వయసులో తనకంటే చిన్నవాడి కాళ్లు మొక్కిన మోదీ.. ఏకంగా మూడు సార్లు

ఢిల్లీలో మరో ఐదు రోజుల్లోనే అసెంబ్లీ ఎన్నికలు జరగబోతుండగా.. బీజేపీ పెద్ద ఎత్తున ప్రచారం చేస్తోంది. ఈక్రమంలోనే ఓటర్లను ఆకర్షించేందుకు గురువారం రోజు ఓ భారీ బహిరంగ సభను ఏర్పాటు చేసింది. ముఖ్యంగా ఈ కార్యక్రమానికి దేశ ప్రధాన మంత్రి నరేంద్ర మోదీ ముఖ్య అతిథిగా వచ్చారు. ఈక్రమంలోనే ఆయనను వేదికపైకి పిలవగా.. మరికొంత మంది అభ్యర్థులను సైతం స్టేజీ మీదకు పిలిచారు. ఈక్రమంలోనే పలువురు ప్రధాని వద్దకు వచ్చి పాదాలకు నమస్కరించబోయారు.

ముఖ్యంగా బీజేపీ అభ్యర్థి రవీందర్ సింగ్ నేగి.. ప్రధాని మోదీ పాదాలకు నమస్కారం చేశారు. కానీ వాళ్లు తన పాదాలు తాకడం ఏమాత్రం ఇష్ట పడని మోదీ.. వెంటనే లేచి వారిని అడ్డుకునే ప్రయత్నం చేశాడు. అప్పటికే తన కాళ్లకు నమస్కరించిన.. రవీందర్ సింగ్ నేగి పాదాలకు తిరిగి దండం పెట్టారు. అది కూడా ఒకటీ, రెండు సార్లు కాదు.. ఏకంగా మూడు సార్లు నమస్కరించారు. ఈక్రమంలోనే ఈ వీడియో నెట్టింట వైరల్‌గా మారింది. అయితే వయసులో మోదీ కంటే చిన్నవాడైన వ్యక్తికి.. ప్రధాని మూడు సార్లు దండం పెట్టడం చూసిన వారంతా అతడెవరో తెలుసుకునేందుకు పెద్ద ఎత్తున ఆసక్తి కనబరుస్తున్నారు.

రవీందరన్ సింగ్ నేగి ఢిల్లీ మున్సిపల్ కార్పొరేషన్ కౌన్సిలర్. పట్‌పర్‌గంజ్‌లోని వినోద్ నగర్‌కు ప్రాతినిథ్యం వహిస్తున్నారు. ముఖ్యంగా ఈసారి జరగబోయే ఢిల్లీ అసెంబ్లీ ఎన్నికల్లో కాంగ్రెస్ అభ్యర్థి అనిల్ కుమార్‌కు, ఆమ్ ఆద్మీ పార్టీ అభ్యర్థి అవధ్ ఓజాకు పోటీగా నిలబడ్డారు. అలాగే 2020లో జరిగిన అసెంబ్లీ ఎన్నికల్లో మాజీ డిప్యూటీ సీఎం మనీశ్ సిసోడియాకు ప్రత్యర్థిగా పోటీ చేసి.. కేవలం రెండు శాతం ఓట్ల తేడాతో ఓటమి పాలయ్యారు. చూడాలి మరి ఈ సారి ఎన్నికల్లో రవీందర్ సింగ్ నేగి విజయం సాధిస్తారా లేదా అనేది.