పోలీసులపై నిప్పులు చెరిగిన బాంబే హైకోర్టు

తాజాగా ఓ కేసును విచారించిన బాంబే హైకోర్టు పోలీసులపై తీవ్ర ఆగ్రహం వ్యక్తం చేసింది. ముఖ్యంగా ఛార్జీషీట్లలో సాక్షుల వాంగ్మూలాలను కాపీ, పేస్ట్ చేయడాన్ని గుర్తించి మండిపడింది. తీవ్రమైన క్రిమినల్ కేసుల్లో కూడా సాక్షుల వాంగ్మూలాలను ఛార్జీషీట్లలో కాపీ, పేస్ట్ చేసే అధికారుల అలవాటును తీవ్రంగా పరిగణించింది. దీన్ని ప్రమాదకరమైన సంస్కృతిగా అభివర్ణిస్తూనే.. ఇది నిందితులకు చాలా బాగా ఉపయోగపడుతుందని తెలిపింది. ఇప్పటికైనా ఈ సంస్కృతికి పోలీసులు ముగింపు పలకాలని హెచ్చరికలు జారీ చేసింది. ఆ పూర్తి వివరాలు మీకోసం.

తమపై నమోదు అయిన ఎఫ్ఐఆర్‌లను రద్దు చేయాలని కోరుతూ కొంతమంది వ్యక్తులు బాంబే హైకోర్టులో పిటిషన్ వేశారు. అయితే ఈరోజు బాంబే హైకోర్టుకు సంబంధించిన ఔరంగాబాద్ ధర్మాసనం.. ఈ పిటిషన్లను విచారించింది. ముఖ్యంగా 17 ఏళ్ల బాలుడిని ఆత్మహత్యకు ప్రేరేపించారనే ఆరోపణలతో వారిపై కేసు నమోదు కాగా.. ఛార్జీషీట్‌ను న్యాయమూర్తులు పరిశీలించారు. ఈక్రమంలోనే జస్టిస్ విభ కన్‌కన్‌వాడి, సంజయ్ దేశ్‌ముఖ్‌ల ధర్మాసనం సాక్షుల వాంగ్మూలాలు అన్నీ పేరాగ్రాఫ్ మొదట్లో, చివర్లో ఒకేలా ఉండటాన్ని గుర్తించారు.

అవన్నింటినీ నిశితంగా పరిశీలిస్తే.. అదంతా కాపీ, పేస్ట్ చేసినట్లుగా తెలుస్తుందని అన్నారు. కాపీ, పేస్ట్ వాంగ్మూలాల సంస్కృతి చాలా ప్రమాదకరమైనది అని కొన్ని సందర్భాల్లో అనవసరంగా నిందితులకు ప్రయోజనం చేకూర్చవచ్చన్నారు. అలాంటి పరిస్థితుల్లో నిజమైన కేసు యొక్క తీవ్రత తగ్గిపోతుందని వ్యాఖ్యానించారు. పోలీసు దర్యాప్తులో ఇలాంటి తప్పులు న్యాయ వ్యవస్థపై ప్రజల నమ్మకాన్ని దెబ్బతీస్తాయని న్యాయమూర్తులు అన్నారు. అత్యంత త్వరగా ఈ సాక్షల వాంగ్మూలాన్ని కాపీ, పేస్ట్ చేయడం మానేయాలని సూచించారు. ఇది చాలా ప్రమాదకర సంస్కృతి అంటూనే.. దీన్ని త్వరగా విడనాడాలని వివరించారు.

ఈ సమస్యను ఎత్తి చూపినప్పటికీ.. నేరం తీవ్రమైందని చెబుతూ ఈ కేసులో ఎఫ్ఐఆర్‌ను న్యాయమూర్తులు రద్దు చేయలేరు. అలాగే ఈ విషయంలో సహాయం చేయడానికి న్యాయవాది ముకుల్ కులకర్ణిని అమికస్ క్యూరీగా నియమించింది. డేటాను సేకరించడం మరియు సమస్యను పరిష్కరించడానికి, దర్యాప్తు నాణ్యతను మెరుగు పరచడానికి రాష్ట్ర ప్రభుత్వం తీసుకోగగల నిర్దిష్ట చర్యలను సూచించే బాధ్యతను ఆయనపై ఉంచింది. అలాగే ఈ కేసును జూన్ 27 తేదీకి వాయిదా వేశారు.