కూటమి ప్రభుత్వం వైయస్‌ఆర్‌ పేరుపై కక్ష కట్టింది

ప్రజల గుండెల్లో చిరస్థాయిగా నిలిచిపోయిన మహానేత వైయస్‌ రాజశేఖర్‌రెడ్డి పేరును చూసి కూటమి సర్కార్‌ కలవరపడుతోందని వైయస్‌ఆర్‌సీపీ విశాఖజిల్లా అధ్యక్షుడు, మాజీ మంత్రి గుడివాడ అమర్నాథ్ అన్నారు. విశాఖపట్నం పార్టీ కార్యాలయంలో బుధ‌వారం ఆయ‌న‌ మీడియాతో మాట్లాడుతూ.. రాష్ట్రంలో వైయస్‌ఆర్‌ పేరు లేకుండా చేయాలనే దుర్మార్గమైన ఆలోచనతో కూటమి ప్రభుత్వం పనిచేస్తోందని మండిపడ్డారు. కూటమి పార్టీలు అధికారంలోకి వచ్చిన నాటి నుంచి వరుసగా వైయస్‌ఆర్‌ పేరు ఎక్కడ ఉంటే, అక్కడ దానిని తొలగిస్తున్నారని, ప్రజల గుండెల్లో ఉన్న మహానేత పేరును చెరిపేయగలరా అని ప్రశ్నించారు. అయన మాట్లాడుతూ.... కూటమి ప్రభుత్వం ఏర్పడిన తరువాత వైయస్‌ఆర్‌ కాంగ్రెస్ పార్టీని లేకుండా చేయాలి, వైయస్‌ఆర్‌ అనే బ్రాండ్ కనిపించకుండా చేయాల‌న్న కుతంత్రమే కనిపిస్తోంది. ప్రభుత్వం ఏర్పాటు చేయగానే నాగార్జున యూనివ‌ర్సిటీలో ఉన్న వైయస్‌ఆర్‌ విగ్ర‌హాన్ని నేల‌మ‌ట్టం చేశారు. బాప‌ట్ల జిల్లా వేమూరులో వైయస్‌ఆర్‌ విగ్రహానికి నిప్పంటించారు. చివ‌రికి అత్యంత ప్ర‌తిష్టాత్మ‌క‌మైన పీఎంపాలెంలోని అంత‌ర్జాతీయ క్రికెట్ స్టేడియంకి ఉన్న వైయస్‌ఆర్‌ పేరును తొల‌గించారు. విజయవాడ హెల్త్ యూనివ‌ర్సిటీకి వైయస్‌ఆర్‌ పేరును తీసేశారు. వైయ‌స్ జ‌గ‌న్ సీఎంగా ఉండ‌గా సీత‌కొండ‌ను అభివృద్ధి చేసి వైయస్‌ఆర్‌ వ్యూ పాయింట్ పెడితే అధికారంలోకి వ‌చ్చిన వెంట‌నే అత్యంత దుర్మార్గంగా దాన్ని కూడా తొల‌గించారు. వైయస్‌ఆర్‌ జిల్లా పేరును మార్చారు. రైతుల ప‌క్ష‌పాతిగా గుర్తింపు పొందిన వైయస్‌ఆర్‌ పేరును రైతు భ‌రోసా కేంద్రాలకు పెడితే, వాటిని పూర్తిగా నిర్వీర్యం చేశారు. చివరికి విజయవాడ సమీపంలోని తాడిగ‌డ‌ప మున్సిపాలిటీకి వున్న వైయస్‌ఆర్‌ పేరును కూడా తీసేశారు అని మండిపడ్డారు.