మాజీ మంత్రి బొత్స ఛాలెంజ్.. వీడియో వదిలిన నారా లోకేష్..

ఆంధ్రప్రదేశ్ రాజకీయాలు మొత్తం శ్రీవారి చుట్టూ తిరుగుతున్నాయి. తిరుమల లడ్డూలో నెయ్యి అంశం నుంచి విషయం కాస్తా ఇందాపూర్ డెయిరీ మీదకు వెళ్లింది. ఈ నేపథ్యంలో శాసనమండలిలో కూటమి వర్సెస్ వైసీపీ నేతలు సవాళ్లు, ప్రతి సవాళ్లు విసురుకుంటున్నారు. శాసనమండలిలో వైసీపీ సభ్యులు చెప్పులు వేసుకుని దేవుడి ఫోటోను పట్టుకెళ్లారంటూ ఏపీ మంత్రులు ఆరోపించారు. దీనిపై స్పందించిన వైసీపీ నేత బొత్స సత్యనారాయణ.. వైసీపీ సభ్యులు చెప్పులు, బూట్లు వేసుకుని దేవుడి ఫోటోతో వెళ్లినట్లు సాక్ష్యాలు చూపించాలని ఛాలెంజ్ చేశారు. ఈ నేపథ్యంలో ఏపీ మంత్రి నారా లోకేష్.. ఎక్స్ వేదికగా ఓ వీడియో వదిలారు. చెప్పులు, షూలు వేసుకుని దేవుడి చిత్రపటం చేతితో పట్టుకెళ్లిన వీడియో నారా లోకేష్ విడుదల చేశారు.

నేపథ్యం ఇది..

ఇందాపూర్ డెయిరీ ద్వారా టీటీడీకి నెయ్యి సరఫరా అంశం గురించి చర్చించాలని వైసీపీ సభ్యులు శాసనమండలిలో వాయిదా తీర్మానాలు ఇచ్చారు. అయితే ఈ వాయిదా తీర్మానాలను శాసనమండలి ఛైర్మన్ మోషేన్ రాజు తిరస్కరించారు. దీంతో వైసీపీ ఎమ్మెల్సీలు శాసనమండలిలో నిరసన తెలిపారు. శ్రీవారి ఫోటోలు, ప్లకార్డులతో తమ నిరసన వ్యక్తం చేశారు. అయితే వైసీపీ సభ్యులు చెప్పులు, బూట్లు ధరించి వెంకటేశ్వరస్వామి ఫోటోలు పట్టుకున్నారని.. మహాపాపం చేశారంటూ మంత్రులు, కూటమి ఎమ్మెల్సీలు ఆరోపించారు.

చెప్పులు వేసుకొని దేవుడి ఫొటోతో సభలోకి వెళ్లినట్లు సాక్ష్యం చూపించగలరా అని బొత్స సవాల్‌ విసరగా.. స్పందించిన నారా లోకేశ్‌ ఎక్స్‌లో తాజాగా ఓ వీడియోను పోస్టు చేశారు. చెప్పులు, బూట్లు వేసుకొని దేవుడి ఫొటో పట్టుకెళ్లిన ఫొటోలు, వీడియోను విడుదల చేశారు. ‘‘మీకు దేవుడంటే భక్తి, భయం లేదు. హిందువుల మనోభావాలంటే లెక్కే లేదు. బూట్లు, చెప్పులతో వేంకటేశ్వరస్వామి చిత్రపటాలను పట్టుకొని మహాపరాధం చేశారు. కౌన్సిల్‌లో ప్రదర్శించిన శ్రీవారి ఫొటోలు అక్కడే విసిరేసి వెళ్లడం క్షమించరాని పాపం’’ అని లోకేశ్‌ మండిపడ్డారు.

బొత్స ఛాలెంజ్‌కు నారా లోకేష్ కౌంటర్

మాజీ మంత్రి బొత్స సత్యనారాయణ చేసిన సవాలుకు మంత్రి నారా లోకేష్ స్పందించారు. వైసీపీ సభ్యులు చెప్పులు, బూట్లు వేసుకుని దేవుడి ఫోటోలు పట్టుకున్న వీడియో ఎక్స్ వేదికగా షేర్ చేశారు. శ్రీవారికి చేసిన మహా పాపం కప్పిపుచ్చుకోవడానికి వైఎస్ జగన్ మహాపరాధం చేశారని ఆరోపించారు." మీకు దేవుడంటే భక్తి లేదు, భయం లేదు. హిందువుల మనోభావాలంటే లెక్కేలేదు. మీ వైసీపీ ఎమ్మెల్సీలు బూట్లు, చెప్పులతో కలియుగ ప్రత్యక్ష దైవం వెంకటేశ్వర స్వామి చిత్రపటాలు పట్టుకుని మహాపరాధం చేశారు. అంతే కాకుండా కౌన్సిల్ లో ప్రదర్శించిన శ్రీవారి ఫొటోలు అక్కడే విసిరేసి వెళ్ళిపోవడం క్షమించరాని పాపం. వెంకన్నతో పెట్టుకోవద్దు జగన్." అంటూ నారా లోకేష్ ట్వీట్ చేశారు.