నీటికుంటలో మునిగి ఆరుగురు విద్యార్థులు మృతి

కర్నూలు జిల్లాలో ఘోర విషాదం చోటుచేసుకుంది. నీటికుంటలో మునిగి ఆరుగురు విద్యార్థులు చనిపోయారు. కర్నూలు జిల్లా ఆస్పర్తి మండలంలోని చిగిలిలో ఈ దుర్ఘటన జరిగింది. చనిపోయిన వారందరూ ఐదో తరగతి చదువుతున్న విద్యార్థులుగా గుర్తించారు. అయితే నీటికుంటలో స్నానానికి దిగి వీరంతా చనిపోయినట్లు తెలుసింది. అప్పటి వరకూ ఆడుతూ పాడుతూ తమ ముందు తిరిగిన వారు విగతజీవులుగా మారడంతో ఆ విద్యార్థుల కుటుంబాలు గుండెలు పగిలేలా రోదిస్తున్నాయి.

చనిపోయిన చిన్నారులు అందరూ చిగిలి ప్రాథమిక పాఠశాలలో ఐదో తరగతి చదువుతున్నారు. మొత్తం ఏడుగురు విద్యార్థులు కలిసి.. ఊరి చివర కొండ మీద ఉన్న నీటికుంటలో ఈత కొట్టే్ందుకని బుధవారం స్కూలు ముగిశాక బయల్దేరి వెళ్లారు. అయితే.. అల్పపీడనాల ప్రభావంతో రాష్ట్రవ్యాప్తంగా విస్తారంగా వర్షాలు కురుస్తున్న సంగతి తెలిసిందే. ఈ క్రమంలోనే కొండపై ఉన్న నీటి కుంటలోకి భారీగా నీరు చేరింది. ఈ విషయం తెలియని విద్యార్థులు.. ఈత కోసమని నీటికుంటలోకి దిగి.. లోతు ఎక్కువ కావటంతో కుంటలో మునిగిపోయినట్లు తెలుస్తోంది. మొత్తం ఆరుగురు విద్యార్థులు ఇలా నీటికుంటలో మునిగిపోయారు. మిగిలిన మరో విద్యార్థి ఊర్లోకి వెళ్లి ప్రమాదం గురించి స్థానికులకు తెలియజేశాడు.

దీంతో చిగిలి గ్రామస్థులు కొండ మీదకు చేరుకునే సరికే.. ఘోరం జరిగిపోయింది. మొత్తం ఆరుగురు విద్యార్థులు నీటిలో మునిగి ప్రాణాలు కోల్పోయారు. ఒకే గ్రామంలోని ఆరుగురు విద్యార్థులు ఒకే రోజు ఇలా ఊహించని రీతిలో చనిపోవటంతో ఆ గ్రామంలో విషాద ఛాయలు అలుముకున్నాయి. పోస్టుమార్టం నిమిత్తం మృతదేహాలను ఆస్పత్రికి తరలించారు. ఆస్పత్రి ప్రాంగణంలో విద్యార్థుల తల్లిదండ్రుల ఆర్తనాదాలతో విషాదకర వాతావరణ నెలకొంది. మరోవైపు ఈ ఘటనపై పోలీసులు కేసు నమోదు చేసుకుని దర్యాప్తు చేపట్టారు.

మరోవైపు భారీ వర్షాల నేపథ్యంలో వాగులు, వంకలు, కుంటల సమీపంలోకి వెళ్లవద్దంటూ అధికారులు హెచ్చరిస్తున్న సంగతి తెలిసిందే. అల్పపీడనం కారణఁగా రాష్ట్రంలో పలుచోట్ల భారీ వర్షాలు కురుస్తుండగా.. వాగులూ వంకలు పొంగిపొర్లుతున్నాయి. దీంతో ప్రజలు అప్రమత్తంగా వ్యవహరించాలంటూ విపత్తు నిర్వహణ సంస్థ ప్రతి రోజూ హెచ్చరికలు జారీ చేస్తోంది. అయితే ఈత సరదా ఆరుగురు విద్యార్థుల నిండుప్రాణాలు బలిగొనటం స్థానికులను తీవ్రంగా కలిచివేస్తోంది.