా మహారాజ కుటుంబానికి చెందిన వ్యక్తిగా పేర్కొంది. అయితే ఆమె భర్త మాత్రం తమది నిజమైన పెళ్లి కాదని ఆరోపించారు. అంతేకాకుండా ఆమెకు గ్రహ దోషం ఉందని.. ఆ దోషం పోవడం కోసం 2018లో ఉత్తరాఖండ్‌లోని రిషికేష్‌లో తాము పెళ్లి చేసున్నామని చెబుతున్నారు. ఆ తర్వాత ఒక్క రోజు కూడా తాము కాపురం చేయలేదని పేర్కొన్నారు. వివాహ ధ్రువపత్రం కోసం ఆ మహిళ తల్లిదండ్రులు, ఆమె బంధువులు ఫోర్జరీకి పాల్పడ్డారని ఆరోపిస్తున్నారు. అయితే ఖరీదైన కారును కట్నంగా ఇవ్వాలని తాము డిమాండ్‌ చేయడం లేదని పేర్కొన్నారు.

అయితే ఆ కారు.. మాజీ ప్రధాని జవహర్ లాల్ నెహ్రూ.. సుమారు 73 ఏళ్ల క్రితం బరోడా మహారాణి చిమ్నా బాయ్‌ సాహెబ్‌ గైక్వాడ్‌ కోసం ప్రత్యేకంగా తయారు చేయించారు. ఇప్పుడు ఆ రోల్స్‌ రాయిస్‌ కారే ఆ ఇద్దరు దంపతుల మధ్య వైవాహిక వివాదానికి కారణం అయింది. తాజాగా ఆ కేసు ఇటీవల సుప్రీంకోర్టు ముందుకు రావడంతో వైరల్ అవుతోంది. 1951 మోడల్‌కు చెందిన క్లాసిక్‌ రోల్స్‌ రాయిస్‌ కారు విలువ ప్రస్తుతం రూ2.5 కోట్లకు పైగానే ఉంటుందని అంచనా.