తిలకం పెట్టుకున్నాడని.. స్కూల్ నుంచి హిందూ విద్యార్థి బహిష్కరణ

బ్రిటన్ రాజధాని లండన్‌లో.. ఓ భారతీయ సంతతి విద్యార్థికి దారుణ అవమానం జరిగింది. ముఖ్యంగా అతడు నుదుటన తిలకం పెట్టుకున్నాడనే నెపంతో.. ఎనిమిదేళ్ల విద్యార్థిని పాఠశాల యాజమాన్యం తీవ్ర వేధింపులకు గురిచేసింది. ఈ వివక్షను భరించలేక ఆ చిన్నారి చివరకు పాఠశాలనే వదిలి పెట్టాల్సి వచ్చింది. బ్రిటన్‌లోని హిందువులు, భారతీయుల ప్రయోజనాల కోసం పనిచేసే 'ఇన్‌సైట్ యూకే' సంస్థ ఈ దారుణాన్ని బట్టబయలు చేసింది.

ఆడుకుంటున్న సమయంలోనూ ఆంక్షలు..

సదరు విద్యార్థి తన మత సంప్రదాయాల ప్రకారం తిలకం దిద్దుకుని పాఠశాలకు వెళ్లగా.. అక్కడి సిబ్బంది దానిని అభ్యంతరకరంగా భావించారు. విద్యార్థి మతపరమైన ఆచారాల గురించి పదే పదే ఆరా తీస్తూ అతడిని అసౌకర్యానికి గురిచేశారు. కేవలం తరగతి గదిలోనే కాకుండా విరామ సమయంలో ఇతర పిల్లలతో కలిసి ఆడుకుంటున్నప్పుడు కూడా హెడ్ టీచర్ ఆ బాలుడిపైనే ప్రత్యేకంగా దృష్టి సారించేవారని సమాచారం. దీంతో ఆ చిన్నారి భయపడిపోయి.. తోటి విద్యార్థులతో కలవలేక ఒంటరివాడిగా మారిపోయాడు. క్షణ క్షణం భయం భయంగా ఒక్కడే కూర్చుని ఆ పసి బాలుడు వణికిపోయాడు.

 బాలుడి పరిస్థితిని గమనించిన తల్లిదండ్రులు తమ మత విశ్వాసాల గురించి, తిలకం ప్రాముఖ్యత గురించి పాఠశాల యాజమాన్యానికి వివరించే ప్రయత్నం చేశారు. అయితే వారి వివరణను ఏమాత్రం పట్టించుకోని యాజమాన్యం.. తమ ధోరణిని మార్చుకోలేదు. దీంతో చేసేదేమీ లేక పిల్లాడి మానసిక పరిస్థితిని దృష్టిలో ఉంచుకుని తల్లిదండ్రులే.. బాలుడిని ఆ స్కూల్ నుంచి తీసి.. వేరే స్కూళ్లో వేశారు. అయితే ఈ ఉదంతంపై 'ఇన్‌సైట్ యూకే' సంస్థ తీవ్ర ఆగ్రహం వ్యక్తం చేసింది. ఇది కేవలం ఒక బాలుడి సమస్య మాత్రమే కాదని.. సదరు పాఠశాల అనుసరిస్తున్న వివక్షాపూరిత చర్యల వల్ల ఇప్పటి వరకు మొత్తంగా నలుగురు హిందూ విద్యార్థులు ఆ స్కూల్ నుండి వెళ్లిపోయారని వెల్లడించింది.

బ్రిటన్ చట్టాల ప్రకారం మతం, సంప్రదాయాల ఆధారంగా ఎవరినైనా వివక్షకు గురిచేయడం తీవ్రమైన నేరం. ఈ ఘటనపై విచారణ జరిపి చర్యలు తీసుకోవాలని హిందూ సంఘాలు డిమాండ్ చేస్తున్నాయి. విద్యార్థులపై ఇలాంటి సంఘటనలు దీర్ఘకాలిక మానసిక ప్రభావం చూపుతాయని విద్యావేత్తలు ఆందోళన వ్యక్తం చేస్తున్నారు. మరి సర్కారు స్పందించి.. ఈ ఘటనపై చర్యలు తీసుకుంటుందా లేదా అనేది ప్రశ్నార్థకంగా మారింది. ఒకవేళ చర్యలు తీసుకుంటే మాత్రం యాజమాన్యంపై కఠినంగా వ్యవహరించాల్సి ఉంటుంది.