ఢిల్లీ రాజకీయాల్లో "అద్దాల మేడ" లొల్లి.. కేజ్రీవాల్ ఇంద్ర భవనం నిర్మించుకున్నారన్న బీజేపీ

మరికొన్ని రోజుల్లో ఢిల్లీ అసెంబ్లీ ఎన్నికలు జరగనున్న వేళ.. అధికార ఆమ్ ఆద్మీ పార్టీ, ప్రతిపక్ష బీజేపీ మధ్య తీవ్ర మాటల యుద్ధం చోటు చేసుకుంటోంది. అధికార పార్టీ వైఫల్యాలను బీజేపీ ఎత్తిచూపుతుండగా.. ప్రతిపక్షంపై ఆప్ తీవ్రంగా నిప్పులు చెరుగుతోంది. దీంతో ఢిల్లీ రాజకీయాలు ప్రస్తుతం తీవ్ర హాట్ హాట్‌గా మారాయి. ఈ సందర్భంగా తాజాగా బీజేపీ షేర్ చేసిన ఓ వీడియో ఇప్పుడు.. రెండు పార్టీల మధ్య తీవ్ర వాగ్వాదానికి కారణం అయింది. ఢిల్లీ ముఖ్యమంత్రి అధికారిక నివాసానికి సంబంధించిన వీడియోను సోషల్ మీడియాలో బీజేపీ పోస్ట్ చేస్తూ.. ప్రజా ధనాన్ని దుర్వినియోగం చేశారని ఆరోపించగా.. ఆప్ తీవ్రంగా ఖండించింది.

త్వరలోనే ఢిల్లీలో అసెంబ్లీ ఎన్నికలు జరగనున్న వేళ.. సీఎం బంగ్లా వివాదం రాజకీయంగా ఆప్, బీజేపీ మధ్య తీవ్ర దుమారం రేపుతోంది. సామాన్యుడిగా చెప్పుకునే మాజీ సీఎం, ఆప్ కన్వీనర్ అరవింద్‌ కేజ్రీవాల్‌.. తాను అధికారంలో ఉన్నపుడు రూ.కోట్లు ఖర్చుపెట్టి ఢిల్లీ సీఎం అధికారిక బంగ్లాకు భారీగా మార్పులు చేశారని బీజేపీ గత కొంతకాలంగా ఆరోపిస్తోంది. ఈ క్రమంలోనే తాజాగా ఆ అధికారిక బంగ్లాకు సంబంధించిన ఓ వీడియోను సోషల్ మీడియాలో విడుదల చేయడం తాజా వివాదానికి కారణం అయింది. ప్రజాధనాన్ని భారీగా వెచ్చించి.. కేజ్రీవాల్‌ ఇంద్ర భవనాన్ని నిర్మించుకున్నారని బీజేపీ ఫైర్ అయింది.

ఢిల్లీలోని 6 ఫ్లాగ్‌ స్టాఫ్‌ రోడ్‌లో ఉన్న ముఖ్యమంత్రి అధికారిక బంగ్లాకు సంబంధించిన వీడియోను ఢిల్లీ బీజేపీ అధ్యక్షుడు వీరేంద్ర సచ్‌దేవ తన ట్విటర్ ఖాతాలో పోస్ట్‌ చేశారు. ఆ భవనాన్ని అరవింద్‌ కేజ్రీవాల్‌ సీఎంగా ఉన్న సమయంలో ముఖ్యమంత్రి అధికారిక నివాసంగా ఉపయోగించారు. ఆ బంగ్లాను శీష్‌ మహల్‌ (అద్దాల మేడ) అని పేర్కొన్న వీరేంద్ర సచ్‌దేవ.. ఢిల్లీ ప్రజల ధనాన్ని దుర్వినియోగం చేస్తూ.. కేజ్రీవాల్ 7-స్టార్‌ రిస్టార్ట్‌ నిర్మించుకున్నారని మండిపడ్డారు.

ఈ క్రమంలోనే సీఎం అధికారిక నివాసంలో భారీగా ఖర్చు చేసి మరమ్మతులు చేయించారని ఆరోపించారు. ఆ భవనంలో మార్బుల్‌ గ్రానైట్‌ లైటింగ్‌ కోసం రూ.1.9 కోట్లు ఖర్చు చేశారని.. ఇతరత్రా సివిల్‌ పనుల కోసం రూ.1.5 కోట్లు.. జిమ్‌, స్పాల కోసం రూ.35 లక్షలు ఖర్చు పెట్టినట్లు తెలిపారు. ఇలా మొత్తంగా ఆ భవనానికి రూ.3.75 కోట్లు ఖర్చు పెట్టి లగ్జరీగా తయారు చేశారని బీజేపీ అధ్యక్షుడు ఆరోపించారు. కామన్‌ మ్యాన్‌ అని చెప్పే కేజ్రీవాల్‌.. తన పిల్లలపై ప్రమాణం చేసి అబద్ధాలు చేశారని మండిపడ్డారు. ప్రభుత్వ నివాసం, కారు ఏవీ తీసుకోలేదని చెప్పారని.. కానీ ఢిల్లీ ప్రజల సొమ్మును ఇలా దోచుకున్నారని వీరేంద్ర సచ్‌దేవా తీవ్ర విమర్శలు గుప్పించారు.

ఇక బీజేపీ అధ్యక్షుడు విడుదల చేసిన వీడియోపై ఆమ్‌ ఆద్మీ పార్టీ గట్టిగా బదులిచ్చింది. ఢిల్లీలో ఉన్న అసలైన సమస్యలను వదిలేసి.. బీజేపీ నిరాధార ఆరోపణలు చేస్తోందని ఆప్‌ సీనియర్‌ నేత, ఢిల్లీ మాజీ డిప్యూటీ సీఎం మనీష్ సిసోడియా తీవ్రంగా మండిపడ్డారు. విద్య, ఆరోగ్య సంస్కరణల గురించి ఢిల్లీ ప్రజలు అడుగుతుంటే.. బీజేపీ మాత్రం అధికారిక నివాసల గురించి మాట్లాడుతున్నారని పేర్కొన్నారు. ఇక ఇప్పటికే ఢిల్లీ సీఎం అధికారిక నివాసం విషయంలో ఈ ఏడాది సెప్టెంబర్‌లోనే సీబీఐ దర్యాప్తు ప్రారంభించింది. కేజ్రీవాల్ సీఎంగా ఉన్నపుడు.. ఆ బంగ్లాకు మరమ్మతులు చేయగా.. అందుకోసం కోట్ల రూపాయలు ఖర్చు చేశారని బీజేపీ ఆరోపించింది. ఈ నేపథ్యంలో ఆ సమయంలో టెండర్‌ నిబంధనల ఉల్లంఘన జరిగిందా అనే కోణంలో సీబీఐ దర్యాప్తు చేస్తోంది. అయితే ఇప్పటివరకు కేసు నమోదు చేయకపోవడం గమనార్హం.