ఆర్ఎస్ఎస్ గీతం పాడటంపై స్పష్టతనిచ్చిన డీకే శివకుమార్

డీకే శివకుమార్ పుట్టుకతోనే కాంగ్రెస్‌వాడినని, జీవితాంతం ఆ పార్టీలోనే కొనసాగుతానని కర్ణాటక ఉప ముఖ్యమంత్రి, పీసీసీ అధ్యక్షుడు డీకే శివకుమార్ స్పష్టం చేశారు. అసెంబ్లీలో నిన్న ఆర్ఎస్ఎస్ గీతం 'నమస్తే సదా వత్సలే మాతృభూమి' ఆలపించడంతో ఆయన బీజేపీలో చేరబోతున్నారనే ఊహాగానాలు వ్యాపించాయి. ఈ ప్రచారంపై ఆయన శుక్రవారం విధానసౌధలో మీడియాతో మాట్లాడుతూ పూర్తిస్థాయిలో స్పష్టత ఇచ్చారు.బీజేపీ, లేదా రాష్ట్రీయ స్వయంసేవక్ సంఘ్  తో చేతులు కలిపే ప్రసక్తే లేదని శివకుమార్ తేల్చి చెప్పారు. "నేను నికార్సయిన కాంగ్రెస్ వాడిని. నా జీవితం, నా రక్తం అన్నీ కాంగ్రెస్‌ పార్టీకే అంకితం. ప్రస్తుతం పార్టీని నడిపిస్తున్న నేను, ఒక మూలస్తంభంలా అండగా నిలుస్తాను" అని ఆయన దృఢంగా పేర్కొన్నారు.ఆర్ఎస్ఎస్ గీతం పాడటం గురించి ప్రశ్నించగా, "నేను జనతాదళ్, బీజేపీ గురించి ఎలా అధ్యయనం చేశానో, అలాగే ఆర్ఎస్ఎస్ గురించి కూడా తెలుసుకున్నాను. ప్రతి రాజకీయ పార్టీపై నాకు అవగాహన ఉంది. క్షేత్రస్థాయిలో తాలూకా, జిల్లా కేంద్రాల్లో విద్యాసంస్థలను ఏర్పాటు చేస్తూ ఆర్ఎస్ఎస్ తన సంస్థను ఎలా బలోపేతం చేసుకుంటుందో నాకు తెలుసు" అని వివరించారు."రాజకీయంగా మా మధ్య భేదాభిప్రాయాలు ఉండవచ్చు. కానీ, ఒక నాయకుడిగా నా ప్రత్యర్థుల్లో ఎవరు మిత్రులో, ఎవరు శత్రువో తెలుసుకోకుండా ఉండలేను కదా అందుకే ఆర్ఎస్ఎస్ చరిత్రను కూడా చదివాను. కొన్నిసార్లు కొన్ని సంస్థల్లో కొన్ని మంచి లక్షణాలు ఉంటాయి. వాటిని మనం గమనించాలి కదా అదే నేను చేశాను" అని శివకుమార్ అన్నారు.ఈ సందర్భంగా బీజేపీ నేతల ధర్మస్థల యాత్రపై స్పందిస్తూ, బీజేపీ ఒక బలహీనపడిన శక్తి అని, వారు చేస్తున్నదంతా కేవలం రాజకీయమేనని విమర్శించారు. అదే సమయంలో, బీజేపీ జాతీయ ప్రధాన కార్యదర్శి బీఎల్ సంతోష్‌పై ఆరోపణలు చేసిన కార్యకర్త మహేశ్ శెట్టి తిమరోడి అరెస్టును ఆయన సమర్థించారు. "రాజకీయాల్లో ఆధారాలు లేకుండా నిరాధారమైన ఆరోపణలు చేయడం సరికాదు. ప్రత్యర్థులైనా సరే, వారి ఆత్మగౌరవానికి భంగం కలగకూడదు. ఈ రోజు వారిపై మాట్లాడిన వారు, రేపు మనపై కూడా మాట్లాడవచ్చు" అని హితవు పలికారు.