నా భార్యను నేనే చంపాను.. కానీ అది హత్య కాదు

ఆస్ట్రేలియాలోని అడిలైడ్‌లో నివసిస్తున్న భారత సంతతి వ్యక్తి 42 ఏళ్ల విక్రాంత్ ఠాకూర్.. తన భార్య 36 ఏళ్ల సుప్రియ ఠాకూర్ మరణానికి సంబంధించి కోర్టులో సంచలన వాంగ్మూలం ఇచ్చారు. ఈనెల 14వ తేదీన జరిగిన విచారణలో ఆయన కోర్టులో సంచలన వ్యాఖ్యలు చేశారు. తాను తన భార్యను చంపానని.. కానీ అది హత్య కాదని పేర్కొన్నారు. ఈ సందర్భంగా మాన్‌స్లాటర్ ప్లీని కోరారు.

గతేడాది డిసెంబర్‌లో అడిలైడ్ ఉత్తర శివారు ప్రాంతంలో జరిగిన సుప్రియ ఠాకూర్ మరణం కేసు ఇప్పుడు ఆసక్తికర మలుపు తిరిగింది. అడిలైడ్ మెజిస్ట్రేట్ కోర్టులో రెండోసారి హాజరైన విక్రాంత్ ఠాకూర్.. తన భార్య మరణానికి తానే కారణమని అంగీకరించారు. అయితే అది ఉద్దేశపూర్వకంగా చేసిన హత్య కాదని.. అనుకోకుండా జరిగిన మాన్‌స్లాటర్ (నరహత్య) అని ఆయన తన లాయర్ సలహా మేరకు కోర్టుకు తెలిపారు.

డిసెంబర్ 21వ తేదీన రాత్రి 8:30 గంటల సమయంలో అడిలైడ్‌లోని సుప్రియా ఠాకూర్ నివాసంలో గృహహింస జరుగుతోందని అక్కడి పోలీసులకు సమాచారం అందింది. దీంతో పోలీసులు ఘటనా స్థలానికి చేరుకునేసరికి సుప్రియ ఠాకూర్ అపస్మారక స్థితిలో పడి ఉన్నారు. ఆమెను బతికించేందుకు వారు సీపీఆర్ చేసినప్పటికీ ఫలితం లేకపోయింది. అక్కడికక్కడే విక్రాంత్ ఠాకూర్‌ను అరెస్ట్ చేసిన పోలీసులు అతనిపై హత్య కేసు నమోదు చేశారు.

సాధారణంగా ఆస్ట్రేలియా చట్టాల ప్రకారం.. ఒక వ్యక్తిని చంపాలనే ఉద్దేశంతో చేసే నేరం. దీనికి కఠినమైన శిక్షలు ఉంటాయి. చంపాలనే ఉద్దేశం లేకపోయినా.. అనాలోచితంగా లేదా అశ్రద్ధ వల్ల ప్రాణాలు కోల్పోవడానికి కారణం కావడం. విక్రాంత్ ఠాకూర్ తన నేరాన్ని తక్కువ తీవ్రత అని చూపించుకోవడానికి ఈ మాన్‌స్లాటర్ ప్లీని ఆశ్రయించారు.

సుప్రియ ఠాకూర్ 8 ఏళ్ల క్రితం భారత్ నుంచి ఆస్ట్రేలియాకు వలస వెళ్లారు. ఆమె ఒక రిజిస్టర్డ్ నర్స్ కావాలని కలలు కంటూ.. తన టీనేజ్ కుమారుడి భవిష్యత్తు కోసం రోజుకు దాదాపు 16 గంటల పాటు కష్టపడి పనిచేసేవారని ఆమె ఫ్రెండ్స్ తెలిపారు. ప్రస్తుతం ఆమె కుమారుడికి అండగా ఉండేందుకు స్థానిక కమ్యూనిటీ 'గో ఫండ్ మీ' (GoFundMe) ద్వారా విరాళాలు సేకరిస్తోంది. ప్రస్తుతం ఈ కేసులో నిందితుడు విక్రాంత్ ఠాకూర్ జైలులోనే ఉన్నాడు. పోస్టుమార్టం నివేదిక, ఇతర ఫోరెన్సిక్ ఆధారాల కోసం ఈ కేసును కోర్టు ఏప్రిల్ వరకు వాయిదా వేసింది.