మహిళలతో ఆఫీసులోనే,,,కర్ణాటక డీజీపీ రాసలీలలు

కర్ణాటక పోలీస్ విభాగంలో అత్యున్నత స్థాయి (డీజీపీ ర్యాంకు) అధికారికి సంబంధించిన ఒక ప్రైవేట్ వీడియో ఇప్పుడు తీవ్ర కలకలం రేపుతోంది. విధుల్లో పోలీస్ యూనిఫాంలో విధుల్లో ఉండగానే.. ప్రభుత్వ కార్యాలయంలోనే అభ్యంతరకరంగా ప్రవర్తించారనే ఆరోపణలు ఎదుర్కొంటున్న డీజీపీ ర్యాంక్ అధికారి రామచంద్రారావు వ్యవహారం ఇప్పుడు కర్ణాటక ముఖ్యమంత్రి సిద్ధరామయ్య వరకు చేరింది. ప్రభుత్వ కార్యాలయంలో నైతిక విలువలను ఉల్లంఘించినందుకు సదరు ఐపీఎస్ అధికారిపై కఠిన చర్యలు తీసుకునే దిశగా కర్ణాటక ప్రభుత్వం అడుగులు వేస్తోంది. ఇక దేశవ్యాప్తంగా పెను సంచలనం సృష్టించిన గోల్డ్ స్మగ్లింగ్ కేసులో నిందితురాలిగా జైలులో ఉన్న కన్నడ నటి రన్యారావు తండ్రి ఇతడే కావడం గమనార్హం.

కర్ణాటక సివిల్ రైట్స్ ఎన్‌ఫోర్స్‌మెంట్ డైరెక్టరేట్ డైరెక్టర్ జనరల్‌గా పనిచేస్తున్న సీనియర్ ఐపీఎస్ అధికారి డాక్టర్ రామచంద్ర రావు.. తన కార్యాలయంలోనే మహిళలతో అభ్యంతరకరంగా ప్రవర్తించారనే ఆరోపణలు వెల్లువెత్తాయి. ఆఫీసు లోపల రహస్యంగా రికార్డు చేసిన ఈ వీడియో ఇప్పుడు సోషల్ మీడియాలో తెగ చక్కర్లు కొడుతుండటంతో రాజకీయ వర్గాల్లో తీవ్ర చర్చనీయాంశంగా మారింది. వైరల్ అవుతున్న ఈ వీడియోలో డీజీపీ హోదాలో ఉన్న రామచంద్ర రావు.. పోలీస్ యూనిఫాంలో విధుల్లో ఉండగానే తన కార్యాలయానికి వచ్చిన మహిళలతో అత్యంత సన్నిహితంగా, అసభ్యకరంగా ప్రవర్తించడం కనిపించింది.

వివిధ సందర్భాల్లో ఆఫీసుకు వచ్చిన మహిళలను కౌగిలించుకోవడం.. ముద్దు పెట్టుకోవడం, అసభ్యకరంగా ప్రవర్తించడం వంటి దృశ్యాలు ఈ రహస్య కెమెరాలో రికార్డ్ అయ్యాయి. మహిళలపై ఎలాంటి బలవంతం జరిగినట్లు ఆరోపణలు లేకపోయినప్పటికీ.. ఒక బాధ్యతాయుతమైన పదవిలో ఉండి ఆఫీసులో ఇలా ప్రవర్తించడం పోలీసు శాఖ ప్రతిష్టను దిగజార్చేలా ఉందనే విమర్శలు నెట్టింట వ్యక్తం అవుతున్నాయి. అయితే ఆ వీడియో తనది కాదని.. లాయర్‌ను కలుస్తానని డీజీపీ రామచంద్ర రావు కొట్టిపారేశారు.

ఈ వ్యవహారంపై కర్ణాటక ముఖ్యమంత్రి సిద్ధరామయ్య తీవ్ర ఆగ్రహం వ్యక్తం చేసినట్లు తెలుస్తోంది. ఒక ఉన్నత స్థాయి పోలీస్ అధికారి ఇలాంటి అనైతిక చర్యలకు పాల్పడటం కర్ణాటక ప్రభుత్వంపై ఒత్తిడిని పెంచింది. విచారణ జరిపి సదరు అధికారిపై కఠినమైన క్రమశిక్షణ చర్యలు తీసుకోవాలని విపక్షాలు, నెటిజన్లు డిమాండ్ చేస్తున్నారు. అయితే ఈ వీడియో ఎంతవరకు నిజమైనదనే దానిపై కర్ణాటక ప్రభుత్వం ఫోకస్ పెట్టింది.