ఏపీలో చెమ్‌వోల్ట్ గ్లోబల్ పెట్టుబడి.. ప్రభుత్వంతో ఒప్పందం

ఆంధ్రప్రదేశ్ రాష్ట్రంలో పెట్టుబడులు పెట్టేందుకు మరో సంస్థ ముందుకు వచ్చింది. ఆంధ్రప్రదేశ్ ప్రభుత్వం అనుసరిస్తున్న పారిశ్రామిక విధానాలు, పెట్టుబడులు పెట్టేందుకు వస్తున్న సంస్థలకు అందిస్తున్న ప్రోత్సాహకాలు, రాయితీలతో పలు సంస్థలు ఏపీలో పెట్టుబడులు పెట్టేందుకు ఆసక్తి చూపిస్తున్నాయి. ఈ క్రమంలోనే ఏపీలో పెట్టుబడులు పెట్టేందుకు చెమ్‌వోల్డ్ గ్లోబల్ సంస్థ ఆసక్తి చూపుతోంది. ఈ మేరకు ప్రభుత్వంతో అవగాహన ఒప్పందం కుదుర్చుకుంది.

చెమ్‌వోల్ట్ గ్లోబల్ - ఏపీ ప్రభుత్వం మధ్య కుదిరిన అవగాహన ఒప్పందం ప్రకారం చెమ్‌వోల్ట్ గ్లోబల్ ఏపీలో 2500 కోట్లు పెట్టుబడులు పెట్టనుంది. ఈ పెట్టుబడితో 5 గిగావాట్స్ అవర్స్ సామర్థ్యం కలిగి లిథియమ్ అయాన్ సెల్ తయారీ ప్లాంట్ ఏర్పాటు చేయనుంది. గ్రిడ్ స్కేల్ ఎనర్జీ స్టోరేజీకి మద్దతుగా నిలిచేలా దేశీయంగా సెల్ తయారీ సామర్థ్యం పెంచేలా ఈ ప్రాజెక్టు చేపట్టనున్నారు. చెమ్‌వోల్ట్ గ్లోబల్ ఏర్పాటు చేసే లిథియం అయాన్ సెల్ మ్యానుఫ్యాక్చరింగ్ గిగా ఫ్యాక్టరీ ద్వారా సుమారుగా 1500 మందికి ప్రత్యక్షంగా ఉపాధి అవకాశాలు లభించనున్నాయి.

తయారీ, ఇంజనీరింగ్, ఆపరేషన్స్, క్వాలిటీ ఫంక్షన్ విభాగంలో 1500 మందికి ఉపాధి దక్కే అవకాశాలు ఉన్నాయని అధికారులు వెల్లడించారు. అలాగే కాంపొనెంట్స్ సప్లయిర్స్, ఎక్విప్‌మెంట్స్ మ్యాన్యుఫ్యాక్చరర్లు, లాజిస్టిక్స్, యుటిలిటీస్ ద్వారా మరో నాలుగు వేల మందికి ఉపాధి దక్కుతుందని చెప్తున్నారు.మరోవైపు ఈ ప్రాజెక్టును దశలవారీగా చేపట్టనున్నారు. తొలి దశలో 2027 చివరకల్లా ఒక గిగావాట్ అవర్స్ సామర్థ్యం కలిగిన సెల్స్ తయారు చేయాలని లక్ష్యంగా పెట్టుకున్నారు. 2029 చివరి నాటికి రెండో దశను పూర్తి చేసి.. ఉత్పత్తి సామర్థ్యాన్ని 5 గిగావాట్స్ అవర్లకు చేరుకునేలా ప్రణాళికలు రచిస్తున్నారు.

ఈ ప్లాంట్ ద్వారా 314Ah, 750Ah లిథియం - అయాన్ సెల్స్ తయారు చేస్తారు. వీటిని గ్రిడ్ స్కేల్ స్టోరేజీ, భారీ ఎలక్ట్రికల్ వాహనాల తయారీలో ఉపయోగిస్తారు. మరోవైపు ఈ ప్లాంట్ ద్వారా ఉత్పత్తి అయ్యే సెల్స్ దేశీయంగా ఉపయోగించడమే కాకుండా అంతర్జాతీయ మార్కెట్లకు ఎగుమతి చేస్తారు. ఇక చెమ్‌వోల్ట్ సంస్థ మరో నాలుగు ఎనర్జీ స్టోరేజీ సిస్టమ్స్ ప్రారంభించింది.