ఐటీ ఉద్యోగులు ఎగిరిగంతేసే వార్త.. సాఫ్ట్‌వేర్ కంపెనీ కీలక నివేదిక.. ఏకంగా 27 లక్షల మందికి

ఇటీవలి కాలంలో ప్రపంచ వ్యాప్తంగా ఆర్టిఫిషియల్ ఇంటెలిజెన్స్, జెనరేటివ్ ఏఐ టెక్నాలజీపై ప్రధానంగా చర్చ కొనసాగుతోంది. ఈ సాంకేతికత వల్ల పెద్ద ఎత్తువ ఉద్యోగులు పోతాయని ఎక్కువ మంది చెబుతున్నారు. ప్రధానంగా టెక్, ఐటీ రంగంపై దీని ప్రభావం ఎక్కువగా ఉంటుందన్న వాదనలతో ఆ రంగంలోని ఉద్యోగులు ఒత్తిడికి గురవుతున్నారు. ఇలాంటి అనిశ్చిత పరిస్థితుల్లో ప్రముఖ సాఫ్ట్‌వేర్ కంపెనీ సర్వీస్‌నౌ నివేదిక ఊరట కలిగించే వార్త చెప్పింది. పీర్సన్ సంస్థతో కలిసి ఏఐ టెక్నాలజీపై ఓ నివేదికను రూపొందించింది. ఏఐ టెక్నాలజీ భారీగా ఉద్యోగాల సృష్టికి కారణమవుతుందని, అది భారత్‌లో 2028 నాటికి ఏకంగా 27.3 లక్షల ఉద్యోగాలు కల్పిస్తుందని పేర్కొంది.

ప్రధానంగా సాంకేతిక ఆధారిత రంగాలైన రిటైల్, మాన్యుఫాక్చరింగ్, ఎడ్యుకేషన్, హెల్త్ కేర్ సెక్టార్లలో పెద్ద ఎత్తున వృత్తి నిపుణులు అవసరమవుతారని స్టడీ నొక్కి చెప్పింది. ఒక్క రిటైల్ రంగంలోనే రానున్న రోజుల్లో 6.96 మిలియన్ల ఉద్యోగాలు కల్పిస్తుందని తెలిపింది. అందులో సాఫ్ట్‌వేర్ అప్లికేషన్ డెవలప్మెంట్, డేటా ఇంజినీర్ వంటి ప్రధాన ఉద్యోగాలు ఉంటాయని తెలిపింది. 2028 నాటికి చూసుకుంటే భారత్‌లో ఒక్క తయారీ రంగంలోనే 15 లక్షల ఉద్యోగాలు ఏఐ టెక్నాలజీ ద్వారా అందుబాటులోకి వస్తాయని తెలిపింది. ఇక విద్యా రంగంలో 84 లక్షలు, ఆరోగ్య రంగంలో 80 లక్షల ఉద్యోగాలు వస్తాయని తెలిపింది. దీని ద్వారా దేశ ఆర్థిక వృద్ధి, సాంకేతిక పరివర్తనకు దోహదపడుతుందని పేర్కొంది.

అధునాత నైపుణ్యాలు అవసరమయ్యే హైవాల్యూ జాబ్స్ సృష్టించడంలో ఆర్టిఫిషియల్ ఇంటెలిజెన్స్ కీలక పాత్ర పోషిస్తుందని నివేదిక తెలిపింది. ఇక జనరేటివ్ ఏఐ విభాగంలో భవిష్యత్తులో ఏఐ సిస్టమ్స్ ఇంజనీర్లు, ఇంప్లిమెంటేషన్ కన్సల్టెంట్లు, ప్లాట్ ఫాం ఓనర్లకు ఎక్కువగా డిమాండ్ ఉంటుందని పేర్కొంది. రిటైల్ ప్రొఫెషనల్స్ ఎక్కువగా అవకాశాలు దక్కించుకునేందుకు సాఫ్ట్‌వేర్ అప్లికేషన్ డెవలప్మెంట్, డేటా ఇంజినీరింగ్ వంటి విభాగాల్లో తగిన నైపుణ్యాలను మెరుగుపరుచుకోవాలని నివేదిక సూచించింది. ఐటీ, కేపీఓల నుంచి ఫైనాన్స్, చట్టపరమైన సేవల వరకు రోజువారీ జీవితంలోని అన్ని అంశాలలో విస్తరించి ఉన్న సేవల ద్వారా 60 శాతం కంటే ఎక్కువ భారత ఆర్థిక వ్యవస్థలోకి వస్తోందని నిపుణులు చెబుతున్నారు. ఆయా రంగాల్లో మనుషుల కంటే ఏఐ మెరుగ్గా పని చేయలేదని, కచ్చితంగా నైపుణ్యవంతులైన వారు ఆ సాంకేతికత ఉపయోగించేందుకు అవసరమవుతారని నివేదిక అంచనా వేసింది.