ఏపీ రైతులకు మళ్లీ ఆ పథకం అమలు.. మంత్రి కీలక ప్రకటన

ఆంధ్రప్రదేశ్ రైతులకు వ్యవసాయ శాఖ మంత్రి కింజరాపు అచ్చెన్నాయుడు శుభవార్త చెప్పారు. గత టీడీపీ ప్రభుత్వ హయాంలో అమలు చేసిన ఓ పథకాన్ని తిరిగి అమలు చేయనున్నట్లు వెల్లడించారు. వ్యవసాయంలో రైతులకు యంత్ర పరికరాలు ఎంతగానో ఉపయోగపడతాయన్న అచ్చెన్నాయుడు.. వ్యవసాయ యాంత్రీకరణకు ఎన్డీయే కూటమి ప్రభుత్వం అధిక ప్రాధాన్యత ఇస్తుందని తెలిపారు. ఈ నేపథ్యంలోనే త్వరలో ఏపీ రైతాంగానికి రాయితీపై యంత్ర పరికరాలు అందిస్తామని ప్రకటించారు. గుంటూరులో ఓ ఎలక్ట్రిక్ ట్రాక్టర్ల షోరూమ్‌ను అచ్చెన్నాయుడు ప్రారంభించారు. అనంతరం మాట్లాడుతూ ఈ వ్యాఖ్యలు చేశారు. ఈ క్రమంలోనే వైసీపీపైనా విమర్శలు చేశారు. గత వైసీపీ అసమర్ధత పాలన వలన ఐదేళ్ల పాటు రైతులకు యంత్ర పరికరాలు అందలేదని ఆరోపించారు.

మరోవైపు 2014- 19 మధ్య టీడీపీ ప్రభుత్వం రైతులకు రాయితీపై యంత్ర పరికరాలు అందజేసింది. వ్యవసాయానికి ఉపయోగపడే ట్రాక్టర్లు, పవర్‌స్ప్రేయర్లు, టార్పాలిన్లు వంటి యంత్ర పరికరాలను అప్పటి టీడీపీ నేతృత్వంలోని ఏపీ ప్రభుత్వం రాయితీపై అందించింది. అయితే 2019 ఎన్నికల్లో వైసీపీ విజయం సాధించి అధికారం చేపట్టింది. అయితే వైసీపీ సర్కారు ఐదేళ్లలో ఈ పథకంపై అంతగా శ్రద్ధ సారించలేదని టీడీపీ ఆరోపిస్తోంది. ఈ క్రమంలోనే రైతుల కోసం ఈ పథకాన్ని తిరిగి అమలు చేస్తామని వ్యవసాయశాఖ మంత్రి అచ్చెన్నాయుడు ప్రకటించారు.

మరోవైపు 2014 నుంచి 2019 మధ్య గడ్డిని ముక్కలు చేసే యంత్రాలు, మినీ ట్రాక్టర్లు, ట్రాక్టర్లు, టార్పాలిన్లు వంటి వాటిని ప్రభుత్వం రాయితీపై అందించింది. రైతులు కొంత మేరకు నగదు చెల్లిస్తే మిగతా మొత్తం ప్రభుత్వమే భరిస్తూ రాయితీపై వీటిని అందజేస్తూ వచ్చింది. అది కూడా వ్యక్తిగతంగా రైతులకు ఇవ్వటంతో రైతులకు అవెంతో ఉపయోగకరంగా ఉండేవి. మరీ ముఖ్యంగా వర్షాకాలంలో పంట తడవకుండా టార్పాలిన్ పట్టలు రైతులకు బాగా ఉపయోగపడేవి. దీంతో ఈ పథకాన్ని మళ్లీ అమలు చేయాలని ఏపీ ప్రభుత్వం భావిస్తోంది.

 అయితే సంఘాలకు కాకుండా వ్యక్తిగతంగా రైతులకే ఇవ్వాలనే ఆలోచనలోనూ ఉన్నట్లు తెలుస్తోంది. ట్రాక్టర్లు, మినీట్రాక్టర్లు, టార్పాలిన్లుతో పాటుగా డ్రోన్లు కూడా రాయితీపై అందించే ఆలోచనలో టీడీపీ కూటమి సర్కారు ఉన్నట్లు తెలిసింది. వ్యవసాయంలో సాంకేతికతకు పెద్దపీట వేసేలా డ్రోన్లు కూడా అందించే ఆలోచన చేస్తున్నట్లు సమాచారం.