లావోస్‌లో హైదరాబాద్ యువకులకు చిత్రహింసలు

ఇటీవల లావోస్‌లో సైబర్ బానిసలుగా ఉన్న భారతీయ యువకుల్ని అక్కడ అధికారులు రక్షించిన విషయం తెలిసిందే. ఇప్పటి వరకూ కాంబోడియా, మయన్మార్‌లకే పరిమితైన సైబర్ నేరాల ముఠాలు లావోస్‌కు విస్తరించాయి. వాళ్లు చెప్పినట్టు చేయకపోతే చిత్రహింసలకు గురిచేస్తారని బాధితుల్లో ఒకరు తెలంగాణ సైబర్‌ సెక్యూరిటీ బ్యూరోకి ఫిర్యాదు చేయడంతో దారుణం వెలుగులోకి వచ్చింది. బాధితుడు వెల్లడించిన వివరాల ప్రకారం.. హైదరాబాద్‌లోని బడాబజార్‌కు చెందిన రాపిడో బైక్‌రైడర్‌ (23)కు ఫాజిల్‌ఖాన్‌ అనే స్థానికుడు.. లావోస్‌లో ఛాట్‌ప్రాసెస్‌ ఉద్యోగం పేరుతో ఆశ చూపాడు. జీతం కింద 35వేలు ఇస్తారని చెప్పి.. అబ్దుల్‌సమీ, దావూద్‌ అనే ఇద్దర్ని ఏజెంట్లుగా పరిచయం చేశాడు.

దీంతో బైక్‌రైడర్‌, అతడి స్నేహితుడు లావోస్‌ వెళ్లేందుకు సిద్దహై.. రూ.30వేల చొప్పున చెల్లించారు. ఈ ఏడాది మే 1 న సింగపూర్‌ మీదుగా ఇద్దర్నీ లావోస్‌ రాజధాని వియెంటియాన్‌కు పంపారు. అక్కడి నుంచి గోల్డెన్‌ ట్రయాంగిల్‌‌కు చేరుకున్న వీరి నుంచి ఇథియోపియన్‌ ఏజెంట్‌ ఒకరు పాస్‌పోర్టులను తీసుకుని, టాన్‌పెర్న్‌ డిస్ట్రిక్ట్‌ సెజ్‌లోని ఇంగ్‌జిన్‌ ప్రాపర్టీ అనే కంపెనీకి తీసుకెళ్లాడు. అక్కడకు వెళ్లిన తర్వాత ఏవో కొన్ని పరీక్షల అనంతం ఒప్పందంపై సంతకాలు తీసుకొని, వసతి కల్పించారు.

మొదటిరోజే కొత్త ఐఫోన్‌లు ఇచ్చిన ముఠా.. ఇన్‌స్టాగ్రామ్‌ అకౌంట్‌ను క్రియేట్ చేశారు. అక్కడి పరిస్థితులను బట్టి తమతో సైబర్‌ నేరాలు చేయించబోతున్నారని బాధితులు గ్రహించారు. కొద్ది రోజుల తర్వాత ఏజెంట్లు సమీ, దావూద్‌లు అక్కడకు రావడంతో తమను తిరిగి ఇండియాకు పంపించాలని వేడుకున్నారు. చూస్తామని చెప్పిన ఆ ఇద్దరూ తర్వాత కనిపించలేదు. బాధితులకు అమెరికా, కెనడా, యూకేలోని ప్రవాస భారతీయులను పెట్టుబడులు, హనీట్రాప్, క్రిప్టోకరెన్సీ పేరిట మోసగించే పనులను అప్పగించారు.

అలాగే, ఫేస్‌బుక్‌లో ఎన్‌ఆర్‌ఐలకు అందమైన అమ్మాయిల పేరిట ఫ్రెండ్‌ రిక్వెస్ట్‌లు పెట్టి... పరిచయం చేసుకుని, వారితో సంబంధాలు పెంచుకొని పెట్టుబడులు రాబట్టాలని హుకుం జారీచేసేవారు. వీరి ట్రాప్‌లో ఎవరైనా చిక్కితే.. ముఠాలు తమ సొంత యాప్‌లలోకి డబ్బులను బదిలీ చేయించుకునేవారు. వాళ్లు ఇచ్చిన టార్గెట్ పూర్తిచేయకుంటే కరెంట్‌ షాక్‌లు ఇవ్వడం.. 15 అంతస్తులను రోజుకు ఏడుసార్లు ఎక్కించి చిత్రహింసలు పెట్టేవారు. వారి కఠిన శిక్షలకు తాళలేక రాజస్థాన్‌‌కు చెందిన యువకులు తప్పించుకుని, లావోస్‌లోని ఇండియన్‌ ఎంబసీని ఆశ్రయించారు.

హైదరాబాద్‌ యువకులు ధైర్యం తెచ్చుకుని.. తమ పరిస్థితిపై ఎంబసీకి మెయిల్‌ చేశారు. దాంతో యువకులను వదిలిపెట్టాలని అక్కడి అధికారుల నుంచి ఆదేశాలు రావడంతో... వారి ఫోన్లను తీసుకుని వెళ్లగొట్టారు. భారత రాయబార కార్యాలయం అధికారులు వీరికి 9 రోజుల తర్వాత పాస్‌పోర్టులు సిద్ధం చేశారు. బాధితులు లావోస్‌ నుంచి థాయ్‌లాండ్‌కు, తర్వాత బస్సులో 12 గంటలు ప్రయాణించి బ్యాంకాక్‌కు చేరుకున్నారు. అక్కడి నుంచి ఆగస్టు24న విమానంలో హైదరాబాద్‌కు వచ్చారు. ఇటీవల బాధితుడి ఫిర్యాదు ఆధారంగా ఫాజిల్‌ఖాన్, సమీ, దావూద్‌ తదితరులపై పోలీసులు కేసు నమోదు చేసి, దర్యాప్తు చేపట్టారు.