ఒక్క ఫోన్‌కాల్.. అమాయకంగా రూ1.25 కోట్లు పోగొట్టుకున్న యువతి

విజయవాడలో ఓ యువతి సైబర్ నేరానికి బలైంది. అమాయకంగా భారీగా డబ్బులు పోగొట్టుకుంది. గాయత్రినగర్‌కు చెందిన యువతి హైదరాబాద్‌లో సాఫ్ట్‌వేర్‌ ఉద్యోగం చేస్తున్నారు. ఆమె శుక్రవారం హైదరాబాద్ నుంచి తల్లిదండ్రులను చూసేందుకు విజయవాడకు వచ్చారు. అయితే ఆమె ఇంట్లో ఉండగా.. ఉదయం 10.30 గంటల సమయంలో గుర్తు తెలియని వ్యక్తి ఆమెకు ఫోన్ చేశాడు. కాల్ లిఫ్ట్ చేయగానే గుర్తు తెలియని వ్యక్తి ఫోన్‌ చేసి ముంబై పోలీసులం అని చెప్పి పరిచయం చేసుకున్నాడు.

'మీకు వచ్చిన కొరియర్‌లో మాదక ద్రవ్యాలున్నాయని మిమ్మల్ని అరెస్టు చేస్తున్నామని'అని చెప్పారు. దీంతో ఆమె భయపడింది.. అప్పుడు అసలు స్టోరీ మొదలైంది. అరెస్టు కాకుండా ఉండాలంటే డబ్బులు చెల్లించాలని చెప్పడంతో యువతి కంగారుపడింది. వెంటనే ఆమె ఇదంతా నిజమని నమ్మి.. రూ.1.25 కోట్లు ఆ వ్యక్తి చెప్పిన బ్యాంక్ అకౌంట్‌లకు పంపించారు. కొద్దిసేపటి తర్వాత మోసపోయినట్లు గమనించి.. శుక్రవారం రాత్రి విజయవాడలో సైబర్‌ క్రైం పోలీసులకు ఫిర్యాదు చేశారు. బాధితురాలు చెప్పిన వివరాల ప్రకారం నగదు బదిలీ చేసిన బ్యాంకు అకౌంట్‌ల వివరాలు పోలీసులు సేకరిస్తున్నారు. ఈ మేరకు కేసు కూడా నమోదు చేశారు.

గుర్తు తెలియని వ్యక్తుల నుంచి వచ్చే ఫోన్‌కాల్స్ విషయంలో జాగ్రత్తగా ఉండాలంటున్నారు పోలీసులు. డిజిటల్‌ అరెస్టు అంటూ వచ్చే ఫోన్లను నమ్మొద్దని హెచ్చరిస్తున్నారు. నకిలీ పోలీసుల మాటలకు భయపడి డబ్బులు కట్టొద్దంటున్నారు. ఒకవేళ అలాంటి కాల్స్ వస్తే తమకు సమాచారం ఇవ్వాలంటున్్నారు. కొద్ది నెలలుగా విజయవాడల సైబర్‌ నేరగాళ్లు డిజిటల్‌ అరెస్టు పేరుతో భయపెట్టేస్తూ రూ.లక్షల నుంచి రూ.కోట్లు గుంజేస్తున్నారు.

ప్రకాశం జిల్లా ఓ వ్యక్తి బ్యాంక్‌ అకౌంట్ నుంచి నగదు మాయం అయ్యాయి. అమ్మనబ్రోలుకు చెందిన పోకూరి శ్రీనివాసరావుకు స్థానిక కెనరా బ్యాంక్‌లో అకౌంట్ ఉంది. అందులో రూ.2.40 లక్షల డబ్బులు ఉండగా.. తన ప్రమేయం లేకుండా విత్‌డ్రా అయినట్లు ఆయన గుర్తించారు. వెంటనే ఆయన నాగులుప్పలపాడు పోలీస్‌స్టేషన్‌లో ఫిర్యాదు చేశారు. ఈ మేరకు పోలీసులు కేసు నమోదు చేశారు.