ఏపీలో విద్యార్థులకు శుభవార్త.. అమెరికా వీసాలపై కీలక ప్రకటన.. విశాఖ, విజయవాడలో ఖాయం

అమెరికా వీసాలకు సంబంధించి హైదరాబాద్‌లోని యూఎస్‌ కాన్సుల్‌ జనరల్‌ రెబెకా డ్రామే కీలక ప్రకటన చేశారు. అంతర్జాతీయ విద్యా వారోత్సవాల్లో భాగంగా.. రెబెకా అమెరికా ప్రజాసంబంధాల అధికారి అలెగ్జాండర్‌ మెక్‌ లారెన్‌తో కలసి విశాఖలో పర్యటించారు. వీసాలకు సంబంధించి ఏపీకి ఒక తీపికబురు చెప్పారు. ఏపీలో విశాఖపట్నం కానీ విజయవాడలోకానీ వీసా అప్లికేషన్‌ సెంటర్‌ ఏర్పాటుకు ప్రతిపాదనలు పంపామని రెబెకా తెలిపారు. అంతేకాదు వీలైనంత ఎక్కువ మంది భారతీయులు అమెరికాలో చదువుకోవడానికి, నివసించడానికి వీలుగా వీసాలు మంజూరు చేస్తున్నామన్నారు.

వీసా ప్రక్రియను విద్యార్థుల ఆకాంక్షలకు అనుగుణంగా ఎప్పటికప్పుడు క్రమబద్ధీకరిస్తున్నట్లు రెబెకా తెలిపారు. విద్యార్థి, ఉపాధి, ఇతర వీసాల కోసం అపాయింట్‌మెంట్‌ వెయిటింగ్ టైంను మూడు నెలలకు తగ్గించినట్లు చెప్పారు. భారతీయులకు 2023లో 14 లక్షల వీసాలు మంజూరు చేశామని.. ప్రపంచంలో ఏ దేశంలోనూ ఇన్ని వీసాలు జారీ చేయలేదన్నారు. ప్రస్తుతం ఎక్కువమంది విద్యార్థులు మాస్టర్స్‌ చదివేందుకే యూఎస్‌ వెళ్తున్నారని.. వీరిలో భారతీయులు, అందులో తెలుగువాళ్లు ఎక్కువ మంది ఉన్నారన్నారు. యూఎస్‌లో రాబోయే రోజుల్లో అండర్‌ గ్రాడ్యుయేట్‌ కోర్సు చదివే విద్యార్థుల సంఖ్య పెరిగే అవకాశం ఉందన్నారు.

అంతేకాదు అమెరికాలోని అంతర్జాతీయ విద్యార్థుల్లో భారత్‌ తొలిస్థానంలో నిలిచినట్లు రెబెకా డ్రామే తెలిపారు. 2023-24లో 3.3 లక్షల మంది భారతీయ విద్యార్థులు ఉంటే.. అందులో 56 శాతం తెలుగు రాష్ట్రాలకు చెందినవారే ఉన్నట్లు పేర్కొన్నారు. ఈ 56శాతంలో.. తెలంగాణ నుంచి 34 శాతం, ఏపీ నుంచి 22 శాతం విద్యార్థులు ఉన్నారు. హైదరాబాద్‌లో ఈ వేసవి సీజన్‌లో 47 వేలకు పైగా విద్యార్థి వీసాలకు ఇంటర్వ్యూలు నిర్వహించినట్లు చెప్పారు. ఢిల్లీ, ముంబై, చెన్నై, కోల్‌కతాతో పోలిస్తే హైదరాబాద్ కాన్సుల్ జనరల్‌లో నాన్‌ఇమిగ్రెంట్‌ వీసాలు ఎక్కువగా జారీ చేస్తున్నట్లు వెల్లడించారు.

అలాగే ప్రస్తుతం రోజుకు 1,600 వీసాలు మంజూరు చేస్తున్నామని.. ఆ సంఖ్యను 2025 ఫిబ్రవరి నాటికి 2,500కు పెంచాలనే టార్గెట్‌గా పెట్టుకున్నట్లు రెబెకా చెప్పారు. ఈ ఏడాది వాషింగ్టన్‌లో మూడు నెలల పాటు హెచ్‌1బీ డొమెస్టిక్‌ రీవాలిడేషన్‌ ప్రోగ్రాంను పైలట్‌ ప్రాజెక్ట్‌గా చేపడుతున్నట్లు తెలిపారు. అమెరికాలో నివసిస్తున్న 10 వేల మంది భారతీయుల హెచ్‌1బీ వీసాలను స్వదేశానికి రాకుండానే పునరుద్ధరిస్తామని కూడా చెప్పారు. వచ్చే ఏడాది భారతీయుల కోసం ప్రత్యేకంగా రూపొందించిన ఈ ప్రాజెక్టు పూర్తిస్థాయిలో అమలయ్యే అవకాశం ఉందన్నారు. ఏపీలో వీసా అప్లికేషన్‌ సెంటర్‌ ఏర్పాటుపై ఎప్పటి నుంచో రిక్వెస్ట్‌లు ఉన్నాయి.. మొత్తానికి సెంటర్ ఏర్పాటుపై యూఎస్‌ కాన్సుల్‌ జనరల్‌ రెబెకా డ్రామే ప్రకటన చేయడంతో విద్యార్థులు, ఉద్యోగులు ఆనందం వ్యక్తం చేస్తున్నారు.