ట్రంప్‌ సుంకాలకు వ్యతిరేకంగా వాదించి గెలిచిన భారత సంతతి లాయర్

 అగ్రరాజ్యం అమెరికా అధ్యక్షుడు డోనాల్డ్ ట్రంప్ అత్యంత ప్రతిష్టాత్మకమైన సుంకాల విధానానికి ఆ దేశ సుప్రీం కోర్టులో భారీ చుక్కెదురైంది. విదేశీ దిగుమతులపై ట్రంప్ విధించిన భారీ సుంకాలు రాజ్యాంగ విరుద్ధమని న్యాయస్థానం తేల్చిచెప్పింది. ఈ సంచలన తీర్పు వెనుక ఒక భారతీయ సంతతి న్యాయవాది మేధస్సు ఉండటం ఇప్పుడు అంతర్జాతీయంగా చర్చనీయాంశమైంది. ఆయనే అమెరికా మాజీ యాక్టింగ్ సోలిసిటర్ జనరల్ నీల్ కత్యాల్.

రాజ్యాంగం కంటే ఎవరూ ఎక్కువ కాదు!

అధ్యక్షుడు ట్రంప్ 1977 నాటి టఅంతర్జాతీయ అత్యవసర ఆర్థిక అధికారాల చట్టం' ను ఉపయోగించి వివిధ దేశాల దిగుమతులపై భారీగా సుంకాలను విధించారు. దీనిని సవాల్ చేస్తూనే.. భారత సంతతి లాయర్ నీల్ కత్యాల్ చిన్న వ్యాపారుల తరపున కోర్టులో గట్టిగా వాదించారు. "అమెరికాలో ప్రజలపై పన్నులు విధించే అధికారం కేవలం కాంగ్రెస్‌కు (పార్లమెంటు) మాత్రమే ఉంటుంది. అధ్యక్షుడు ఎంత శక్తివంతుడైనా రాజ్యాంగం కంటే ఎక్కువ కాదు" అని ఆయన వినిపించిన వాదనలతో సుప్రీం కోర్టు ఏకీభవించింది. 6-3 మెజారిటీతో కోర్టు ఈ కీలక తీర్పును వెలువరించింది.

అసలెవరీ నీల్ కత్యాల్..?

నీల్ కత్యాల్ తల్లిదండ్రులు భారత దేశానికి చెందిన వారు. అయితే వారు చాలా ఏళ్ల క్రితమే అమెరికా వెళ్లిపోయి చికాగోలో స్థిరపడ్డారు. ఈయన తండ్రి ఇంజినీర్ కాగా తల్లి డాక్టర్. అమెరికాలోనే పుట్టిన నీల్ కత్యాల్.. అత్యున్నత విద్యాసంస్థలైన డార్ట్‌మౌత్ కాలేజ్, యేల్ లా స్కూల్ నుంచి పట్టా పొందారు. ఆ తర్వాత న్యాయవాదిగా కెరియర్ ప్రారంభించి అనేక కేసులను విజయవంతంగా గెలిపించారు. ముఖ్యంగా అమెరికా సుప్రీం కోర్టులో ఇప్పటి వరకు 50కి పైగా కేసులను వాదించి.. అత్యధిక కేసులు వాదించిన మైనారిటీ న్యాయవాదిగా కూడా ఈయన రికార్డు సృష్టించారు.

అంతేకాకుండా బరాక్ ఒబామా హయాంలో 2010లో యాక్టింగ్ సోలిసిటర్ జనరల్‌గా పని చేశారు. ప్రస్తుతం జార్జ్‌టౌన్ యూనివర్సిటీలో ప్రొఫెసర్‌గా బాధ్యతలు నిర్వర్తిస్తున్నారు. ట్రంప్ గతంలో విధించిన 'ట్రావెల్ బ్యాన్'ను వ్యతిరేకించడమే కాకుండా జార్జ్ ఫ్లాయిడ్ హత్య కేసులో స్పెషల్ ప్రాసిక్యూటర్‌గా కూడా వ్యవహరించారు. 'లిటిగేటర్ ఆఫ్ ది ఇయర్' (2017, 2023), అమెరికా న్యాయశాఖ ఇచ్చే అత్యున్నత పౌర పురస్కారం ఎడ్మండ్ రాండాల్ఫ్ అవార్డును కూడా అందుకున్నారు.