కరివేపాకు మొక్క ఏపుగా, ఆకుపచ్చగా పెరగాలంటే

ఈ రోజుల్లో చాలా మందికి మొక్కల్ని పెంచడం అలవాటుగా మారింది. ఇంట్లో చిన్న స్థలం ఉన్నా సరే అక్కడ మొక్కల్ని పెంచుతున్నారు. నగరాల్లో నివసించే ప్రజలు కుండీల్లో మొక్కల్ని నాటుతున్నారు. గ్రామాల్లో ఉన్న ప్రజలు తమ పెరట్లో కూరగాయలు, పూల మొక్కలతో పాటు కొన్ని ఔషధపు మొక్కల్ని పెంచుతున్నారు. అయితే, చాలా మంది కూరగాయలు, పూల మొక్కల్ని పెంచడానికి ఇష్టపడుతున్నారు. ఇప్పుడు మారిన జీవన శైలి, పొల్యూషన్ కారణంగా ఆరోగ్యంపై ఎక్కువ దృష్టి పెట్టాల్సి వస్తుంది. అందుకే మన ఆరోగ్యాన్ని పెంచుకునేందుకు కొన్ని మొక్కల్ని మన ఇంట్లో పెంచుకోవాలి. మన ఆరోగ్యాన్ని పెంచి.. ఇమ్యూనిటీ పవర్ ఇచ్చే మొక్కలు ఎన్నో ఉన్నాయి. వాటిలో కరివేపాకు మొక్క ఒకటి.

కరివేపాకు మొక్క ఇంట్లో సులభంగా పెరుగుతుంది. చాలా మంది కరివేపాకును కుండీలో పెంచుతారు. కొందరు పెరట్లో ఈ మొక్కను పెంచుతారు. కరివేపాకు మొక్క వల్ల ఇంటికి ఆకర్షణ రావడమే కాకుండా ఇది గాలిని శుద్ధి చేస్తాయి. అయితే, కరివేపాకు మొక్కల్ని సరిగ్గా చూసుకుంటే అవి బాగా పెరుగుతాయి. అయితే, కొన్ని పొరపాట్లు వల్ల కరివేపాకు మొక్క చనిపోతుంది. కరివేపాకు మొక్క ఆకుపచ్చగా, వేగంగా పెరిగేందుకు ఫాలో అవ్వాల్సిన చిట్కాలు ఏంటో ఇక్కడ తెలుసుకుందాం.

వాతావరణం..

​ఏదైనా మొక్క దాని సీజన్లో మాత్రమే బాగా పెరుగుతుంది. శీతాకాలంలో, కరివేపాకుతో పాటు ఇతర మొక్కల పెరుగుదల ఆగిపోతుంది. చలికాలంలో చలి వాతావరణంలో మొక్కకు ఎక్కువ ఎరువులు ఇవ్వడం మంచిది కాదు. దీని వల్ల కరివేపాకు పసుపు రంగులోకి మారి ఎండిపోవచ్చు. శీతాకాలంలో తేలికపాటి సూర్యకాంతిలో మొక్కను ఉంచండి. అది ఎండినప్పుడు మాత్రమే నీరు పెట్టండి.

ఆకుపచ్చగా..

చలికాలం చివర్లో అంటే ఫిబ్రవరి నెలలో కరివేపాకు పూయడం ప్రారంభమవుతుంది. ఇది మొక్క పెరుగుదలను ప్రభావితం చేస్తుంది. కరివేపాకు మొక్క దట్టంగా, పెరగాలనుకుంటే.. పై నుంచి పుష్పించే కొమ్మను కత్తిరించండి. ఇలా చేయడం వల్ల మొక్క యొక్క పక్కల నుంచి, దిగువ నుంచి కొత్త కొమ్మలు పుట్టుకొస్తాయి. ఇలా చేస్తే కరివేపాకు మొక్క మునుపటి కంటే దట్టంగా, పచ్చగా పెరగడం ప్రారంభమవుతుంది.

ఏ ఎరువులు వేయాలి..?

