మహిళలకు కెనరా బ్యాంక్ బంపరాఫర్.. ఇంటి దగ్గర నుంచే సంపాదన

గ్రామీణ ప్రాంత నిరుద్యోగ యువత స్వయం ఉపాధి అవకాశాలు పొందేలా పలు బ్యాంకులు, స్వచ్ఛంద సంస్థలు కృషిచేస్తుంటాయి. వారికి పలు అంశాలలో శిక్షణ అందించి.. వారి కాళ్ల మీద వారు నిలబడేలా, సొంతంగా సంపాదించుకునేలా తమ వంతు కృషిచేస్తుంటాయి. ఈ క్రమంలోనే కెనరా, యూనియన్ బ్యాంక్ వంటి బ్యాంకులు ఉపాధి శిక్షణ సంస్థల ద్వారా గ్రామీణ యువతకు శిక్షణ అందిస్తుంటాయి. ఈ విధంగానే ఉమ్మడి కర్నూలు జిల్లాలోని మహిళలకు కెనరా బ్యాంక్ అద్భుత అవకాశం కల్పించింది. నిరుద్యోగులకు శిక్షణ అందించి వారు స్వయం ఉపాధి అవకాశాలు పొందేలా కృషి చేస్తున్న కెనరా బ్యాంక్ స్వయం ఉపాధి శిక్షణ సంస్థ..తాజాగా ఉమ్మడి కర్నూలు జిల్లాలోని మహిళలకు అద్భుత అవకాశం కల్పించింది.

గ్రామీణ ప్రాంతాల్లోని మహిళలు ఇంటి నుంచే సంపాదించేలా.. ఆర్థికంగా బలోపేతం అయ్యేలా టైలరింగ్ మీద ట్రైనింగ్ ఇవ్వనుంది. ఉమ్మడి కర్నూలు జిల్లాలోని గ్రామీణ మహిళలకు ఉచితంగా టైలరింగ్ మీద శిక్షణ ఇవ్వనున్నట్లు కెనరా బ్యాంక్ స్వయం ఉపాధి శిక్షణ సంస్థ రీజినల్ మేనేజర్ పుష్ప కుమార్ వెల్లడించారు. 30 రోజులపాటు ఉచితంగా ఈ శిక్షణ అందిస్తామని అధికారులు వెల్లడించారు. థియరీతో పాటుగా ప్రాక్టికల్‌గానూ శిక్షణ ఉంటుందన్న అధికారులు.. ట్రైనింగ్ కోసం అవసరమయ్యే మెటీరియల్ ఉచితంగా అందిస్తామని చెప్పారు. ఇక ట్రైనింగ్ సమయంలో ఉండటానికి వసతి, భోజనం సౌకర్యాలు కూడా ఉచితంగా అందిస్తున్నారు. టైలరింగ్‌తో పాటుగా మహిళలకు 7 అంశాలు, పురుషులకు 11 అంశాల్లో ట్రైనింగ్ ఇస్తున్నట్లు అధికారులు తెలిపారు.

ఇక ఈ ఉచిత ట్రైనింగ్ మీద ఆసక్తి ఉన్న నిరుద్యోగులు.. తమను సంప్రదించాలని కెనరా బ్యాంక్ స్వయం ఉపాధి శిక్షణ సంస్థ రీజనల్ అధికారులు కోరుతున్నారు. నెలరోజుల ఉచిత శిక్షణ పూర్తి చేసుకున్న వారికి సర్టిఫికేట్ అందిస్తామని.. అలాగే సొంతంగా బిజినెస్ చేసుకునేందుకు వీలుగా బ్యాంకు రుణాలు అందించే విషయంపైనా ఆలోచిస్తున్నట్లు చెప్పారు. మరోవైపు కెనరా బ్యాంక్ స్వయం ఉపాధి శిక్షణ సంస్థ ద్వారా ఇప్పటి వరకూ 14 వేలమందికి శిక్షణ అందించినట్లు అధికారులు చెప్తున్నారు. ఆసక్తికలిగిన వారు ఈ అవకాశాన్ని ఉపయోగించుకోవాలని కోరుతున్నారు.