ఏపీలో అల్యూమినియం స్మెల్టర్.. కేంద్రం వద్దకు ప్రతిపాదన

ఆంధ్రప్రదేశ్ రాష్ట్రం పారిశ్రామిక అభివృద్ధి దిశగా అడుగులు వేస్తున్నాయి. ఈ క్రమంలోనే ఏపీలో పెట్టుబడులు పెట్టేందుకు పలు సంస్థలు ముందుకు వస్తున్న సంగతి తెలిసిందే. విద్యా, వ్యాపార రంగాలలో ఏపీకి పెట్టుబడులు వస్తున్నాయి. తాజాగా బిట్స్ పిలానీ కూడా అమరావతిలో క్యాంపస్ ఏర్పాటు చేసేందుకు ముందుకు వచ్చింది. ఈ క్రమంలోనే ఆంధ్రప్రదేశ్ రాష్ట్రానికి మరో భారీ పరిశ్రమ రానుందా అంటే అవుననే సమాధానాలు వినిపిస్తున్నాయి. ఈ మేరకు రాష్ట్ర ప్రభుత్వం నుంచి కేంద్ర ప్రభుత్వం వద్దకు ప్రతిపాదన చేరింది. దీనిపై కేంద్రం నిర్ణయం తీసుకోవడమే తరువాయి. ప్రస్తుతం ఢిల్లీలో ఆంధ్రప్రదేశ్ పరపతి బాగా పెరిగిన నేపథ్యంలో.. ఈ ప్రాజెక్టు కూడా వచ్చే అవకాశాలు ఉన్నాయని రాజకీయ విశ్లే్షకులు అభిప్రాయపడుతున్నారు.

ఇక అసలు విషయానికి వస్తే ఏపీ మంత్రి కొండపల్లి శ్రీనివాస్.. కేంద్ర గనుల శాఖ మంత్రి కిషన్ రెడ్డిని తాజాగా కలిశారు. ఈ సందర్భంగా విజయనగరం జిల్లాలో అల్యూమినియం స్మెల్టర్ ఏర్పాటు చేసేలా చూడాలని కోరారు. నేషనల్ అల్యూమినియం కంపెనీ (నాల్కో) ద్వారా విజయనగరంలో గ్రీన్‌ఫీల్డ్ అల్యూమినియం స్మెల్టర్ ఏర్పాటు చేసేలా చర్యలు తీసుకోవాలని మంత్రి కొండపల్లి శ్రీనివాస్.. కేంద్ర మంత్రి కిషన్ రెడ్డికి వినతి పత్రం సమర్పించారు. విజయనగరం జిల్లా.. ఒడిశాలోని దమంజోడి అల్యూమినియం రిఫైనరీకి సమీపంలోనే ఉందని.. ఇక్కడ అల్యూమినియం స్మెల్టర్ ఏర్పాటు చేస్తే.. ముడిసరుకు సరఫరా ఖర్చులు తగ్గుతాయని వివరించారు. అలాగే విజయనగరం జిల్లాలో చాలా మందికి ఉపాధి దక్కుతుందని కేంద్ర మంత్రికి వివరించారు. దీనిపై కిషన్ రెడ్డి సానుకూలంగా స్పందించినట్లు సమాచారం.

అల్యూమినియం స్మెల్టర్‌లో.. బాక్సైట్ నుంచి అల్యూమినియం లోహాన్ని ఉత్పత్తి చేస్తారు. బాక్సైట్‌ను శుద్ధి చేయడం ద్వారా తొలుత అల్యూమినాను తయారుచేస్తారు. అనంతరం ఎలక్ట్రోలైసిస్ ద్వారా ఈ అల్యూమినాను అల్యూమినియం లోహంగా మార్చుతారు. అల్యూమినియం తేలికగా ఉండటమే కాకుండా.. బలంగా, తుప్పుపట్టకుండా ఉండే లోహం. ఈ కారణంగా పరిశ్రమలలో అల్యూమినియం వినియోగం ఎక్కువ. ముఖ్యంగా విమాన రంగం, ఆటోమొబైల్ రంగం, నిర్మాణ రంగాలలో అల్యూమినియం వాడకం ఎక్కువ. అలాగే ప్యాకేజింగ్ మెటీరియల్, వైర్లు, కండక్టర్లు వంటివి అల్యూమినియం ద్వారా తయారుచేస్తారు. విజయనగరం గ్రీన్‌ఫీల్డ్ అల్యూమినియం స్మెల్టర్ ఏర్పాటుకు కేంద్రం ఆమోదం తెలిపితే ఈ ప్రాంతంలో ఉద్యోగ, ఉపాధి అవకాశాలు మెరుగవుతాయి.