ఇంట్లో కూర్చొని పాఠాలు వినొచ్చు, మొబైల్ ఉంటే చాలు

ఆంధ్రప్రదేశ్‌లో విద్యార్థులు అనారోగ్యం, ఇతర కారణాలతో స్కూల్‌కు వెళ్లలేకపోతారు. అయితే విద్యార్థులు స్కూల్‌‌లో టీచర్లు చెప్పిన పాఠాలు మిస్ చేసుకున్నాము.. చదువులో వెనుకపడ్డాము అనే టెన్షన్ అవసరం లేదు.. జస్ట్ మొబైల్ ఉంటే చాలు పాఠాలు ఎంచక్కా నేర్చుకోవచ్చు. రాష్ట్రవ్యాప్తంగా ప్రభుత్వ పాఠశాలల్లో చదివే విద్యార్థుల కోసం కూటమి ప్రభుత్వం ఈ కొత్త విధానాన్ని తీసుకొచ్చింది. ప్రైవేటు స్కూళ్లకు పోటీగా విద్యను అందించడానికి ప్రభుత్వం ఈ ఏడాది ఈ సంస్కరణను అమలు చేస్తోంది. విద్యార్థులకు అందజేసిన పాఠ్యపుస్తకాలపై క్యూఆర్‌ కోడ్‌లను ప్రవేశపెట్టింది.

స్కూల్‌లో పాఠాలు మిస్ చేసుకున్న, కొంతమంది విద్యార్థులు సరిగ్గా బడికి వెళ్లి పాఠాలు వినకపోతే చదువులో వెనుకబడతారని ప్రభుత్వం గుర్తించింది. అందుకే వారి కోసం "దీక్ష" అనే యాప్‌ను అందుబాటులో ఉంది. ఈ యాప్ ద్వారా పాఠాలను సులువుగా నేర్చుకోవచ్చు. ఒకటి నుంచి పదో తరగతి వరకు విద్యార్థుల కోసం సరఫరా చేసిన పుస్తకాలపై క్యూఆర్‌ కోడ్‌లను ముద్రించారు. దీక్ష యాప్‌ను డౌన్‌లోడ్ చేసుకుని.. ఈ క్యూ ఆర్ కోడ్‌ను స్కాన్ చేసి అర్థం కాని పాఠాలను చదువుకోవచ్చు. ఈ యాప్‌లో ఎన్‌సీఈఆర్టీ, రాష్ట్ర సిలబస్‌ పుస్తకాలు కూడా అందుబాటులో ఉన్నాయి.

విద్యార్థులకు పాఠాలతో పాటుగా ఆడియో, వీడియో, క్విజ్, అసైన్‌మెంట్‌ వంటి సౌకర్యాలు కూడా అందుబాటులో ఉన్నాయి. ప్రత్యేక అవసరాలు ఉన్న పిల్లల కోసం ఆడియో పాఠాలతో పాటుగా10 వేల పదాలు ఉన్న డిక్షనరీ కూడా ఉంది. ఈ యాప్ కోసం విద్యార్థులు ప్లేస్టోర్‌కు వెళ్లాలి.. దీక్ష యాప్ డౌన్‌లోడ్ చేసుకుని.. అక్కడ విద్యార్థిని అడిగే సమాచారం, ఇతర వివరాలు నమోదు చేయాల్సి ఉంటుంది. ఆ తర్వాత యాప్‌ ద్వారా విద్యార్థులకు స్కూళ్లలో ఉచితంగా పంపిణీ చేసిన పుస్తకాల్లో మెయిన్ పేజీపై ఉండే క్యూఆర్‌ కోడ్‌ను స్కాన్‌ చేయాలి. అప్పుడు ఆ పాఠాల వివరాలు కనిపిస్తాయి.. చక్కగా చదువుకోవచ్చు. పాఠాలు అర్థంకాని వారు, స్కూల్‌కు వెళ్లలేకపోయినవారు ఈ యాప్ డౌన్‌లోడ్ చేసుకుని పాఠాలను నేర్చుకోవచ్చు అంటున్నారు.