భారతీయ ట్రక్ డ్రైవర్ నిర్వాకం... ఇక ఎవ్వరికీ అమెరికా వీసా రాదు

ఇకపైన ట్రక్ డ్రైవర్లకు అమెరికా వీసాలు ఇవ్వదు. ఇంత కాలం అక్కడకు వెళ్లి ఏదో ఒక పని చేస్తే డాలర్లు సంపాదించి.. దానితో భారత్‌లోని మన ఫ్యామిలీ దర్జాగా బతికేస్తుందని చాలా మంది కలలు గనేవారు. అంతగా చదువుకోనివారు లేబర్ వీసాపై అమెరికాకు వెళ్లి ఏదో ఉద్యోగంలో చేరేవారు. డ్రైవర్లుగా పని చేయడం చాలా ఈజీ అని చాలా మంది అనుకునేవారు. కానీ, ఇప్పుడు ఆ పరిస్థితి తారుమారయ్యింది.. భారత్ నుంచి వచ్చేవాళ్లే కాదు ఇతర ఏ దేశస్థులు అమెరికాలో ట్రక్కు తోలడానికి వీలు లేదని ట్రంప్ సర్కారు తేల్చిచెప్పింది. దీనికి భారతీయ డ్రైవర్ హర్జిందర్ సింగే నిర్వాకమే కారణం.

ఎందుకంటే.. గతవారం ఫ్లోరిడా హైవేపై పంజాబీ డ్రైవర్ హర్జిందర్ సింగ్ వాహనం నడుపుతూ నిర్లక్ష్యంగా యూ-టర్న్ తీసుకోవడం వల్ల ముగ్గురు అమాయకులు ప్రాణాలు కోల్పోయారు. పోలీసుల దర్యాప్తులో హర్జిందర్ సింగ్ 2018లో అక్రమంగా మెక్సికో బోర్డర్ నుంచి అమెరికాలోకి ప్రవేశించినట్టు తేలింది. అక్రమ వలసదారుడు అయినప్పటికీ అతడికి కాలిఫోర్నియాలో ట్రక్ డ్రైవింగ్ లైసెన్స్ ఎలా వచ్చింది అనేది పెద్ద ప్రశ్న. దీంతో బయట దేశాల నుంచి అక్రమంగా వచ్చిన ట్రక్కు డ్రైవర్లు.. తక్కువ జీతాలకు ఉద్యోగం సంపాదించి అక్రమంగా లైసెన్సులు పొందుతున్నారని అమెరికా ప్రభుత్వం గమనించింది.

విదేశాల నుంచి వచ్చే ట్రక్ డ్రైవర్లు సరైన నిబంధనలు పాటించడం లేదని, ముఖ్యంగా, అక్రమ వలసదారులకు కూడా లైసెన్స్‌లు దొరుకుతున్నాయని ట్రంప్ ప్రభుత్వం నిర్దారించుకుంది. రోడ్లపై ఇంగ్లిష్‌లోనే ఉండే సూచనలు చదవడం, రాయడం రాకపోతే వాళ్లు ప్రమాదాలకు కారణమవుతున్నారు. ఇలాంటి వారి కారణంగా అమెరికన్ల ప్రాణాలు ప్రమాదంలో పడుతున్నాయని, అంతేకాదు స్థానిక ట్రక్ డ్రైవర్ల జీవనోపాధిని కూడా దెబ్బతీస్తున్నారని అమెరికా విదేశాంగ మంత్రి మార్క్ రూబియో పేర్కొన్నారు.

ఈ నేపథ్యంలో అమెరికా ప్రభుత్వం కొత్త నిబంధనలు తీసుకొచ్చింది. ఇకపై విదేశీ ట్రక్ డ్రైవర్లకు వీసాలు జారీచేయబోమని పేర్కొంది. అంతేకాదు, విదేశీ డ్రైవర్లకు ఇంగ్లిష్ చదవడం, రాయడం తప్పనిసరి అని కొత్త రూల్ కూడా పెట్టింది. ఇలాంటి వారికి లైసెన్స్ ఇస్తే ఆ ట్రక్కు యజమానిపై చర్యలు తీసుకుంటామని హెచ్చరించారు. ఇదే సమయంలో అమెరికాలోని 55 మిలియన్ల మంది విదేశీయుల వీసాలను ట్రంప్ యంత్రాంగం సమీక్షించనున్న సంగతి తెలిసిందే.

రోడ్డు భద్రతా కారణాల దృష్ట్యా విదేశీ ట్రక్కర్లు ఆంగ్ల నైపుణ్యాన్ని నిరూపించుకోవాల్సిన నిబంధను తీసుకొచ్చినట్టు రవాణా శాఖ తెలిపింది. స్క్రీనింగ్ పద్ధతులను పునఃపరిశీలనకు దరఖాస్తులను పాజ్ చేస్తున్నట్లు విదేశాంగ శాఖ తెలిపింది. ‘‘మన రోడ్లపై ఉన్న ప్రతి డ్రైవర్ అత్యున్నత ప్రమాణాలకు అనుగుణంగా ఉండేలా చూసుకోవడం అమెరికా ట్రక్కర్ల జీవనోపాధిని కాపాడటానికి, సురక్షితమైన సరఫరా గొలుసును నిర్వహించడం చాలా ముఖ్యం’’ అని పేర్కొంది. అయితే, ఈ నిర్ణయం వల్ల అమెరికాలో ట్రక్కు డ్రైవర్ల కొరత ఏర్పడే ప్రమాదం ఉందని నిపుణులు ఆందోళన వ్యక్తం చేస్తున్నారు.