ఏపీలో అక్కడ కొత్త బస్టాండ్ నిర్మాణం.. నెరవేరనున్న దశాబ్దపు కల

భారతదేశానికి స్వాతంత్య్రం సిద్ధించి 75 ఏళ్లు దాటిపోయినా.. కనీస సౌకర్యాలు ఎరుగని గ్రామాలు ఎన్నో. అభివృద్ధికి ఆమడ దూరంలో నిలిచిపోయిన ఊర్లు ఎన్నో.. ప్రభుత్వాలు అనేక సంక్షేమ కార్యక్రమాలు అమలు చేస్తున్నా వాటి ఫలితాలు అందని లబ్ధిదారుల ఎంతో మంది ఉంటారు. మరీ ముఖ్యంగా ఏజెన్సీ ప్రాంతాల్లో ఈ పరిస్థితులు ఎక్కువగా కనిపిస్తుంటాయి. అల్లూరి సీతారామరాజు జిల్లాకు సంబంధించి తమ ప్రాంతంలో బస్టాండ్ ఏర్పాటు చేయాలంటూ ఎటపాక స్థానికులు ఎప్పటి నుంచో కోరుతున్నారు. సుమారుగా దశాబ్దకాలంగా ఈ డిమాండ్ ఉంది. అయితే ఎట్టకేలకు వారికి ప్రభుత్వం గుడ్ న్యూస్ వినిపించింది.

ఈ ప్రాంతంలోని విలీన మండలాల వాసులు నిత్యం తెలంగాణలోని భద్రాచలానికి రాకపోకలు సాగిస్తూ ఉంటారు. విద్య, వైద్యం సహా ఇతరత్రా పనుల కోసం భద్రాచలం వెళ్లి వస్తుంటారు. అయితే ముంపు గ్రామాల బస్సులు కేవలం భద్రాచలం వరకే రాకపోకలు సాగిస్తూ ఉంటాయి. ఎటపాక మండలంలోని ఐదు పంచాయతీలకు వెళ్లాలంటే తెలంగాణ మీదుగానే రాకపోకలు సాగించాలి. ఈ నేపథ్యంలో ఎటపాకలో బస్టాండ్ నిర్మించాలని కొన్నేళ్లుగా ఇక్కడి ప్రజలు కోరుతున్నారు. ఎట్టకేలకు ప్రభుత్వం నుంచి బస్టాండ్ ఏర్పాటు కోసం గ్రీన్ సిగ్నల్ రావటంతో.. విలీన మండలాల వాసులు హర్షం వ్యక్తం చేస్తున్నారు.

మరోవైపు ఉమ్మడి ఆంధ్రప్రదేశ్ రాష్ట్రం నుంచి తెలంగాణ ప్రత్యేక రాష్ట్రంగా ఏర్పడిన తర్వాత భద్రాచలం గ్రామీణ ప్రాంతాన్ని ఆంధ్రప్రదేశ్‌లో కలిపారు. దీంతో విలీన గ్రామాలతో ఎటపాక మండలం ఏర్పాటు చేశారు. ఇక విలీన మండలాల ప్రజల ఇబ్బంది, విజ్ఞప్తులను దృష్టిలో ఉంచుకుని చింతూరులో బస్టాండ్ నిర్మించారు. ప్రస్తుతం గోకవరం డిపో నుంచి భద్రాచలం వరకు బస్సులు నడుస్తున్నాయి. అయితే ఎటపాక మండల కేంద్రంలో బస్టాండ్ ఏర్పాటు చేయాలంటూ ఎటపాక ప్రజలు గతంలో పలుమార్లు ప్రభుత్వ అధికారులు వినతులు అందించారు. అయితే ప్రయోజనం లేకుండా పోయింది.

అయితే టీడీపీ కూటమి ప్రభుత్వం ఏపీలో మహిళలకు ఉచిత బస్సు ప్రయాణ సౌకర్యం కల్పిస్తున్న సంగతి తెలిసిందే. స్త్రీశక్తి పథకంలో భాగంగా రాష్ట్రవ్యాప్తంగా మహిళలకు ఉచిత బస్సు ప్రయాణం అందిస్తున్నారు. అయితే ఎటపాక మండలంలో బస్టాండు లేకపోవటంతో స్థానిక మహిళలు ఇబ్బందులు పడుతున్నారు. ఈ నేపథ్యంలో ప్రభుత్వం స్పందించింది. ఎటపాకలో బస్టాండు ఏర్పాటుకు గ్రీన్ సిగ్నల్ ఇచ్చింది. ఆ మేరకు ఆదేశాలు జారీ చేసింది. దీంతో ఆర్టీసీ రాజమహేంద్రవరం రీజనల్ మేనేజర్ ఇతర అధికారులు ఇటీవల ఎటపాకలో బస్టాండ్ నిర్మాణానికి స్థల పరిశీలన చేశారు. దీంతో ఈ ప్రాంతవాసుల పదేళ్ల ఎదురుచూపులకు తెరపడినట్లైంది.