కాటేయకుండానే ఇద్దరి ప్రాణాలు తీసిన పాము.. పగబట్టిందా?

శ్రీకాకుళం జిల్లాలో విషాదకర ఘటన చోటుచేసుకుంది. కార్తీక పౌర్ణమి రోజు వారి కుటుంబాల్లో కాళరాత్రిగా మారిపోయింది. రెండు కుటుంబాల్లో పెను విషాదం నింపింది. వివరాల్లోకి వెళ్తే.. శ్రీకాకుళం జిల్లా పొందూరు మండలం కనిమెట్ట గ్రామంలో శుక్రవారం రాత్రి విషాదం చోటుచేసుకుంది. కనిమెట్ట గ్రామానికి చెందిన రఘుపతి మధుసూదన్ రావు అనే వ్యక్తి ఇంట్లోకి శుక్రవారం రాత్రి పాము ప్రవేశించింది. పామును చూసి కుటుంబసభ్యులు భయపడిపోయారు. కంగారుతో కేకలు వేశారు. ఇంటి యజమాని మధుసూదన్ రావు పామును చంపే ప్రయత్నం చేశారు. దగ్గర్లో ఉన్న కర్ర సాయంతో పాముపై దాడి చేశారు. అయితే మధుసూదన్ రావు దాడిచేయడంతో గాయపడిన పాము.. ఇంటి దగ్గరలోనే బావిలో పడిపోయింది.

పాము బావిలో పడటంతో బావిలో ఉన్న నీటిని తోడేయించాలని కుటుంబసభ్యులు నిర్ణయించుకున్నారు. శనివారం ఉదయం ఇంజన్ సాయంతో నీళ్లను బయటకు తోడిస్తున్నారు. అయితే ఈ క్రమంలోనే నీటిని తోడుతున్న ఇంజన్ అనుకోకుండా బావిలో పడిపోయింది. ఇంజిన్‌ను బావిలో నుంచి బయటకు తీసేందుకు ప్రయత్నించే క్రమంలో మధుసూదన్ రావు కూడా బావిలో పడిపోయారు. మధుసూదన్ రావును కాపాడేందుకు ప్రయత్నిస్తూ అతని మేనల్లుడు ఢిల్లేశ్వరరావు కూడా బావిలో పడిపోయారు. చివరకు బావిలో నుంచి బయటకు రాలేక మేనల్లుడు, మేనమామ ఇద్దరూ ప్రాణాలు కోల్పోయారు. ఈ ఘటనతో కనిమెట్ట గ్రామంలో విషాద ఛాయలు అలుముకున్నాయి. సమాచారం అందుకున్న పోలీసులు ఘటనాస్థలికి చేరుకుని మృతదేహాలను పోస్ట్మార్టం కోసం శ్రీకాకుళం ప్రభుత్వ ఆసుపత్రికి తరలించారు. ఓ పాము కారణంగా ఇద్దరు ప్రాణాలు కోల్పోవడంతో గ్రామంలో విషాదం అలుముకుంది.

మరోవైపు శ్రీకాకుళం జిల్లా మందస మండలం సువర్ణాపురం శివాలయం వద్ద మూడు ఎలుగుబంట్లు హల్‌చల్‌ చేశాయి. శివాలయంలోని నంది విగ్రహం, ధ్వజస్తంభం వద్ద ఎలుగుబంట్లు కనిపించాయి. దీంతో కార్తీకమాసం పూజలు చేయడానికి వచ్చిన భక్తులు బెంబేలెత్తిపోయారు. భయంతో కేకలు వేశారు. అరుపులు, కేకలతో భయపడిన ఎలుగుబంట్లు సమీపంలోని జీడితోటల్లోకి పారిపోయాయి. సమాచారం తెలుసుకున్న అటవీ అధికారులు సువర్ణాపురం పరిసర ప్రాంతాలను పరిశీలించారు. జాగ్రత్తగా ఉండాలని స్థానికులకు సూచించారు.