అమెరికాలో డ్రగ్స్‌కు బానిసలై ప్రాణాలు కోల్పోతున్న తెలుగు విద్యార్థులు,,,,ఆరు నెలల కిందట ఇద్దరు

అమెరికాకు వెళ్లిన తెలుగు విద్యార్థులు.. అక్కడ మత్తుకు బానిసలై ప్రాణాలు కోల్పోతున్నారు. టెక్సాస్ యూనివర్సిటీలో ఎంఎస్ చదువుతోన్న తెలంగాణకు చెందిన ఇద్దరు విద్యార్ధులు.. ఆరు నెలల కిందట ప్రాణాలు కోల్పోయారు. ఈ ఇద్దరూ మూడు నిమిషాల వ్యవధిలోనే మృతిచెందగా.. వీరి మృతికి డ్రగ్స్ ఓవర్ డోస్ కారణమని వెల్లడయ్యింది. ఒకే గదిలో ఉంటోన్న ఇద్దరూ.. ఆ రోజు సాయంత్రం కొకైన్ అధిక మొత్తంలో తీసుకున్నారు. పరిస్థితి విషమంా ఉన్న వీరిని స్నేహితులు ఆస్పత్రికి తరలించగా.. అక్కడ చికిత్స పొందుతూ మృతిచెందారు. కాలిఫోర్నియా, టెక్సాస్, కనెక్టికట్‌లో గత ఏడాది కాలంలో డ్రగ్స్ ఓవర్‌డోస్ కేసులు కనీసం 30 వరకూ చోటుచేసుకోగా.. వీరిలో కొందరు ప్రాణాలు కోల్పోయినట్టు తానా (ఉత్తర అమెరికా తెలుగు సంఘం) నివేదించింది.

 మొత్తంగా డ్రగ్స్ తీసుకునే భారతీయ విద్యార్థులు సంఖ్య అధికంగా ఉంది.. అమెరికాకు వచ్చిన కొద్ది నెలల్లోనే కొందరు డ్రగ్స్ బానిసలై ఓవర్ డోస్‌తో అపస్మారక స్థితికి వెళ్లిపోతున్నారు’ అని తానా మాజీ కార్యదర్శి అశోక్ కొళ్ల అన్నారు. అయితే, విదేశాలకు వెళ్లిన భారతీయ విద్యార్థులు డ్రగ్స్ తీసుకోవడం కొత్తెం కాదు. కెనడాలోని చాలా మంది ఉద్యోగ వేటలో డ్రగ్స్‌కు బానిసలవుతోన్నట్టు టైమ్స్ ఆఫ్ ఇండియా గత ఏప్రిల్‌లో నివేదించింది. కానీ, అధిక డోస్‌ కేసులు ఆశ్చర్యానికి గురిచేస్తున్నాయి. కేవలం ఉద్యోగాలు లేకపోవటం లేదా కుటుంబసమస్యలు వారిని ప్రమాదకర స్థాయికి నడిపిస్తున్నాయని గ్లోబల్ తెలంగాణ అసోసియేషన్ ఛైర్మన్ విశ్వేశ్వర్ రెడ్డి కలవాలా అన్నారు.

‘కాలేజీ క్యాంపస్‌లోనే డ్రగ్స్ సులువుగా లభ్యం కావడం.. స్నేహితులు ద్వారా పొందడం మాదకద్రవ్యాల వినియోగానికి ప్రాథమిక కారణం. .. ఫ్రెండ్స్ బలవంతం లేదా కొత్త అనుభవాలను అన్వేషించాలనే కోరిక కారణంగా విద్యార్థులు డ్రగ్స్‌తో ప్రయోగాలు చేయడం మొదలుపెడతారు.. దీంతో పాటు అమెరికాలోని అనేక ప్రాంతాల్లో గంజాయి వంటి మాదకద్రవ్యాలు చట్టబద్ధమైనవి... తక్కువ ధరకే వస్తాయి.. కనెక్టికట్‌లో ఇటీవల ఒక విద్యార్థి ఓవర్ డోస్ తీసుకుని అపస్మారక స్థితిలోకి వెళ్లిపోయాడు.. కానీ సకాలంలో చికిత్స తర్వాత అతడు ప్రాణాలతో బయటపడ్డాడు.. ప్రస్తుతం తన బంధువుల వద్ద ఉంటున్నాడు.. కౌన్సెలింగ్ తీసుకుంటున్నాడు’ అని అశోక్ తెలిపారు.

టెక్సాస్‌లో ఉండే హైదరాబాద్‌కు చెందిన ఓ 27 ఏళ్ల యువకుడు.. 22 ఏళ్ల తన బంధువుకి ఇలాంటి పరిస్థితే వచ్చిందని చెప్పారు. గతేడాది సెప్టెంబరులో మాస్టర్ డిగ్రీ కోసం హ్యూస్టన్‌కు వచ్చాడని చెప్పారు. ‘కాలేజ్ అసైన్‌మెంట్‌లు, స్టేషనరీ ఖర్చుల పేరుతో నావద్ద, స్నేహితులు, ఇతర బంధువుల నుంచి డబ్బు తీసుకునేవాడు.. చివరకు అతను డ్రగ్స్ వాడుతున్నట్టు రూమ్‌మేట్స్ మాకు చెప్పారు. అద్దె కట్టకపోవడం, కాలేజీకి వెళ్లడం మానేశాడు..కౌన్సిలింగ్ ఇచ్చి డ్రగ్స్ అలవాటు మాన్పించాం.. ప్రస్తుతం బాగానే ఉన్నాడు’ అని చెప్పారు.

డ్రగ్స్ బానిసలుగా మారకుండా విద్యార్థులకు తెలుగు సంఘాలు కౌన్సెలింగ్ సెషన్లు కూడా నిర్వహిస్తుంటాయి. భారతీయుల సహా విద్యార్థుల్లో డ్రగ్స్ కల్చర్ పెరుగుతోందని అమెరికా యూనివర్సిటీలు నివేదిస్తున్నాయి. డ్రగ్స్ వాడుతూ పట్టుబడితే క్షమశిక్షణా చర్యలు తప్పవని యూనివర్శిటీ ఆఫ్ మెంఫిస్ ప్రోవోస్ట్ బాలాజీ కృష్ణన్ అన్నారు.