దేశ ప్రజలకు మకర సంక్రాంతి శుభాకాంక్షలు : ప్రధాని నరేంద్ర మోదీ
Andhra Pradesh Telugu | Suryaa Desk | Published : Tue, Jan 14, 2025, 09:57 AM
ప్రధాని నరేంద్ర మోదీ దేశ ప్రజలకు మకర సంక్రాంతి శుభాకాంక్షలు తెలిపారు. ప్రజలంతా పాడిపంటలు, సుఖసంతోషాలతో ఉండాలని ఆకాంక్షించారు. అందరికీ ఆనందం, మంచి ఆరోగ్యంతోపాటు, రాబోయే కాలం మరింత సుసంపన్నమైన పంట చేతికి అందాలని కోరుకుంటున్నానని పేర్కొన్నారు. సంక్రాంతి మన సంస్కృతి, వ్యవసాయ సంప్రదాయంలోనూ అంతర్భాగమైనదని అన్నారు. సంక్రాంతిని పురస్కరించుకొని కేంద్ర బొగ్గు, గనులశాఖ మంత్రి కిషన్‌రెడ్డి ఇంట సోమవారం నిర్వహించిన సంక్రాంతి సంబరాలలో ప్రధాని పాల్గొన్నారు. మోదీకి కిషన్‌రెడ్డి దంపతులు, సినీనటుడు చిరంజీవి, కేంద్ర మంత్రి శ్రీనివాసవర్మ తదితరులు సాదర స్వాగతం పలికారు. ఆ తర్వాత వేదపండితుల మంత్రోచ్ఛారణల మధ్య సంప్రదాయబద్ధంగా తులసికోటకు మోదీ పూజలు చేసిన అనంతరం భోగి మంట వెలిగించారు. గంగిరెద్దులకు ఆహారం అందించి వాటికి, వాటిని ఆడించేవారికి సంప్రదాయ వస్త్రాలు బహూకరించారు. అందుకు సంబంధించిన వీడియోను ప్రధాని మోదీ తాజాగా సోషల్‌ మీడియాలో పంచుకున్నారు.
|
|