అత్తారింటికి వచ్చిన అల్లుడికి అదిరిపోయే విందు.. 500 వంటకాలతో.. గోదారోళ్ల మజాకా

ఒకటీ, రెండు, మూడు.. ఇలా సెకనుకు ఒకటి లెక్కెట్టినా.. 500 లెక్కపెట్టడానికి 500 సెకన్లు.. అంటే రమారమీగా దాదాపు ఎనిమిదిన్నర నిమిషాలు.. ఏంటీ ఈ లెక్కలు అనుకుంటున్నారా.. ఏమీ లేదండి.. సంక్రాంతి పండగ మొదలైంది. కొత్త అల్లుళ్లు, కొత్త కోడళ్లు, బంధుమిత్రులు, పిండి వంటలు, కోడి పందేలు.. అబ్బో ఈ హడావిడి మామూలుగా ఉండదు. పట్నం మొత్తం పల్లెకు తరలిపోయింది. అలా తరలి వచ్చిన బంధుమిత్రులకు మర్యాదలేంటో చూపిస్తున్నాయి గోదారి పల్లెలు. అన్నట్టు గోదారోళ్ల మాటలకే కాదు మర్యాదలకు ఓ ప్రత్యేకత ఉంటుందనేది అందరికీ తెలిసిన విషయమే. మాటలతో ఆకట్టుకోవటమే కాదు.. మర్యాదలతో కట్టిపడేయటంలోనూ గోదారోళ్లు సిద్ధహస్తులు. ఇక కొత్త అల్లుడికి మర్యాదలంటే చెప్పక్కర్లేదు..

ఇందాక మనం లెక్కెట్టిన నంబర్లవే.. ఒకటీ రెండు కాదు ఏకంగా 500 రకాల వంటలతో కొత్త అల్లుడికి స్వాగతం పలికిందో కుటుంబం. యానాం వర్తక సంఘం అధ్యక్షుడు మాజేటి సత్య భాస్కర్, వెంకటేశ్వరి దంపతులకు ఏకై కుమార్తె. పేరు హరిణ్య.. హరిణ్యకు గతేడాది ఘనంగా పెళ్లి జరిపించారు. విజయవాడకు చెందిన సాకేత్‌తో హరిణ్య పెళ్లి జరిగింది. సంక్రాంతి పండుగ రావటంతో కొత్త అల్లుడికి సత్య భాస్కర్ కుటుంబం పండుగకు ఆహ్వానించింది. అల్లుడు ఇంటికి వచ్చిన సందర్భంగా 500 రకాల వంటకాలతో ప్రత్యేక విందు ఏర్పాటు చేసింది.

స్వీట్లు, ఫ్రూట్లు, డ్రైఫ్రూట్స్, కూల్ డ్రింక్స్, పిండి వంటలు, శాకాహార వంటలు ఇలా మొత్తం 500 రకాల పదార్థాలు చిన్న చిన్న కప్పులలో ఉంచి.. విందు ఏర్పాటు చేశారు. వీటన్నింటినీ టేబుల్ మీద అందంగా అమర్చి కూతురూ అల్లుడిని ఇంటికి ఆహ్వానించారు. విందులో ఇన్ని వంటకాలు చూసి అల్లుడి గారికి మతిపోయింది. వంటకాలను చూసి సాకేత్ ఉబ్బితబ్బిబ్బయ్యారు. ఆ తర్వాత తీరిగ్గా ఒక్కొక్కటీ ఆరగించే పనిలో పడ్డారు.

అల్లుడు వస్తున్నాడంటే మర్యాద ఉంటుందని ఊహించానని.. కానీ ఇన్ని వంటకాలతో ప్రత్యేక విందు ఏర్పాటు చేస్తారని ఊహించలేదన్నారు. శాకాహారంలో ఇన్ని రకాల ఉంటాయని ఇప్పుడే తెలిసిందంటూ అత్త గారి మర్యాదకు ఉబ్బితబ్బిబ్బయ్యారు. మరోవైపు తమది ఉమ్మడి కుటుంబమన్న సత్యభాస్కర్.. మొదటి పండగకు వచ్చే కొత్త అల్లుడికి ఇలా ప్రత్యేక విందు ఏర్పాటు చేస్తుంటామన్నారు. ప్రస్తుతం ఈ వీడియో నెట్టింట వైరల్ అవుతోంది.