తాజ్‌మహల్‌ను షాజహాన్‌ కట్టలేదు.. చరిత్ర పుస్తకాల్లో మార్చాలని ఢిల్లీ హైకోర్టులో వ్యాజ్యం

మనం చిన్నప్పటి నుంచి తాజ్‌మహల్‌ గురించి చదువుకున్నాం. మొఘల్ చక్రవర్తి షాజహాన్.. ఈ అద్భుత కట్టడాన్ని నిర్మించాడని నేర్చుకున్నాం. అయితే తాజాగా ఓ సంస్థ మాత్రం దానికి వ్యతిరేకంగా వాదిస్తోంది. అంతే కాకుండా తాజ్‌ మహల్‌ను షాజహాన్ నిర్మించలేదని పేర్కొంటోంది. అంతటితో ఆగకుండా చరిత్ర పుస్తకాల్లో తాజ్‌మహల్‌ను కట్టించింది షాజహాన్ అని ఉన్న వాటిని మార్చాలని ఏకంగా ఢిల్లీ హైకోర్టులో పిటిషన్ కూడా దాఖలు చేసింది. దీంతో ఈ పిటిషన్ ఇప్పుడు తీవ్ర చర్చనీయాంశంగా మారింది. తాజ్‌మహల్‌ను షాజహాన్ కట్టలేదని ఆరోపిస్తూ ఢిల్లీ హైకోర్టులో హిందూ సేన ఒక ప్రజా ప్రయోజన వ్యాజ్యాన్ని దాఖలు చేసింది. రాజా మాన్ సింగ్ ప్యాలెస్‌కు మార్పులు చేసి దాన్ని తాజ్‌మహల్‌గా మార్చారని ఆ వ్యాజ్యంలో ఆరోపించింది. తాజ్‌ మహల్‌కు చెందిన చరిత్ర పుస్తకాల్లోని తప్పులను సరిదిద్దాలంటూ హిందూ సేన తాజాగా ఢిల్లీ హైకోర్టును ఆశ్రయించడం దేశవ్యాప్తంగా సంచలనంగా మారింది. ఈ ప్రజా ప్రయోజన వ్యాజ్యంపై విచారణ జరిపిన ఢిల్లీ హైకోర్టు.. దీనిపై దృష్టిసారించాలని భారత పురావస్తు శాఖను ఆదేశించింది.

ఈ పిటిషన్‌పై విచారణ చేపట్టిన జస్టిస్ సతీశ్ చంద్ర శర్మ, జస్టిస్ తుషార్ గెడెలాలతో కూడిన ఢిల్లీ హైకోర్టు బెంచ్.. గతంలో కూడా హిందూ సేన ఇదే తరహా పిటిషన్‌తో సుప్రీం కోర్టును ఆశ్రయించిన విషయాన్ని గుర్తు చేసింది. అయితే ఆ విషయంలో భారత పురావస్తు శాఖ (ఏఎస్ఐ).. ఇప్పటికీ ఒక నిర్ణయానికి రాలేదని ఢిల్లీ హైకోర్టు గుర్తించింది. దీంతో అసలు ఈ తాజ్‌మహల్ చరిత్ర, ఈ వ్యాజ్యంపై దృష్టిసారించాలని ఏఎస్ఐకి సూచించింది. ఢిల్లీలోని తాజ్ మహల్ కట్టడం, దాని నిర్మాణానికి సంబంధించి నిజాలను దాచేస్తున్నారని పిల్‌లో హిందూ సేన ఆరోపించింది. చారిత్రక వాస్తవాలను తప్పుగా ప్రజలకు చెబుతున్నారని.. వాటినే ప్రదర్శిస్తున్నారని హిందూసేన పిటిషన్‌లో పేర్కొంది. తాజ్ మహల్ నిర్మాణానికి సంబంధించిన తప్పుడు చారిత్రక వాస్తవాలు ఇప్పటికీ ప్రజలకు అందుబాటులో ఉండటం వల్లే అదే నిజం అని అందరూ నమ్ముతున్నారని వెల్లడించింది. తాజ్‌మహల్ విషయంలో హిందూ సేన లోతైన అధ్యయనం చేసిందని.. చరిత్ర పుస్తకాల్లో ఈ విషయమై ఉన్న తప్పులు సరిదిద్ది ప్రజలకు అసలు నిజం ఏంటో చెప్పాలని అభిప్రాయపడింది. అయితే ఆ ప్రాంతంలో తాజ్‌మహల్‌కు ముందు ఉన్న రాజా మాన్ సింగ్ ప్యాలెస్‌ను కూల్చి మొఘలులు ఆ కట్టడాన్ని నిర్మించారు అనడానికి ఎలాంటి ఖచ్చితమైన ఆధారాలు లేవని హిందూ సేన వాదిస్తోంది.

దీంతోపాటు ఆర్కియాలజికల్ సర్వే ఆఫ్ ఇండియా తన వెబ్‌సైట్, ఆగ్రా సర్కిల్ వెబ్‌సైట్‌లో తాజ్ మహల్‌పై తప్పుడు సమాచారాన్ని అందిస్తోందని పిటిషనర్ ఆరోపించారు. ఆ వెబ్‌సైట్ ప్రకారం 1631లో ముంతాజ్ మహల్ మరణించిన 6 నెలల తర్వాత.. ఆమె మృతదేహాన్ని తాజ్ మహల్ ప్రధాన సమాధిని క్రిప్ట్‌లో ఉంచడానికి ఆగ్రాకు తరలించారని భారత పురావస్తు శాఖ తెలిపింది. 1648లో స్మారక చిహ్నాల సముదాయం పూర్తి కావడానికి 17 సంవత్సరాలు పట్టిందని.. ఏఎస్ఐ తెలిపిన తాజ్ మహల్ కోసం అదే వెబ్ పేజీలో అందించిన సమాచారానికి ఇది విరుద్ధంగా ఉందని హిందూ సేన పేర్కొంది.