గోల్డ్ బాండ్లపై అదిరిపోయే రిటర్న్స్

బంగారం ధర దేశంలో రోజురోజుకూ విపరీతంగా పెరుగుతున్న సంగతి తెలిసిందే. ఇప్పుడు మాత్రం గరిష్ట స్థాయిల నుంచి గోల్డ్ రేట్లు వరుసగా 2 రోజులుగా తగ్గాయి. బంగారం ధరలు భారీగా పెరుగుతున్న క్రమంలో.. వీటిల్లో గతంలో పెట్టుబడులు పెట్టిన వారికి మంచి రిటర్న్స్ వస్తున్నాయని చెప్పొచ్చు. బంగారంపై ఇన్వెస్ట్ చేసేందుకు.. అందుబాటులో ఉన్న బెస్ట్ పెట్టుబడి పథకాల్లో సావరిన్ గోల్డ్ బాండ్ స్కీమ్ ఒకటన్న సంగతి తెలిసిందే. ఇక్కడ ముందుగా బంగారం యూనిట్లను కొనుగోలు చేసి ఆన్‌లైన్‌లోనే ఇన్వెస్ట్ చేయాల్సి ఉంటుంది. ఒక్క గ్రామును ఒక్కో యూనిట్‌గా పరిగణిస్తారు. కనీసం ఒక గ్రాము నుంచి బంగారం కొనుగోలు చేయొచ్చు. ఆన్‌లైన్‌లో కొనుగోలు చేస్తే.. గ్రాముపై రూ. 50 డిస్కౌంట్ లభిస్తుంది. వీటికి వడ్డీ కూడా అందిస్తుంది. ఇక బంగారం ధర పెరిగితే.. ఇక్కడ రిటర్న్స్ దానికి అనుగుణంగా ఉంటాయి.

సావరిన్ గోల్డ్ బాండ్స్ స్కీమ్ కాల పరిమితి 8 సంవత్సరాలుగా ఉండగా.. 5 సంవత్సరాలు దాటాక ముందస్తుగానే విత్‌డ్రా చేసుకోవచ్చు. ఇప్పుడు గతంలో జారీ చేసిన గోల్డ్ బాండ్ల ప్రీమెచ్యూర్ రిడెంప్షన్ తేదీలు వచ్చే నెలలో ఉన్నాయి. గోల్డ్ రేట్లు ప్రస్తుతం ఆల్ టైమ్ గరిష్ట స్థాయిల్లో ఉన్న నేపథ్యంలో.. బంగారంపై మంచి రిటర్న్స్ వస్తున్నాయని చెప్పొచ్చు. ఈ క్రమంలోనే 2017-18 సమయాల్లో బాండ్లు కొనుగోలు చేసిన వారికి ఇప్పుడు డబుల్ రిటర్న్స్ అందబోతున్నాయి.

గోల్డ్ బాండ్ 2017-18 సిరీస్- III ని 2017, అక్టోబర్ 16న జారీ చేయగా.. అప్పుడు గ్రాము బంగారం ధర రూ. 2956గా ఉంది. ఇక ఇప్పుడు ప్రస్తుత ధరతో చూస్తే గ్రాముపై రూ. 8,841 పొందే అవకాశం ఉంది. 2025, ఏప్రిల్ 16 రిడెంప్షన్ తేదీగా ఉంది. దాదాపు మూడింతల మేర లాభం వచ్చే అవకాశాలు ఉన్నాయి. ఇక్కడ 199 శాతం రాబడి ఆశిస్తున్నారు. ఇక్కడ వడ్డీ రేటు కాకుండానే. వడ్డీ రేటుతో చూస్తే ఇంకా ఎక్కువే రాబడి వస్తుందని చెప్పొచ్చు.

మరోవైపు 2017-18 సిరీస్ IV .. 2017, అక్టోబర్ 23న లాంఛ్ కాగా.. ఏప్రిల్ 23న రిడెంప్షన్ డేట్‌గా ఉంది. అప్పుడు గ్రాము బంగారం ధర రూ. 2,987 గా ఉంది. వడ్డీ లెక్కలోకి తీసుకోకుండా ఇక్కడ 195 శాతం రాబడి పొందే అవకాశం ఉందని భావిస్తున్నారు. 2017-18 సిరీస్ V ని.. 2017 అక్టోబర్ 30న జారీ చేయగా.. రిడెంప్షన్ తేదీ ఏప్రిల్ 30న ఉంది. అప్పుడు ఇక్కడ గ్రాము బంగారం ధర రూ. 2,971 కాగా.. 197 శాతం రాబడికి అవకాశాలు ఉన్నాయి.

ఎస్జీటీ పథకం ప్రకారం.. తిరిగి చెల్లించే తేదీకి ముందున్న మూడు రోజుల 999 స్వచ్ఛత కలిగిన బంగారం ధరల సగటు ఆధారంగా ప్రీమెచ్యూర్ రిడెంప్షన్ ప్రైస్ లెక్కిస్తారు. ఈ ధరను ఇండియా బులియన్ అండ్ జ్యువెలర్స్ అసోసియేషన్ లిమిటెడ్ ప్రకారం తీసుకుంటారు. ఉదాహరణకు, మార్చి 21న బంగారం ధర రూ. 88,169గా ఉంది. మార్చి 20న రూ. 88,506గా, మార్చి 19న రూ. 88,649గా నమోదైంది. ఈ మూడు రోజుల ధరలను సగటు చేస్తే, బంగారం ధర సుమారుగా రూ. 88,441 అవుతుంది. ఒకవేళ ఈ రోజు ప్రీమెచ్యూర్ రిడెంప్షన్ జరిగితే.. ఎస్జీటీ పెట్టుబడిదారుడు ఒక గ్రాము బంగారంపై రూ. 8,841 పొందే అవకాశం ఉంది.