అసెంబ్లీలోనే ఆరెస్సెస్ గీతం ఆలపించిన డిప్యూటీ సీఎం

కర్ణాటక రాజకీయాలు మరోసారి దేశం మొత్తాన్ని తమ వైపు తిప్పుకున్నాయి. కర్ణాటక ముఖ్యమంత్రి పదవి కోసం ఎన్నికల నుంచే సిద్ధరామయ్య, డీకే శివకుమార్ మధ్య కోల్డ్ వార్ ఉన్నట్లు కన్నడ రాజకీయాల్లో చర్చ జరుగుతుండగా.. ఈ మధ్య కాలంలో పదే పదే రెండు వర్గాల నేతలు కవ్వింపు వ్యాఖ్యలు చేస్తూనే ఉన్నారు. రెండున్నరేళ్ల తర్వాత డీకే శివకుమార్‌ను ముఖ్యమంత్రి చేస్తారని ఆయన వర్గం చెబుతుండగా.. 5 ఏళ్ల పాటు సిద్ధరామయ్యనే సీఎం కుర్చీలో కూర్చుంటారని ఆయన వర్గాలు పేర్కొంటున్నాయి. ఇలాంటి తరుణంలో తాజాగా కీలక పరిణామం చోటు చేసుకుంది.

కర్ణాటక అసెంబ్లీ సమావేశాల సందర్భంగా సభలోనే డీకే శివకుమార్ .. ఆరెస్సెస్ గీతమైన 'నమస్తే సదా వత్సలే మాతృభూమే' అంటూ పాడారు. దీంతో కాంగ్రెస్ నేతలు షాక్‌కు గురి కాగా.. బీజేపీ నేతలు మాత్రం సంబరాలు చేసుకున్నారు. దీంతో ఆయన కాంగ్రెస్ పార్టీపై అసంతృప్తి చెంది.. బీజేపీలో చేరనున్నారని.. అందుకే అసెంబ్లీలో ఆరెస్సెస్ గీతం ఆలపించారంటూ బీజేపీ కార్యకర్తలు సోషల్ మీడియాలో పెద్ద ఎత్తున చర్చకు తెరలేపారు. ఈ వ్యవహారం తీవ్ర చర్చనీయాంశంగా మారడంతో చివరికి డీకే శివకుమార్ క్లారిటీ ఇచ్చారు. తాను పార్టీ మారేది లేదని.. కాంగ్రెస్ పార్టీలోనే ఉంటానని స్పష్టం చేశారు.

ఐపీఎల్ సందర్భంగా బెంగళూరులోని చిన్నస్వామి స్టేడియం వద్ద జరిగిన తొక్కిసలాట ఘటనపై కర్ణాటక అసెంబ్లీలో చర్చ నిర్వహించారు. కర్ణాటక శాసనసభలో ప్రతిపక్ష నాయకుడు, బీజేపీ నేత ఆర్. అశోక మాట్లాడుతూ.. గతంలో డీకే శివకుమార్ ఆరెస్సెస్ షార్ట్‌లు ధరించినట్లు తెలిపారు. దీనికి స్పందించిన డీకే శివకుమార్.. నవ్వుతూనే ఆరెస్సెస్ గీతాన్ని ఆలపించారు. దీంతో బీజేపీ నేతలు బల్లలు చరుస్తూ, పగలబడి నవ్వగా.. కాంగ్రెస్ సభ్యులు మాత్రం నిశ్శబ్దంగా ఉండిపోయారు.

ఈ ఘటన నేపథ్యంలో కాంగ్రెస్‌పై బీజేపీ విమర్శలు గుప్పించింది. ఇటీవల 79వ స్వాతంత్ర్య దినోత్సవం సందర్భంగా.. ఢిల్లీ ఎర్రకోట వేదికగా ప్రధానమంత్రి నరేంద్ర మోదీ ప్రసంగంలో ఆరెస్సెస్ ప్రస్తావన తీసుకువచ్చినప్పుడు కాంగ్రెస్ నేతలు విమర్శలు చేశారని.. కానీ ప్రస్తుతం డీకే శివకుమార్ ఆరెస్సెస్‌ గీతం పాడారని బీజేపీ ఎద్దేవా చేసింది. దీనికి సంబంధించి.. బీజేపీ జాతీయ ప్రతినిధి ప్రదీప్ భండారి ఎక్స్‌లో ఒక పోస్ట్ పెట్టారు. డీకే శివకుమార్ ఆరెస్సెస్ గీతం పాడటంతో ప్రస్తుతం రాహుల్ గాంధీ, గాంధీ కుటుంబానికి దగ్గరివాళ్లు ఐసీయూ, కోమాలోకి వెళ్లారని సెటైర్లు వేశారు.