అమెరికాలో హైదరాబాద్ విద్యార్థిని మృతి

ఉన్నత చదువులు, మంచి భవిష్యత్తు కోసం అమెరికా వెళ్లిన యువతి ఆశలు అడియాసలు అయ్యాయి. పెద్ద చదువులు చదివి.. మంచి ఉద్యోగం తెచ్చుకుని.. తల్లిదండ్రులను గర్వపడేలా చేయాలనుకున్న యువతి.. వారికి జీవితాంతం తీరని విషాదాన్ని బహుమతిగా ఇచ్చింది. అగ్రరాజ్యంలో గొప్ప కొలువు సాధించి.. తనలాంటి ఆడపిల్లలు, వారి తల్లిదండ్రులకు ఆదర్శంగా నిలవాలని భావించిన యువతి.. తన కలలు సాకారం కాకుండానే కానరాని లోకాలకు పయనం అయ్యింది. బంగారు భవిష్యత్తు గురించి కలలు కంటూ అగ్రరాజ్యం చేరుకున్న ఆమె.. అన్యాయంగా బలయ్యింది. ఆ వివరాలు..

ఉన్నత చదువుల కోసం అమెరికా వెళ్లిన హైదరాబాద్ విద్యార్థిని ఒకరు.. అక్కడ చోటు చేసుకున్న ప్రమాదంలో తీవ్రంగా గాయపడి ప్రాణాలు విడిచింది. ఆ వివరాలు.. మేడ్చల్ జిల్లా గండిమైసమ్మ చౌరస్తా సమీపంలోని శ్రీకృష్ణానగర్‌లో నివాసం ఉంటున్న శ్రీనివాస్ వర్మ డ్రైవర్‌గా పని చేస్తుండగా.. అతడి భార్య హేమలత ఓ ప్రైవేటు కంపెనీలో పని చేస్తూ ఉండేది. శ్రీనివాస్ వర్మ దంపతులకు ఇద్దరు కుమార్తెలు సంతానం ఉన్నారు. శ్రీజా వర్మ , శ్రేయా వర్మ. వాస్తవానికి శ్రీనివాస్ వర్మ స్వస్థలం సిద్దిపేట జిల్లా రామారుకల గ్రామం. అయితే జీవనోపాధి కోసం.. వారు కొన్నేళ్ల క్రితం హైదరాబాద్‌కు వలస వచ్చారు. ప్రైవేటు ఉద్యోగాలు చేసుకుంటూ.. పిల్లలను చదివిస్తూ.. ఇక్కడే ఉంటున్నారు. ఈక్రమంలో శ్రీనివాస్ వర్మ పెద్ద కుమార్తె శ్రీజా వర్మ... ఉన్నత చదువుల కోసం అమెరికా వెళ్లింది. కొన్నాళ్ల క్రితమే ఎంఎస్ పూర్తి చేసి.. ప్రస్తుతం ఉద్యోగ ప్రయత్నాల్లో ఉంది. మంచి ఉద్యోగం సాధించి.. తల్లిదండ్రులను గర్వ పడేలా చేయాలని భావించిన శ్రీజా వర్మ.. ఆ కల సాకారం కాకుండానే కన్ను మూసింది.

భారత కాలమానం ప్రకారం.. రెండు రోజుల క్రితం అనగా.. సోమవారం నాడు రాత్రి తన అపార్ట్‌మెంట్ నుంచి బయటకు వచ్చిన శ్రీజా వర్మ భోజనం చేయడం కోసం కారులో రెస్టారెంట్‌కు వెళ్లింది. తిన్న తర్వాత తిరిగి తన అపార్ట్‌మెంట్‌కు తిరిగి వస్తుండగా.. ఆమె కారుని ఓ ట్రక్కు ఢీకొట్టింది. ఈప్రమాదంలో శ్రీజా వర్మ తీవ్రంగా గాయపడి చనిపోయింది.

ప్రమాదం చోటు చేసుకున్న సమయంలో కారులో శ్రీజా వర్మతో పాటుగా ఆమె స్నేహితులు కూడా ఉన్నట్లు సమాచారం. వారికి కూడా గాయాలు అయినట్లు తెలుస్తోంది. ఇదిలా ఉంటే శ్రీనివాస్ వర్మ చిన్న కుమార్తె శ్రేయా వర్మ కూడా కొన్ని రోజుల క్రితమే అమెరికా వెళ్లింది. ఆమె కూడా అమెరికాలో ఎంఎస్ చేయడం కోసం 20 రోజుల క్రితమే యూఎస్ వెళ్లినట్లు బంధువులు చెప్పుకొచ్చారు. ఎంఎస్ పూర్తి చేసిన కుమార్తె.. త్వరలోనే మంచి ఉద్యోగం సంపాదించి తమను గర్వపడేలా చేస్తుందని భావించిన శ్రీజా వర్మ తల్లిదండ్రులు.. కానరాని లోకాలకు వెళ్లిన బిడ్డను తలుచుకుని కన్నీరుమున్నీరు అవుతోంది.