కొబ్బరి బొండంలో వున్నా గుజ్జుని పడేస్తున్నారా.....?

కొబ్బరి గుజ్జు అనేక ఆరోగ్య ప్రయోజనాలను కలిగి ఉంటుంది. కొబ్బరి గుజ్జులో మాంగనీస్, రాగి, సెలీనియం, పొటాషియం, భాస్వరం, ఐరన్ వంటి ఖనిజాలు పుష్కలంగా ఉంటాయి. ఇవి శరీరంలోని అన్ని అవయవాల సమగ్ర ఆరోగ్యానికి సహాయపడతాయి. ముఖ్యంగా జీర్ణక్రియను మెరుగుపరచడంలో ఈ ఖనిజాలు ముఖ్యపాత్ర పోషిస్తాయి. క్రమం తప్పకుండా కొబ్బరి గుజ్జును తినడం వల్ల శరీరానికి కావాల్సిన పోషకాలు లభిస్తాయి. కొబ్బరి గుజ్జులో ఉన్న ఫైబర్, మంచివైన కొవ్వులు శరీర బరువును తగ్గించడంలో కీలక పాత్ర పోషిస్తాయి. గుజ్జు తిన్నప్పుడు అది కడుపు నిండిన అనుభూతిని కలిగిస్తుంది. దీంతో తక్కువ మోతాదులో ఆహారాన్ని తీసుకుంటాం. ఈ కారణంగా ఇది బరువు తగ్గడంలో సహాయపడే ఒక సహజమైన ఆహారంగా మారుతుంది. అధిక బరువు సమస్య ఉన్నవారు కొబ్బరి గుజ్జును తింటే దాని ఫైబర్, కొవ్వుల కారణంగా క్రమంగా బరువు తగ్గవచ్చు. కొబ్బరిలో ఉండే యాంటీఆక్సిడెంట్లు, శోథ నిరోధక లక్షణాలు రోగనిరోధక శక్తిని పెంచడంలో సహాయపడతాయి. ఇవి శరీరంలోని వ్యాధి కారకాల నుండి మనల్ని రక్షిస్తాయి. కొబ్బరి గుజ్జులోని ఆక్సిడేటివ్ స్ట్రెస్ కు వ్యతిరేకంగా పనిచేసే యాంటీఆక్సిడెంట్లు, శరీర రోగనిరోధక శక్తిని సమర్థవంతంగా పెంచుతాయి. కొబ్బరి నీటిని తాగిన తరువాత గుజ్జును తినడం వల్ల శరీరానికి తక్షణ శక్తి లభిస్తుంది.

కొబ్బరి గుజ్జులో విటమిన్లు, ఇతర పోషకాలు పుష్కలంగా ఉంటాయి. ఇవి జీర్ణక్రియకు అనుకూలంగా పనిచేస్తాయి. ముఖ్యంగా పచ్చి కొబ్బరిని తింటే అందులోని కొవ్వులు చిన్న ప్రేగు ద్వారా శరీరంలోకి గ్రహించబడి తక్షణ శక్తిగా మారతాయి. ఈ శక్తి జీర్ణక్రియను మెరుగుపరచి పేగు ఆరోగ్యాన్ని కాపాడుతుంది. కొబ్బరిలోని యాంటీమైక్రోబయల్ లక్షణాలు నోటి ఆరోగ్యాన్ని మెరుగుపరచడంలో సహాయపడతాయి. ఇవి నోటి నుండి ఇన్ఫెక్షన్లను, బ్యాక్టీరియాలను తొలగించి దంతాలు, చిగుళ్లను బలపరుస్తాయి. పచ్చి కొబ్బరి తినడం వల్ల నోటి లోపలి ఆరోగ్యం మెరుగయ్యి కావిటీలను నివారించవచ్చు. వేసవిలో పచ్చి కొబ్బరి తినడం శరీరానికి చల్లదనాన్ని అందిస్తుంది. ఇది శరీరానికి తక్షణ శక్తిని పునరుద్ధరించి, శరీరాన్ని చల్లగా ఉంచుతుంది. కొబ్బరి గుజ్జు తినడం ద్వారా శరీరానికి కావాల్సిన హైడ్రేషన్ లభిస్తుంది. ఇది శరీరంలోని తేమను నిల్వచేస్తుంది. ఇది మీ శరీరానికి రిఫ్రెషింగ్ అనుభూతిని కలిగిస్తుంది. అందుకే ఈసారి కొబ్బరి నీళ్లు తాగినప్పుడు నీళ్లతో పాటు కొబ్బరి గుజ్జుని కూడా తినండి.