ఈ మందుబాబు మామూలోడుకాదుగా.. పాపం ఆర్టీసీ బస్ డ్రైవర్, మహిళా కండక్టర్‌‌

ప్రకాశం జిల్లాలో మందుబాబు రెచ్చిపోయాడు.. మద్యం మత్తులో రోడ్డుపై హంగామా చేశాడు. ఆర్టీసీ డ్రైవర్, కండక్టర్‌పై దాడికి దిగాడు. ఆర్టీసీ బస్సు ఒంగోలు నుంచి జరుగుమల్లి మండలం వర్థినేనిపాలేనికి వెళుతోంది. టంగుటూరు నుంచి జరుగుమల్లి వెళ్లే మార్గంలో కామేపల్లి విగ్రహాల కూడలి దగ్గరకు రాగానే.. బస్సులో నుంచి ప్రయాణికులు దిగుతున్నారు. ఇంతో కామేపల్లికి చెందిన పత్తిపాటి హరిబాబు అనే వ్యక్తి అప్పటికే ఫుల్లుగా మద్యం తాగిన మైకంలో ఉన్నాడు. అక్కడ రోడ్డుపై కొందరితో గొడవకు దిగాడు. బస్సులో నుంచి ప్రయాణికులు దిగి వెళ్లడంతో.. కండక్టర్‌ సుభాషిణి డ్రైవర్‌కు బస్సు వెళ్లేందుకు రైట్‌ చెప్పింది.

ఇంతలో హరిబాబు బస్సు టైరు దగ్గరకు వచ్చి నిలబడ్డాడు. బస్సు టైరు పక్క నుంచి జరగాలని కండక్టర్ అతడికి చెప్పింది. దీంతో హరిబాబు‌ ఆమెను బూతులు తిడుతూ అసభ్యకరంగా మాట్లాడాడు. అక్కడితో ఆగకుండా బస్సు టైర్ల కింద పడుకొని ముందుకు కదలకుండా కొద్దిసేపు రచ్చ చేశాడు. కండక్టర్‌ను బస్సు చుట్టూ తిప్పుతూ చేతులతో కొడుతూ.. కాళ్లతో తన్నుతూ నోటికొచ్చినట్లు బూతులు తిట్టాడు. స్థానికులు అడ్డు చెప్పినా వినకుండా రెచ్చిపోయాడు.. ఆమెపై దాడి చేశాడు. దాదాపు గంట సేపు నడిరోడ్డుపై హడావిడి చేశాడు. వెంటనే బస్సు డ్రైవర్‌ రెడ్డమ్మ దిగి వచ్చి అతడిని అడ్డుకోబోగా.. ఆయనపై తిరగబడి కొట్టాడు.

హరిబాబును కొందరు అడ్డుకోగా.. వారిని కూడా ఇష్టం వచ్చినట్లు తిడుతూ దాడి చేశాడు. కండక్టర్‌ మొబైల్ తీసుకొని నేలకేసి కొట్టాడు. ఈ విషయం పోలీసులకు తెలియడంతో.. జరుగుమల్లి పోలీసులు ఘటనా స్థలికి చేరుకొని హరిబాబును అదుపులోకి తీసుకొని స్టేషన్‌కు తీసుకెళ్లారు. గాయపడిన మహిళా కండక్టర్‌ను 108లో నెల్లూరు జిల్లా కందుకూరు ఏరియా ఆసుపత్రికి తరలించారు. ఈ ఘటనపై కేసు నమోదు చేసి దర్యాప్తు చేస్తున్నట్లు పోలీసులు తెలిపారు.