కరివేపాకు మొక్కను నాటేటప్పుడు, కుండీలో కోకోపీట్, వర్మీకంపోస్ట్, తోట మట్టిని కలిపి మిశ్రమాన్ని తయారు చేయండి. ఇందులో మొక్కను నాటడం వల్ల కరివేపాకు ఎదుగుదల మెరుగుపడుతుంది. మీరు ఇందులో నాచును కూడా ఉపయోగించవచ్చు. నేల ఆరిపోయినప్పుడు మొక్కకు నీళ్ళు పోస్తూ ఉండండి. ఇలా చేస్తే కరివేపాకు మొక్క పచ్చగా ఉండి వేగంగా పెరుగుతుంది.

బియ్యం నీరు చిట్కా..

కరివేపాకు మొక్క మంచి ఎదుగుదల కోరుకుంటే.. బియ్యం నీరు ప్రభావవంతంగా పనిచేస్తుంది. ఇందుకోసం వారానికి ఒకసారి మొక్కకు బియ్యం నీరు పోయాలి. ఇందుకోసం బియ్యాన్ని గంట పాలు నీటిలో నానబెట్టండి. ఆ తర్వాత బియ్యాన్ని నీటి నుంచి ఫిల్టర్ చేయండి. నీటిని సపరేట్‌గా తీసుకోండి. ఇప్పుడు ఆ నీటిని కరివేపాకు మొక్క మట్టిలో పోయాలి. బియ్యం నీళ్ళు పోసి మళ్లీ మట్టి వేయండి. దీంతో కరివేపాకు మొక్క ఎదుగుదల మెరుగుపడుతుంది.

పెరుగుతో కరివేపాకు ఎదుగుదల..

కరివేపాకు మొక్కను ఆరోగ్యంగా, ఆకుపచ్చగా ఉంచాలనుకుంటే, పెరుగు బెస్ట్ ఆప్షన్. పెరుగులో ఉండే ప్రొటీన్లు, బ్యాక్టీరియా మొక్కను చల్లబరచడంలో, దాని పెరుగుదలను పెంచడంలో సహాయపడుతుంది. కానీ తాజా పెరుగు నేరుగా మొక్కకు వాడరాదు. ఇందుకోసం పెరుగుకు నీటిని చేర్చి పల్చగా మార్చండి. నాలుగు కప్పుల నీటిలో ఒక కప్పు పెరుగు కలపడం ద్వారా ద్రావణాన్ని తయారు చేయండి. తర్వాత ఈ మిశ్రమాన్ని కరివేపాకు మొక్క మట్టిలో వేసి కలపండి. ఇది మొక్కకు అవసరమైన పోషణను అందిస్తుంది. అంతేకాకుండా మూలాల్ని బలపరుస్తుంది. ఈ చిట్కాతో కరివేపాకు మొక్క.. ఆరోగ్యంగా, ఏపుగా పెరుగుతుంది.

ఈ జాగ్రత్తలు ముఖ్యం..

కరివేపాకు మొక్కను జాగ్రత్తగా చూసుకోవడం చాలా ముఖ్యం. కరివేపాకు మొక్కకు ఎప్పుడూ ఎక్కువ నీరు ఇవ్వద్దు. ఎందుకంటే ఇది మొక్క యొక్క మూలాలను కుళ్ళిపోయేలా చేస్తుంది. కరివేపాకు మొక్కను ప్రత్యక్ష సూర్యకాంతిలో ఉంచకండి. కొంచెం సూర్యరశ్మి వచ్చే ప్రదేశంలో ఉంచండి. దీంతో మొక్క ఆరోగ్యంగా ఉంటుంది. మంచి పెరుగుదల కోసం, దాని కుండను ఎప్పటికప్పుడు మారుస్తూ ఉండండి. అంతేకాకుండా అవసరమైనప్పుడల్లా రెబ్బలు రెబ్బలు తీయకుండా.. కాండాలతో పాటు తీస్తే మొక్కకు ఏం కాదు. ఆకులు ఆకులుగా తీస్తేనే మొక్క దెబ్బతింటుందని నిపుణులు చెబుతున్నారు.గమనిక..ఇది సోషల్ సమాచారం మాత్రమే. కొన్ని అధ్యయనాలు, సంబంధిత నిపుణుల ప్రకారం ఈ వివరాలు అందించాం. వీటిని పాటించేముందు.. సంబంధిత నిపుణుడిని సంప్రదించడం శ్రేయస్కరం.