జడ్జ్‌ల ఆస్తుల ప్రకటించే చట్టం తేవాలని,,,స్టాండింగ్ కమిటీ సూచన

రాజకీయ నాయకులు, బ్యూరోక్రాట్ల మాదిరిగా సుప్రీంకోర్టు, హైకోర్టు న్యాయమూర్తులు తమ ఆస్తులు తప్పనిసరిగా ప్రకటించాలని న్యాయ వ్యవస్థపై ఏర్పాటుచేసిన పార్లమెంటరీ స్టాండింగ్ కమిటీ సిఫార్సు చేసింది. ఉన్నత న్యాయవ్యవస్థలోని న్యాయమూర్తులు తమ ఆస్తులను ప్రకటించడం వల్ల వ్యవస్థపై మరింత విశ్వాసం, విశ్వసనీయత ఏర్పడుతుందని పేర్కొంటూ ఈ మేరకు పార్లమెంటుకు నివేదిక సమర్పించింది. ‘స్వచ్ఛందంగా న్యాయమూర్తులు ఆస్తుల ప్రకటించాలన్న సుప్రీంకోర్టు సూచనలు పాటించడం లేదని, ఉన్నత న్యాయవ్యవస్థలోని న్యాయమూర్తులు తప్పనిసరిగా ప్రకటించేలా తగిన చట్టాన్ని తీసుకురావాలని కమిటీ ప్రభుత్వానికి సిఫార్సు చేసింది. వార్షిక ప్రాతిపదికన వారి ఆస్తులను వెల్లడించాలి’ అని బీజేపీ ఎంపీ, బీహార్ మాజీ డిప్యూటీ సీఎం సుశీల్ మోదీ నేతృత్వంలోని కమిటీ తన నివేదికలో స్పష్టం చేసింది.

పలు సందర్భాల్లో సుప్రీంకోర్టు ఇచ్చిన తీర్పులను ఉటంకిస్తూ, ఎంపీలు లేదా ఎమ్మెల్యేలుగా పోటీచేసే వారి ఆస్తులను తెలుసుకునే హక్కు ప్రజలకు ఉందని నొక్కి చెప్పే స్థాయికి సర్వోన్నత న్యాయస్థానం వెళ్లిందని కమిటీ పేర్కొంది. ‘అలా అయితే, న్యాయమూర్తులు తమ ఆస్తులు, అప్పులను బహిర్గతం చేయనవసరం లేదనే వాదన సమంజం కాదు.. ఎవరైనా ప్రభుత్వ కార్యాలయాన్ని కలిగి ఉండి, ఖజానా నుంచి వేతనం తీసుకుంటే తప్పనిసరిగా వారి ఆస్తి వార్షిక రిటర్న్‌లను అందించాలి’ అని కమిటీ సిఫార్సు చేసింది.

ఇదే సమయంలో సుప్రీంకోర్టు, రాష్ట్రాల హైకోర్టుల సహా సహా న్యాయస్థానాలలో భారీగా పేరుకుపోయిన కేసులపై కమిటీ ఆందోళన వ్యక్తం చేసింది. న్యాయవ్యవస్థలో సెలవులను తగ్గించాలని సిఫార్సు చేసింది. ‘న్యాయవ్యవస్థలో సెలవులు ‘వలసవాద వారసత్వం’ అని కాదనలేని వాస్తవం.. మొత్తం కోర్టులు సామూహికంగా సెలవులపై వెళ్లడం న్యాయవాదులకు తీవ్ర అసౌకర్యాన్ని కలిగిస్తుంది.. న్యాయమూర్తులందరూ ఒకేసారి సెలవుపై వెళ్లడానికి బదులుగా వ్యక్తిగతంగా ఏడాది పొడవునా వేర్వేరు సమయాల్లో సెలవు తీసుకోవాలి.. తద్వారా కోర్టులు నిరంతరం తెరిచి ఉంటాయి’ అని సూచించింది.

ఉన్నత న్యాయస్థానాల్లో రాజ్యాంగ నిబంధనల ప్రకారం ఎస్సీ, ఎస్టీ, ఓబీసీ, మైనార్టీలు ప్రాతినిధ్యం వహిస్తున్నందున.. సమాజంలోని అట్టడుగు వర్గాలకు ఉన్నత న్యాయవ్యవస్థలో రిజర్వేషన్లు కల్పించాలని సిఫార్సు చేసింది. ఉన్నత న్యాయవ్యవస్థలో రిజర్వేషన్లకు సంబంధించిన నిబంధనలను ప్రస్తుతం ఖరారు చేస్తున్న మెమోరాండా ఆఫ్ ప్రొసీజర్ (ఎంఓపీ)లో స్పష్టంగా పేర్కొనాలని ప్యానెల్ సూచించింది. రాజ్యాంగం ప్రకారం ప్రతి ఒక్కరికీ న్యాయం అనేది ప్రాథమిక హక్కు.. దేశంలోని సుదూర ప్రాంతాల నుంచి ప్రయాణించే పేదలు న్యాయం పొందడం కష్టంగా ఉన్నందున సుప్రీంకోర్టు ప్రాంతీయ ధర్మాసనాలు ఏర్పాటుకు కమిటీ మొగ్గు చూపింది.