తెలంగాణ హైకోర్టు భారీ ఊరట..

అక్రమ మైనింగ్ కేసులో గాలి జనార్దన్ రెడ్డికి హైకోర్టులో తాత్కాలిక ఊరట కర్ణాటక మాజీ ఎమ్మెల్యే, ఓబుళాపురం మైనింగ్ కంపెనీ ప్రధాన ప్రముఖుడు గాలి కి అక్రమ మైనింగ్ కేసులో తెలంగాణ హైకోర్టు భారీ ఊరట కల్పించింది. గత నెల  సీబీఐ ప్రత్యేక కోర్టు నుంచి ఏడేళ్ల జైలు శిక్ష పడిన ఆయన, ఆ తీర్పును సవాల్ చేస్తూ హైకోర్టును ఆశ్రయించారు. బుధవారం ఆయన వాదనలను పరిగణనలోకి తీసుకున్న హైకోర్టు, శిక్షను తాత్కాలికంగా సస్పెండ్ చేస్తూ మధ్యంతర ఉత్తర్వులు జారీ చేసింది. ఈ తీర్పుతో రెడ్డికి శ్వాస సులభమైంది. అయితే కొన్ని కఠినమైన షరతులతోనే ఈ ఉపశమనం లభించింది. ఓబుళాపురం మైనింగ్ కంపెనీ అక్రమ మైనింగ్ కార్యకలాపాలకు సంబంధించిన కేసులో, గాలి తో పాటు మరో ముగ్గురిని కూడా సీబీఐ కోర్టు దోషులుగా ప్రకటించింది. ఏడేళ్ల కఠిన కారాగార శిక్షతో పాటు జరిమానా కూడా విధించింది. ఈ తీర్పు వెలువడిన తర్వాత కర్ణాటక శాసనసభ గాలి శాసనసభ్యత్వాన్ని రద్దు చేసింది. దీంతో ఆయన రాజకీయ భవిష్యత్ మీద ముసురు కమ్మింది. ఈ నేపథ్యంలో ఆయన హైకోర్టును ఆశ్రయించడం, తాత్కాలిక ఉపశమనం కోరడం మరింత ప్రాధాన్యత సంతరించుకుంది. ''శిక్ష అమలైతే నియోజకవర్గం కోల్పోతాను'' - గాలి వాదన గాలి  తరఫున న్యాయవాది హైకోర్టులో చేసిన వాదనలూ కేసులో కీలకమయ్యాయి. ఇప్పటికే మూడు సంవత్సరాలకుపైగా ఆయన జైలు జీవితం గడిపారని, మరింత శిక్ష అమలైతే ఎమ్మెల్యేగా పోటీ చేసే అర్హత కోల్పోతారని అన్నారు. నియోజకవర్గంలో ఉపఎన్నికలు జరిగితే రాజకీయంగా తీవ్ర నష్టం ఎదురయ్యే అవకాశం ఉందని పేర్కొన్నారు. పైగా ఈ కేసులో శిక్ష అమలుపై తక్షణమే నిర్ణయం తీసుకోవాల్సిన అత్యవసర పరిస్థితి లేదని న్యాయవాది అభిప్రాయపడ్డారు. గాలి తరఫు వాదనలు విన్న హైకోర్టు, ఆయనకు తాత్కాలిక ఉపశమనం కల్పించింది. రూ.10 లక్షల చొప్పున రెండు పూచీకత్తులు సమర్పించాలని ఆదేశించింది. అంతేకాకుండా దేశం విడిచి వెళ్లరాదని, తన పాస్‌పోర్టును కోర్టుకు అప్పగించాలని షరతులు విధించింది. తదుపరి విచారణ ప్రక్రియకు అందుబాటులో ఉండాలనే ఉద్దేశంతో ఈ షరతులు విధించినట్లు తెలుస్తోంది. హైకోర్టులో శిక్ష సస్పెన్షన్ పై సీబీఐ తీవ్రంగా అభ్యంతరం వ్యక్తం చేసింది. గాలి జనార్దన్ రెడ్డి మీద ఇప్పటికే ఇతర కేసులు నడుస్తున్నాయని, శిక్షను సస్పెండ్ చేయాల్సిన ఎలాంటి అసాధారణ పరిస్థితులు లేవని వాదించింది. అయినా కోర్టు ఈ అభ్యంతరాలను పరిగణనలోకి తీసుకున్నప్పటికీ, తీర్పును తాత్కాలికంగా నిలిపివేయడం ప్రాధాన్యత సంతరించుకుంది. ఈ తీర్పుతో రెడ్డి వర్గంలో ఆనందం వ్యక్తమవుతుండగా, విపక్షాల్లో విమర్శలు వినిపిస్తున్నాయి.