ఉదయాన్నే స్టేషన్‌కు వచ్చి..ఎస్ఐ ఆత్మహత్య

పశ్చిమగోదావరి జిల్లా తణుకు ఎస్సై ఎ.జి.ఎస్‌.మూర్తి ఆత్మహత్య చేసుకున్నారు. తణుకు రూరల్‌ పోలీస్ స్టేషన్‌లో మూర్తి ఎస్‌ఐగా విధులు నిర్వహిస్తున్నారు. అయితే ఎస్ఐ మూర్తిపై ఇటీవల పలు ఆరోపణలు వచ్చాయి. గేదెల అపహరణ కేసులో ఆరోపణలు రావటంతో ఉన్నతాధికారులు ఎస్ఐ ఏజీఎస్ మూర్తిపై చర్యలు తీసుకున్నారు. మూర్తిని సస్పెండ్ చేశారు. ప్రస్తుతం ఆయన వీఆర్‌లో ఉన్నారు. అయితే శుక్రవారం తణుకు రూరల్ పోలీస్ స్టేషన్‌కు వచ్చిన ఎస్ఐ మూర్తి ఎవరూ ఊహించని విధంగా బలవన్మరణానికి పాల్పడ్డారు.

పెనుగొండలో సీఎం చంద్రబాబు పర్యటించనున్నారు. ముఖ్యమంత్రి పర్యటన నేపథ్యంలో అధికారులు కట్టుదిట్టమైన భద్రతా ఏర్పాట్లు చేస్తున్నారు. ముఖ్యమంత్రి పర్యటన బందోబస్తుకు వెళ్లే క్రమంలో ఎస్ఐ మూర్తి శుక్రవారం ఉదయం తణుకు పోలీస్ స్టేషన్‌కు వచ్చారు. కొద్దిసేపు అక్కడే కూర్చున్న ఆయన అనంతరం వాష్‌రూమ్‌లోకి వెళ్లారు. బాత్‌రూమ్‍లో రివాల్వర్‌తో కాల్చుకుని మూర్తి ఆత్మహత్యకు పాల్పడ్డారు. బాత్ రూమ్‌లో నుంచి భారీ శబ్దం రావటంతో తణుకు రూరల్ పోలీస్ స్టేషన్‌లోని సిబ్బంది ఉలిక్కిపడ్డారు. భయంతో బాత్‌రూమ్ వద్దకు పరుగులు తీశారు. అక్కడకు వెళ్లి చూస్తే.. రక్తపు మడుగులో ఉన్న ఎస్సై మూర్తి కనిపించారు. ఈ విషయాన్ని వెంటనే ఉన్నతాధికారులకు చేరవేశారు.

అటు ఘటనా స్థలాన్ని ఉన్నతాధికారులు పరిశీలించారు. కుటుంబసభ్యులకు సమాచారం అందించారు. అనంతరం ఎస్ఐ మృతదేహాన్ని పోస్టుమార్టం కోసం ఆస్పత్రికి తరలించారు. మరోవైపు ఎస్ఐ మూర్తి ఆత్మహత్యను చూసి పోలీస్ స్టేషన్‌లో అతనితో కలిసి పనిచేసిన సిబ్బంది కలత చెందారు. ఎస్ఐ మూర్తితో ఉన్న పరిచయాన్ని గుర్తు చేసుకున్న తణుకు రూరల్ పోలీస్ స్టేషన్ సిబ్బంది భావోద్వేగానికి గురయ్యారు. ఎస్ఐ ఇలా బలవన్మరణానికి పాల్పడతారని ఊహించలేదంటూ ఆవేదన వ్యక్తం చేస్తు్న్నారు. మరోవైపు కుటుంబపెద్దను కోల్పోయామంటూ ఎస్ఐ మూర్తి కుటుంబం కన్నీరుమున్నీరుగా విలపిస్తున్నారు. అయితే స్టేషన్‌లోనే ఎస్ఐ బలవన్మరణానికి పాల్పడటం స్థానికంగా కలకలం రేపుతోంది.