చున్నీలనే చాటుగా చేసుకుని, పాపం ఆ విద్యార్థినులు.. పరువు కాపాడండి సారూ!

ప్రపంచం మొత్తం అభివృద్ధి వైపు పరుగులు పెడుతుంటే.. మారుమాల మన్యం ప్రాంతాలలో పరిస్థితి మాత్రం ఎక్కడ వేసిన గొంగళి అక్కడే అన్న చందంగా ఉంది. బహుళ అంతస్థుల భవనాలు, ఆకాశాన్ని తాకే నిర్మాణాలతో పట్టణాలు మెరసిపోతుంటే.. మన్యం ప్రాంతాలను మౌలిక సదుపాయాల కొరత వేధిస్తోంది. ఆ కొరత ఏ స్థాయిలో.. ఆ ప్రభావం వారి జీవితాలపై ఏ మేరకు పడుతోందో తెలిపే ఘటన.. తాజాగా వెలుగుచూసింది. దీనికి సంబంధించిన ఫోటో సోషల్ మీడియాలో వైరల్ అవుతోంది. ప్రభుత్వ పెద్దలు ఇప్పటికైనా ఆ కాలేజీ విద్యార్థినుల బాధను అర్థం చేసుకోవాలని నెటిజన్లు అభిప్రాయపడుతున్నారు.

పార్వతీపురం మన్యం జిల్లా సాలూరులోని గిరిజన బాలికల కళాశాల హాస్టల్‌లో అధ్వాన్న పరిస్థితులు నెలకొన్నాయి. సాలూరు గిరిజన బాలికల కళాశాల హాస్టల్‌లో 200 మంది విద్యార్థినులు ఉంటారు. వీరంతా స్థానిక కాలేజీలో చదువుకుంటున్నారు. అయితే కాలేజీ హాస్టల్‌లో వీరి కోసం కేవలం 8 బాత్రూమ్‌లు మాత్రమే ఉన్నాయి. 200 మంది విద్యార్థులకు 8 బాత్‌రూమ్‌లు ఉండటమే దారుణమైతే.. ఆ బాత్‌రూమ్‌ల పరిస్థితి చూస్తే మరింత అధ్వాన్నంగా ఉంది. బాత్‌రూమ్‌లు పూర్తిగా పాడైపోయి శిథిలావస్థకు చేరుకున్నాయి. దీనికి తోడు తలుపులు విరిగిపోవటంతో.. విద్యార్థినులు తమ చున్నీలనే అడ్డుగా వేసి.. బాత్‌రూమ్‌లో స్నానాలు, ఇతర కార్యకలాపాలు తీర్చుకోవాల్సిన దుస్థితి ఏర్పడింది. ఈ ఫోటో ఇప్పుడు నెట్టింట వైరల్ అవుతోంది.

సరైన సదుపాయాలు, నిఘా వ్యవస్థ ఉన్న ప్రాంతాల్లోనే అమ్మాయిలపై అఘాయిత్యాలు, దారుణాలు జరుగుతున్న కాలమిది. అలాంటిది మారుమూల మన్యం ప్రాంతంలో ఇలా ఓ సగటు విద్యార్థిని తన చున్నీనే చాటుగా చేసుకుని కనీస అవసరాలు తీర్చుకోవాల్సిన పరిస్థితులు ఉన్నాయంటే.. అదెంత దారుణమో అర్థం చేసుకోవచ్చు. ప్రభుత్వం ఇకనైనా ఈ సమస్యపై స్పందించి.. ఆ విద్యార్థినుల పరువు కాపాడాలని.. హాస్టల్‌లో కనీస మౌలిక సదుపాయాలు కల్పించాలని సాలూరు వాసులతో పాటుగా ఈ విషయం చూసిన నెటిజన్లు కూడా కోరుతున్నారు.

సాలూరు బాలిక గిరిజన కళాశాల హాస్టల్‌లో మాత్రమే కాదు.. బీసీ బాలుర వసతి గృహంలోనూ ఇలాంటి సమస్యలు వేధిస్తున్నాయి. బాలుర హాస్టల్ నిర్మాణాల మరమ్మతులకు రూ.2 లక్షలను ప్రభుత్వం మంజూరు చేసింది. అయితే పనులింకా ప్రారంభం కాలేదు. త్వరలోనే పనులు ప్రారంభిస్తామని విద్యాశాఖ అధికారులు చెప్తున్నారు. అలాగే సాలూరు గిరిజన బాలికల కళాశాల హాస్టల్‌లో బాత్రూములకు తలుపులు ఏర్పాటు చేయిస్తామని చెప్పారు.