కోర్టులో కడుపుబ్బా నవ్వించిన భార్యాభర్తలు.. జడ్డి ఫ్రాంక్ కాప్రియో ఎలా స్పందించారంటే

 ప్రపంచంలోనే అత్యంత దయగల న్యాయమూర్తిగా గుర్తింపు పొందిన ఫ్రాంక్ కాప్రియో గురించి ప్రత్యేకంగా చెప్పాల్సిన అవసరం లేదు. ఈరోజే క్యాన్సర్‌తో ఆస్పత్రిలో చికిత్సపొందుతూ ప్రాణాలు కోల్పోయిన ఈయనకు సంబంధించిన ఈ కేసు తీర్పు వీడియో నెట్టింట తెగ వైరల్ అవుతోంది. ఈ వీడియోలో భార్యాభర్తలు ఓ కేసు గురించి మాట్లాడుతూ.. కోర్టులో ఉన్న వారందరినీ కడుపుబ్బా నవ్వించారు. అయితే వారి సంభాషణకు నవ్వు ఆపుకోలేకపోయిన జడ్జి ఫ్రాంక్ కాప్రియో.. ఆ క్షణాన్ని చాలా తేలికగా తీసుకున్నారు. అతడు కూడా నవ్వుతూ.. తిరిగి జోకులు కూడా వేశారు. ఆ పూర్తి వివరాలు మీకోసం.

సాధారణంగా న్యాయస్థానం అంటే ఒక తీవ్రమైన, కఠినమైన వాతావరణం ఉంటుంది. కానీ ఫ్రాంక్ కాప్రియో కోర్టులో అలా ఉండదు. ఆయన చట్టాన్ని అమలు చేస్తూనే.. అందులో మానవత్వానికి పెద్ద పీట వేస్తారు. పేదవారి కష్టాలను అర్థం చేసుకుని జరిమానాలు రద్దు చేయడమో, ఒక చిన్న పొరపాటుకు జీవిత పాఠం చెప్పడమో వంటివి చేస్తూ ఆయన తరచుగా వార్తల్లో నిలుస్తుంటారు. అయితే ఈ వైరల్ వీడియోలో ఒక భార్యాభర్తల మధ్య జరిగిన సంభాషణ ఆయన్ని ఎంతగానో నవ్వించింది.

కోర్టులో ఒక ట్రాఫిక్ ఉల్లంఘనకు సంబంధించి ఒక భార్యాభర్తలను న్యాయమూర్తి ప్రశ్నిస్తున్నారు. భార్య మాట్లాడుతున్నప్పుడు.. ఆమె పక్కన నిల్చున్న భర్త మధ్యలో తల దూర్చాడు. వెంటనే జడ్జి ఫ్రాంక్ కాప్రియో అతన్ని ఉద్దేశించి "మీరు ఆమెకు భర్త అవునా?" అని అడిగారు. దానికి ఆ వ్యక్తి "అవును, కానీ నేను మిమ్మల్ని నాతో ఒక నిమిషం మాట్లాడమని కోరుతున్నాను" అని బదులిచ్చాడు. వెంటనే నవ్వుకున్న జడ్జి "మీరు ఆమెతో మాట్లాడటం లేనప్పుడు, నాతో ఎందుకు మాట్లాడుతున్నారు? మీరే కదా కేసులో ఉన్నారు" అని చమత్కరించారు.

భర్త సమాధానం వినకుండా భార్య మధ్యలో మాట్లాడటం, ఆమెను ఆపడానికి భర్త చేసిన ప్రయత్నాలు చూసి జడ్జి ఫ్రాంక్ కాప్రియో నవ్వు ఆపుకోలేకపోయారు. కోర్టులో గంభీరంగా ఉండాల్సిన న్యాయమూర్తి ఒక్కసారిగా నవ్వుల జలపాతంలో మునిగిపోవడం అక్కడ ఉన్న వారందరినీ ఆశ్చర్యపరిచింది. ముఖ్యంగా న్యాయవ్యవస్థపై ఉన్న కఠినమైన అభిప్రాయాన్ని ఆయన చాలా వరకు మార్చారు. అందుకే ప్రస్తుతం ఈ వీడియో నెట్టింట తెగ వైరల్ అవుతోంది. మీరూ ఓసారి ఇది చూసి మీకేమనిపిస్తుందో కామెంట్ల రూపంలో వెల్లడించేయండి.