ఆరోగ్యానికి మంచిదని కొబ్బరి నీళ్లు ఎక్కువగా తాగుతున్నారా

కొబ్బరి నీళ్లు ఆరోగ్యానికి ఎంతో మేలు చేస్తుంది. కొబ్బరి నీళ్లు సహజంగా తీపిగా, తాజాగా, పోషకాలతో నిండి ఉంటుంది. ఇందులో విటమిన్లు, ఖనిజాలు, ఎలక్ట్రోలైట్లు, యాంటీ ఆక్సిడెంట్లు, పొటాషియం పుష్కలంగా ఉంటాయి. ఇవి శరీరాన్ని హైడ్రేటెడ్‌గా ఉంచడంలో, శక్తిని కాపాడటంలో సాయపడతాయి. శరీరంలో నీటి లోపాన్ని అధిగమించడానికి కొబ్బరి నీరు అద్భుత ఎంపిక. కొబ్బరి నీళ్లలో పొటాషియం అధికంగా ఉంటుంది, ఇది మీ శరీరం నుంచి అదనపు నీటిని, వ్యర్థ పదార్థాలను తొలగిస్తుంది.

కొబ్బరి నీళ్లలో యాంటీఆక్సిడెంట్లు కూడా మెండుగా ఉంటాయి, ఇవి కాలేయాన్ని ఆరోగ్యంగా ఉంచుతాయి. అయితే, ఆరోగ్య ప్రయోజనాలున్నప్పటికీ కొబ్బరి నీళ్లు ఎక్కువగా తాగకూడదు. కొబ్బరి నీళ్లు ఎక్కువగా తాగడం వల్ల కలిగే సైడ్ ఎఫెక్ట్స్ గురించి క్యాన్సర్ ఇమ్యునోథెరపిస్ట్ డాక్టర్ జమాల్ ఎ ఖాన్ సోషల్ మీడియాలో ఒక వీడియోను పోస్ట్ చేశారు. ఆయన ఏం చెప్పారో ఇక్కడ తెలుసుకుందాం.

వృద్ధులు జాగ్రత్త

కొబ్బరి నీటిని సాధారణంగా రీహైడ్రేటింగ్ పానీయంగా పరిగణిస్తారు . అందుకే వేసవిలో ప్రజలు దీనిని తమ ఆహారంలో భాగంగా చేసుకుంటారు. అయితే, వైద్యుల అభిప్రాయం ప్రకారం, కొబ్బరి నీళ్లు రోజూ తాగగలిగేంత ఆరోగ్యకరమైనవి కావు. ముఖ్యంగా వృద్ధులకు, ప్రతిరోజూ దీన్ని తాగడం హానికరం. ఇందులో అధిక మొత్తంలో పొటాషియం ఉంటుంది. కాబట్టి దీన్ని ఎక్కువగా తాగడం వల్ల శరీరంలో పొటాషియం పరిమాణం పెరుగుతుంది. ఇది గుండె పనితీరును ప్రభావితం చేస్తుంది.

కొబ్బరి నీళ్లు ఎంత మోతాదులో తాగాలి?

ముఖ్యంగా వృద్ధులు కొబ్బరి నీళ్ళు తక్కువ పరిమాణంలో తీసుకోవాలని డాక్టర్ వీడియోలో చెప్పారు. ఇందులో ఎక్కువ పొటాషియం ఉంటుంది. ఇది గుండె పనితీరుకు ఆటంకం కలిగిస్తుంది. అందుకే గుండె రోగులకు కొబ్బరి నీళ్లు ఆరోగ్యానికి మంచిది కాదని చెబుతామని ఆయన చెప్పారు. మీరు ఎండలో ఉంటే లేదా ఎక్కువగా చెమటలు పడుతుంటే, కొద్దిగా కొబ్బరి నీళ్లు తాగితే సరిపోతుంది. అంతేకానీ, రోజూ కొబ్బరి నీళ్లు తాగడం మంచిది కాదంటున్నారు డాక్టర్.

శరీరంలో పొటాషియం పెరిగితే ఏమవుతుంది?

వైద్యపరంగా హైపర్‌కలేమియా అని పిలువబడే అధిక పొటాషియం స్థాయిలు గుండె పనితీరుకు ఆటంకం కలిగిస్తాయి. ఇది క్రమరహిత హృదయ స్పందనలకు దారితీస్తుంది లేదా కొన్ని వైద్య పరిస్థితులు ఉన్నవారిలో తీవ్రమైన సమస్యలకు దారితీస్తుంది.

డాక్టర్ ఏం చెప్పారంటే

కిడ్నీ సమస్యలు ఉన్నవారు జాగ్రత్త

​కొబ్బరి నీళ్లలో పొటాషియం పరిమాణం చాలా ఎక్కువగా ఉంటుంది. ఒక కొబ్బరికాయలో దాదాపు 600 మి.గ్రా పొటాషియం ఉంటుంది. ఇది శరీరానికి చాలా అవసరం, కానీ మూత్రపిండాల సంబంధిత వ్యాధులు ఉన్నవారికి ఇది హానికరం. మూత్రపిండాల సమస్యలు ఉన్నవారు తమ శరీరాల ద్వారా అదనపు పొటాషియంను సరిగ్గా ఫిల్టర్ చేయలేరు. ఇది హైపర్‌కలేమియా (రక్తంలో అధిక స్థాయి పొటాషియం) కు దారితీస్తుంది. దీనివల్ల కండరాల బలహీనత, క్రమరహిత హృదయ స్పందన, తీవ్రమైన సందర్భాల్లో గుండెపోటు కూడా వచ్చే ప్రమాదం ఉందంటున్నారు నిపుణులు.

లోబీపీ వారు జాగ్రత్త

​కొబ్బరి నీళ్లు తాగడం వల్ల రక్తపోటు తగ్గుతుంది. అధిక రక్తపోటుతో బాధపడేవారికి ఇది ప్రయోజనకరంగా ఉంటుంది. అయితే, ఇప్పటికే తక్కువ రక్తపోటు ఉన్నవారు కొబ్బరి నీళ్లు ఎక్కువగా తీసుకోకూడదు. ఎక్కువ తీసుకోవడం ఆరోగ్యానికి హానికరం. కొబ్బరి నీళ్లు తీసుకోవడం వల్ల రక్తపోటు మరింత తగ్గుతుంది. ఇది తలతిరగడం, అలసట, మూర్ఛ వంటి సమస్యలకు దారితీస్తుంది. అందుకే లోబీపీ సమస్యతో బాధపడేవారు కొబ్బరి నీళ్లు తాగకండి.