పెళ్లి చేసుకునేవారికి గుడ్‌న్యూస్.. రూ. లక్ష నుంచి రూ.కోటి వరకు ఇస్తారు

ప్రస్తుతం పెళ్లిళ్లు చాలా ఖరీదు అయిపోయాయి. ప్రీ వెడ్డింగ్ నుంచి మొదలుపెడితే సంగీత్, హల్దీ, పెళ్లి, బరాత్, రిసెప్షన్ అంటూ రకరకాల ఈవెంట్లు నిర్వహిస్తున్నారు. వీటన్నింటికీ కలిసి ఖర్చు తడిసి మోపెడు అవుతోంది. అయితే పెళ్లి అంటే చాలు.. అటు అమ్మాయి తరఫు వారికైనా.. ఇటు అబ్బాయి తరఫు వారికైనా.. భారీగా ఖర్చులు అవుతూ ఉంటాయి. వీటన్నింటినీ తట్టుకునేందుకు అప్పులు చేస్తూ ఉంటారు. పెళ్లిళ్లు కుదిర్చే సంస్థ అయిన మాట్రిమోనీ.కామ్.. ఇప్పుడు సరికొత్త ఆలోచనతో ముందుకు వచ్చింది. పెళ్లి చేసుకుంటాం అనే వారికి వధువు, వరుడులను వెతికి పెట్టడమే కాదు.. పెళ్లిళ్లకు లోన్లు ఇచ్చే సేవలను కూడా ప్రారంభించింది.

రోజురోజుకూ పెళ్లిళ్ల ఖర్చులు విపరీతంగా పెరుగుతున్న వేళ మ్యాట్రిమొనీ.కామ్‌ సంస్థ సరికొత్త సేవలను ప్రారంభించింది. ఇప్పటివరకు కేవలం పెళ్లి సంబంధాలు మాత్రమే కుదుర్చుతున్న ఈ మ్యాట్రిమొనీ.కామ్ సంస్థ.. ఇక మీదట పెళ్లి ఖర్చుల కోసం రుణాలు ఇప్పించనుంది. దీని కోసం ప్రత్యేకంగా వెడ్డింగ్‌లోన్స్‌.కామ్‌ అనే ఫిన్‌టెక్‌ వేదికను ప్రారంభించింది. ఐడీఎఫ్‌సీ, టాటా క్యాపిటల్‌, ఎల్‌ అండ్‌ టీ ఫైనాన్స్‌ లాంటి సంస్థలతో వెడ్డింగ్‌లోన్స్‌.కామ్‌ ఒప్పందం కుదుర్చుకుంది. వీటి ద్వారా పెళ్లిళ్లు చేసుకునేవారికి లోన్లు ఇప్పిస్తామని మ్యాట్రిమొనీ.కామ్‌ సంస్థ సీఈవో మురుగవేల్‌ జానకీరామ్‌ శుక్రవారం వెల్లడించారు.

మ్యాట్రిమొనీ.కామ్ సంస్థ ద్వారా పెళ్లిళ్ల కోసం రూ.1 లక్ష నుంచి రూ.1 కోటి వరకు లోన్లను అందించనున్నట్లు మురుగవేల్‌ జానకిరామన్‌ తెలిపారు. ఇందుకోసం నెలవారీ ఈఎంఐల సౌకర్యం కల్పిస్తున్నట్లు వెల్లడించారు. పెళ్లిళ్ల కోసం తీసుకున్న లోన్లను 30 ఏళ్ల వరకు చెల్లించవచ్చని పేర్కొన్నారు. కాన్ఫెడరేషన్ ఆఫ్ ఆల్ ఇండియా ట్రేడర్స్ (సీఏఐటీ) అంచనాల ప్రకారం.. నవంబర్ 12వ తేదీ నుంచి డిసెంబర్ 16వ తేదీ మధ్య వివాహాలు జరిగే సీజన్‌లో దాదాపు 48 లక్షల జంటలు పెళ్లి చేసుకోనున్నాయి. పెళ్లిళ్ల సీజన్ ప్రారంభమైన తర్వాత ఈ సౌకర్యం అందుబాటులోకి వస్తుందని వివరించారు.

అయితే ఈ వెడ్డింగ్ లోన్స్‌పై సోషల్ మీడియాలో రకరకాల చర్చ జరుగుతోంది. కొందరు మాత్రం ఈ నిర్ణయాన్ని స్వాగతిస్తున్నారు. మ్యాట్రిమొనీ.కామ్ పెళ్లి సంబంధాలే కాకుండా పెళ్లిళ్లు చేసుకునేందుకు లోన్లు కూడా ఇస్తోందని సంబరపడుతున్నారు. అయితే మరికొందరు మాత్రం అప్పు చేసి పప్పుకూడు లాగా.. లోన్లు తీసుకుని మరీ పెళ్లిళ్లు చేసుకోవడం ఏంటని ప్రశ్నిస్తున్నారు. మన దగ్గర ఉన్న డబ్బులను బట్టి పెళ్లి చేసుకుంటే అది భారంగా కాకుండా ఉంటుందని పేర్కొంటున్నారు. హంగు, ఆర్భాటాలకు పోయి.. అప్పుల పాలైతే తర్వాత పరిస్థితి ఏంటని చెబుతున్నారు.