అప్పటిదాకా అస్సలు బయటకు రావద్దు.. చంద్రబాబు సూచనలు

ఆంధ్రప్రదేశ్ అసెంబ్లీ ఎన్నికల కౌంటింగ్ దగ్గరపడింది. మరికొన్ని గంటల్లోనే ఏపీ ఎన్నికల కౌంటింగ్ మొదలు కానుంది. ఈ నేపథ్యంలో టీడీపీ అధినేత చంద్రబాబు నాయుడు.. కూటమి కౌంటింగ్ ఏజెంట్లకు కీలక సూచనలు చేశారు. కౌంటింగ్‌ కేంద్రాల్లో అప్రమత్తంగా వ్యవహరించాలని సూచించారు. ఏజెంట్లతో టెలీ కాన్ఫరెన్స్ నిర్వహించిన చంద్రబాబు.. పలు అంశాలపై వారికి మార్గనిర్దేశం చేశారు. ఎన్నికల్లో కష్టపడి పనిచేసిన అందరికీ కృతజ్ఞతలు తెలియజేసిన చంద్రబాబు.. ఓట్ల లెక్కింపులో ఏ మాత్రం అనుమానం ఉన్నా వెంటనే రిటర్నింగ్ అధికారికి ఫిర్యాదు చేయాలన్నారు. ఓటమి తట్టుకోలేక వైసీపీ హింసకు పాల్పడే అవకాశం ఉందని.. మీరు మాత్రం సంయమనం కోల్పోవద్దని సూచించారు.

పోస్టల్ బ్యాలెట్ ఓట్లపై వైఎస్సార్‌సీపీ రాద్ధాంతం చేయాలని చూసిందని.. అయితే సుప్రీంకోర్టులో ఆ పార్టీకి మొట్టికాయలు పడ్డాయని చంద్రబాబు చెప్పారు. కౌంటింగ్ సమయంలో అత్యంత అప్రమత్తంగా ఉండాలని.. రూల్స్‌కు వ్యతిరేకంగా ఏమైనా జరిగితే వెంటనే నిలదీయాలని సూచించారు. కౌంటింగ్ ఉదయం ఎనిమిదికే ప్రారంభమవుతున్నందున.. నిర్దేశిత సమయానికి కౌంటింగ్ కేంద్రాలకు చేరుకోవాలన్నారు. రౌండ్లు మొత్తం పూర్తయ్యే వరకూ కౌంటింగ్ కేంద్రం నుంచి బయటకు రావద్దని అప్రమత్తం చేశారు.

లెక్కింపు ప్రారంభించేముందు కంట్రోల్ యూనిట్ నెంబర్ ప్రకారం సీల్‌ను ప్రతి ఏజెంట్ సరి చూసుకోవాలని చంద్రబాబు కూటమి తరుఫు కౌంటింగ్ ఏజెంట్లకు సూచించారు.. ప్రతి ఒక్కరూ 17 సీ ఫాం దగ్గర ఉంచుకుని.. పోలైన ఓట్లను, లెక్కింపు సమయంలో వచ్చిన ఓట్లను చెక్ చేసుకోవాలన్నారు. అలాగే అన్ని రౌండ్లు పూర్తయ్యాక కూడా పోలైన ఓట్లు, కౌంటింగ్ ఓట్లలో తేడాలు ఉన్నాయమో గమనించాలని చంద్రబాబు సూచించారు. ఇక పోస్టల్ బ్యాలెట్లపైనా చంద్రబాబు కీలక సూచనలు చేశారు. పోస్టల్ బ్యాలెట్ ఓట్ల కౌంటింగ్‌కు వెళ్లిన ఏజంట్లకు ఏమాత్రం అనుమానం వచ్చినా కూడా రిటర్నింగ్ అధికారికి అభ్యంతరం తెలపాలని సూచించారు. అలాగే ఫిర్యాదులపై అక్‌నాలెడ్జ్‌మెంట్ తీసుకోవాలని సూచించారు.

మరోవైపు అనారోగ్య కారణాలతో కౌంటింగ్ ఏజెంట్ ఎవరైనా ఎన్నికల లెక్కింపునకు రాలేకపోతే.. నిబంధనల ప్రకారం మరొకరిని నియమించుకోవచ్చని చంద్రబాబు సూచించారు.ప్రతి ఓటూ కీలకమే అనేదిగుర్తుంచుకుని లెక్కింపు ప్రక్రియలో పాల్గొనాలని చంద్రబాబు కౌంటింగ్ ఏజెంట్లు దిశానిర్దేశం చేశారు.